આ ભારતીય સ્ટાર બન્યો ICC પ્લેયર ઓફ ધ મંથ, 2 દિગ્ગજોને પાછળ છોડ્યા

ચેમ્પિયન્સ ટ્રોફી 2025ના સમાપન પછી, ICC એ બુધવારે ફેબ્રુઆરી માટે 'પ્લેયર ઓફ ધ મંથ' ની જાહેરાત કરી. ભારતના ટોચના ક્રમના બેટ્સમેનએ ઓસ્ટ્રેલિયાના સ્ટીવ સ્મિથ અને ન્યુઝીલેન્ડના ગ્લેન ફિલિપ્સને હરાવીને આ એવોર્ડ જીત્યો છે. આ બેટ્સમેન બીજું કોઈ નહીં પણ ટીમ ઈન્ડિયાનો પ્રિન્સ શુભમન ગિલ છે.

ગિલે ફેબ્રુઆરીમાં 5 ODI મેચ રમી છે. આ સમયગાળા દરમિયાન, તેણે 94.13ના સ્ટ્રાઈક રેટ અને 101.50ની એવરેજથી 406 રન બનાવ્યા હતા. ગયા મહિને, ભારતે ઈંગ્લેન્ડ સામે 3 મેચની ODI સિરીઝ રમી હતી. ગિલ આ સિરીઝમાં સૌથી વધુ રન બનાવનાર ખેલાડી હતો. તેણે 3 મેચની 3 ઈનિંગ્સમાં 259 રન બનાવ્યા. ગિલે ODI સિરીઝમાં 2 અડધી સદી અને 1 સદી ફટકારી હતી.

ગિલે નાગપુરમાં રમાયેલી પહેલી વનડેમાં 87 રન બનાવ્યા હતા. આ પછી, કટક વનડેમાં, તેણે 52 બોલમાં 60 રન બનાવ્યા. ગિલે અમદાવાદમાં રમાયેલી છેલ્લી વનડેમાં સદી ફટકારી હતી. તેણે 102 બોલનો સામનો કર્યો અને 14 ચોગ્ગા અને 3 છગ્ગાની મદદથી 112 રન બનાવ્યા. આ ઈનિંગ માટે ગિલને પ્લેયર ઓફ ધ મેચ અને પ્લેયર ઓફ ધ સિરીઝ જાહેર કરવામાં આવ્યો  હતો.

ગિલનું પ્રદર્શન ICC ચેમ્પિયન્સ ટ્રોફી 2025માં પણ શાનદાર રહ્યું હતું. તેણે બાંગ્લાદેશ સામેની પહેલી જ મેચમાં સદી ફટકારી અને ભારતને જીત અપાવી હતી. 20 ફેબ્રુઆરીએ દુબઈમાં રમાયેલી આ મેચમાં ગિલે 129 બોલમાં અણનમ 101 રન બનાવ્યા હતા. 23 ફેબ્રુઆરીના રોજ, ભારતીય ટીમનો સામનો પાકિસ્તાન સામે થયો. આ મેચમાં ગિલે 46 રનની મહત્ત્વપૂર્ણ ઈનિંગ રમી હતી. ગિલે ત્રીજી વખત ICC મેન્સ પ્લેયર ઓફ ધ મન્થનો એવોર્ડ જીત્યો છે. આ પહેલા, તેણે 2023 (જાન્યુઆરી અને સપ્ટેમ્બર) માં બે વાર આ એવોર્ડ જીત્યો હતો.