આ ઓસ્ટ્રેલિયન ખેલાડીને મોટી સિરીઝમાં કેપ્ટનશિપ કરવાની મળી શકે છે તક, ચીફ સિલેક્ટરે આપ્યું નિવેદન
છેલ્લું અપડેટ : 18 Oct 2025
ભારત અને ઓસ્ટ્રેલિયા વચ્ચે 3 મેચની ODI સિરીઝ 19 ઓક્ટોબરથી શરૂ થઈ રહી છે. આ પછી બંને ટીમ વચ્ચે 5 મેચની T20I સિરીઝ 29 ઓક્ટોબરથી રમાશે. ત્યારબાદ ઓસ્ટ્રેલિયા અને ઈંગ્લેન્ડ વચ્ચે પાંચ ટેસ્ટ મેચની એશિઝ સિરીઝ 21 નવેમ્બરથી શરૂ થવાની છે. ઓસ્ટ્રેલિયાનો નિયમિત કેપ્ટન પેટ કમિન્સ હાલમાં ઘાયલ છે અને પીઠની સમસ્યાથી પીડાઈ રહ્યો છે. તે એશિઝની પહેલી મેચ રમશે કે નહીં તે એક મોટો પ્રશ્ન છે. આ દરમિયાન, ક્રિકેટ ઓસ્ટ્રેલિયાના ચીફ સિલેક્ટર જ્યોર્જ બેલીએ એકમહત્ત્વપૂર્ણ નિવેદન આપ્યું છે. તેણે કહ્યું કે જો કમિન્સ સમયસર ફિટ નહીં થાય, તો 36 વર્ષીય સ્ટીવ સ્મિથ એશિઝનું નેતૃત્વ કરશે. ઈજાને કારણે, કમિન્સ ભારત સામેની 3 મેચની ODI સિરીઝમાંથી પણ બહાર રહેશે.
સ્ટીવ સ્મિથ એશિઝ શ્રેણીનું નેતૃત્વ કરશે
એક અહેવાલ અનુસાર બેલીએ કહ્યું હતું કે, "જો પેટ કમિન્સ નહીં રમી શકે, તો સ્ટીવ સ્મિથ કેપ્ટનશિપ કરશે. ભૂતકાળમાં આ રણનીતિ અમારા માટે ખૂબ અસરકારક સાબિત થઈ છે." તેણે વધુમાં કહ્યું કે, "તે રમે કે ન રમે, પેટ ટીમ સાથે રહેવા માટે ઉત્સુક છે. જો તે નહીં રમે, તો તે રિહેબ, તૈયારી અને બોલિંગમાં રહેશે. અલબત્ત, તે ટીમ સાથે રહેશે જેથી માહિતીનો પ્રવાહ અને કેપ્ટન અને વાઈસ-કેપ્ટનના રૂપમાં એકસાથે કામ કરવું એક જેવું રહે."
સ્ટીવ સ્મિથે બેટિંગ પ્રેક્ટિસ શરૂ કરી
સ્મિથ આ અઠવાડિયાની શરૂઆતમાં ન્યૂયોર્કથી ઓસ્ટ્રેલિયા પાછો ફર્યો હતો. તેણે આગમનના બીજા દિવસે ક્રિકેટ ન્યૂ સાઉથ વેલ્સ હેડક્વાર્ટરમાં બેટિંગ શરૂ કરી હતી. તે શેફિલ્ડ શીલ્ડ ટુર્નામેન્ટની આગામી બે મેચમાં ન્યૂ સાઉથ વેલ્સ માટે રમશે. બેલીએ કહ્યું કે, "સ્ટીવ તેના પાછા ફર્યાના બીજા દિવસે ક્રિકેટ NSW હેડક્વાર્ટરમાં બેટિંગ કરી રહ્યો હતો. તે તેનું કામ કરશે. અમે દરેકની તૈયારીને તેમના અને તેમની સંબંધિત જવાબદારીઓને અનુરૂપ બનાવવાનો પ્રયાસ કર્યો છે."
કેમેરોન ગ્રીન ઈજાગ્રસ્ત
કમિન્સ ઉપરાંત, ઓલરાઉન્ડર કેમેરોન ગ્રીન પણ ઈજાગ્રસ્ત છે, અને તેની ઈજાએ ટીમના ટેન્શનમાં વધારો કર્યો છે. તે કરોડરજ્જુની સર્જરીમાંથી સ્વસ્થ થઈ રહ્યો છે. શેફિલ્ડ શીલ્ડની પહેલી મેચમાં બોલિંગ કરતી વખતે સ્નાયુઓમાં ખેંચાણને કારણે ગ્રીનને ભારત સામેની આગામી સિરીઝમાંથી બહાર કરવામાં આવ્યો હતો. બેલીએ કહ્યું કે, "સ્નાયુઓમાં ખેંચાણ ખેલાડીઓને ચારથી છ અઠવાડિયા સુધી બહાર રાખી શકે છે. જોકે, એશિઝ પહેલા ગ્રીનની ફિટનેસ અંગે કોઈ પ્રશ્ન રહેશે નહીં. તે સિરીઝ પહેલા તે સંપૂર્ણપણે ફિટ થઈ જશે."
