IND vs ENG / 11 વર્ષ બાદ ફરી ઓલ્ડ ટ્રેફર્ડમાં જોવા મળશે આ 3 ખેલાડીઓનો જલવો, શું ટીમને અપાવશે જીત?
છેલ્લું અપડેટ : 19 Jul 2025
ભારત અને ઈંગ્લેન્ડ વચ્ચેની ટેસ્ટ સિરીઝની ચોથી મેચ ખૂબ જ ખાસ બનવાની છે. તે માન્ચેસ્ટરના પ્રખ્યાત ઓલ્ડ ટ્રેફર્ડ ક્રિકેટ ગ્રાઉન્ડ પર રમાશે. 11 વર્ષ પહેલા, આ મેદાન પર બંને ટીમો ટકરાઈ હતી, જેમાં ઈંગ્લેન્ડે 54 રન અને એક ઈનિંગથી જીત મેળવી હતી. આ 11 વર્ષોમાં, ભારત અને ઈંગ્લેન્ડની ટીમ બદલાઈ ગઈ છે પરંતુ કેટલાક ખેલાડીઓ હજુ પણ રમી રહ્યા છે. ચાલો જાણીએ તે 3 ખેલાડીઓ વિશે જે 11 વર્ષ પછી ઓલ્ડ ટ્રેફર્ડમાં ફરી રમતા જોવા મળશે.
રવિન્દ્ર જાડેજા
રવીન્દ્ર જાડેજા ઘણા વર્ષોથી ભારત માટે રમી રહ્યો છે અને તે ટીમનો મહત્ત્વપૂર્ણ ભાગ છે. જાડેજા 11 વર્ષ પહેલા ઓલ્ડ ટ્રેફર્ડ ખાતે રમાયેલી મેચનો ભાગ હતો. મેચમાં તે બેટથી ખાસ યોગદાન નહતો આપી શક્યો. જ્યારે બોલિંગમાં તેણે 13.3 ઓવરમાં માત્ર 2.66ની એવરેજથી એક વિકેટ લીધી હતી.
સમય જતાં જાડેજાની બેટિંગમાં સુધારો થયો છે. જાડેજાએ એન્ડરસન-તેંડુલકર ટ્રોફી 2025માં ફેન્સને પ્રભાવિત કર્યા છે. લોર્ડ્સ ખાતે રમાયેલી ત્રીજી ટેસ્ટમાં, જાડેજાએ પ્રથમ ઈનિંગમાં 72 અને બીજી ઈનિંગમાં અણનમ 61 રન બનાવ્યા હતા. આ દર્શાવે છે કે છેલ્લા દાયકામાં તેની બેટિંગમાં ઘણો સુધારો થયો છે.
જો રૂટ
જો રૂટ હાલમાં ઈંગ્લેન્ડના સૌથી મોટા ખેલાડીઓમાંનો એક છે. તે વર્ષોથી ઈંગ્લેન્ડ ટીમનો ભાગ રહ્યો છે અને સતત સારું પ્રદર્શન કરી રહ્યો છે. રૂટે ડિસેમ્બર 2012માં ટેસ્ટ ડેબ્યુ કર્યું હતું. 2014માં ભારતના ઈંગ્લેન્ડ પ્રવાસ દરમિયાન રૂટે કમાલ કરી હતી.
ઓલ્ડ ટ્રેફર્ડ ખાતે રમાયેલી મેચમાં, રૂટે પ્રથમ ઈનિંગમાં 77 રનની શાનદાર ઈનિંગ રમી હતી. રૂટના આ પ્રદર્શનનો ફાયદો ઈંગ્લેન્ડને થયો હતો. રૂટ આ મેચમાં ફરીથી બેટિંગ કરવા નહતો ઉતર્યો, કારણ કે ઈંગ્લેન્ડે મેચ એક ઈનિંગથી જીતી લીધી હતી. હવે રૂટ ઓલ્ડ ટ્રેફર્ડ ખાતે ભારત સામે ફરીથી તેના વિસ્ફોટક પ્રદર્શનનું પુનરાવર્તન કરવા માંગશે.
ક્રિસ વોક્સ
ક્રિસ વોક્સ ઘણા વર્ષોથી ઈંગ્લેન્ડ માટે રમી રહ્યો છે. ક્રિસ 2014માં ઓલ્ડ ટ્રેફર્ડ ખાતે ભારત સામેની મેચનો ભાગ હતો. આમાં, ક્રિસે પ્રથમ ઈનિંગમાં અણનમ 26 રન બનાવ્યા હતા, જ્યારે બીજી ઈનિંગમાં તેણે બોલ સાથે ઓપનર મુરલી વિજયની મહત્ત્વપૂર્ણ વિકેટ લીધી હતી.
ક્રિસ વોક્સ હવે 11 વર્ષ પછી ઓલ્ડ ટ્રેફર્ડ ખાતે ચમકવાનો પ્રયાસ કરશે. તેણે છેલ્લી 3 મેચમાં 7 વિકેટ લીધી છે. સ્પષ્ટ છે કે, તે તેની ક્ષમતા મુજબ પ્રદર્શન નથી કરી શક્યો પરંતુ તેની પાસે ઓલ્ડ ટ્રેફર્ડ ખાતે પોતાનું નસીબ બદલવાની તક છે.