કોણ બનશે નંબર-1, કોને મળશે બીજું સ્થાન, ICC કેવી રીતે નક્કી કરે છે પ્લેયર રેન્કિંગ?
છેલ્લું અપડેટ : 19 Jul 2025
ICC પ્લેયર રેન્કિંગ એ એક ટેબલ છે જેમાં ઈન્ટરનેશનલ ક્રિકેટર્સને પોઈન્ટ બેઝ સિસ્ટમ દ્વારા તેમના પ્રદર્શનના આધારે રેન્ક આપવામાં આવે છે. ક્રિકેટર્સને 0થી 1000 પોઈન્ટ વચ્ચે રેટ કરવામાં આવે છે. જો કોઈ ખેલાડીનું પ્રદર્શન પહેલા કરતા સારું હોય, તો તે ખેલાડીના પોઈન્ટ વધે છે. બીજી બાજુ, જો ખેલાડીનું પ્રદર્શન પહેલા કરતા ખરાબ હોય, તો પોઈન્ટ ઘટે છે.
રેન્કિંગ કેવી રીતે નક્કી કરવામાં આવે છે?
મેચમાં ક્રિકેટર્સના પ્રદર્શનની ગણતરી કરવા માટે એક અલ્ગોરિધમનો ઉપયોગ કરવામાં આવે છે, જેના દ્વારા તે મેચની પરિસ્થિતિ અનુસાર ખેલાડીના પ્રદર્શનની ગણતરી કરવામાં આવે છે. આ અલ્ગોરિધમમાં તે મેચમાં ખેલાડી દ્વારા બનાવેલા રન અને વિકેટનો સમાવેશ થાય છે. જો ખેલાડીએ મુશ્કેલ પરિસ્થિતિમાં તેની ટીમને તે મેચમાં જીતી અપાવી હોય, તો તેના પ્રદર્શનનું મૂલ્ય વધી જાય છે.
ICCની આ ગણતરી પ્રક્રિયામાં કોઈ વ્યક્તિ દખલ નથી કરી શકતી અને ન તો કોઈ ખેલાડીને વધુ મહત્ત્વ આપવામાં આવે છે. ICC આ રેન્કિંગ પ્રક્રિયાને સંપૂર્ણપણે ન્યાયી રાખે છે. તમને જણાવી દઈએ કે ટેસ્ટ ક્રિકેટ, ODI અને T20માં રેન્કિંગ નક્કી કરવા માટે વિવિધ પરિબળો જવાબદાર હોય છે. ICC રેન્કિંગ દ્વારા ટેબલમાં ખેલાડીઓનું સ્થાન જણાવે છે અને ટેબલમાં રેટિંગ ખેલાડીઓને મળેલા પોઈન્ટ જણાવે છે.
બુમરાહ નંબર 1 બોલર
ભારતનો ફાસ્ટ બોલર જસપ્રીત બુમરાહ હાલમાં ICC મેન્સ ટેસ્ટ બોલિંગ રેન્કિંગમાં નંબર વન છે. બુમરાહના રેટિંગ પોઈન્ટ 901 છે. સાઉથ આફ્રિકાનો બોલર કાગીસો રબાડા 851 રેટિંગ પોઈન્ટ સાથે બીજા સ્થાને છે. ઓસ્ટ્રેલિયાનો બોલર પેટ કમિન્સ 838 રેટિંગ પોઈન્ટ સાથે આ યાદીમાં ત્રીજા નંબરે છે. બુમરાહ, રબાડા અને કમિન્સને તેમના પ્રદર્શનને ધ્યાનમાં રાખીને આ રેટિંગ આપવામાં આવ્યું છે. આ ત્રણ બોલર્સે ઘણી વખત તેમની ટીમો માટે મેચ જીતવામાં યોગદાન આપ્યું છે.
જસપ્રીત બુમરાહએ તાજેતરમાં ICC ટેસ્ટ બોલિંગ રેન્કિંગમાં 907 રેટિંગ પોઈન્ટ હાંસલ કર્યા હતા, જે કોઈપણ ભારતીય બોલર દ્વારા મેળવેલ હાઈએસ્ટ રેટિંગ છે. અગાઉ આ રેકોર્ડ રવિચંદ્રન અશ્વિનના નામે હતો. અશ્વિને તેના ટેસ્ટ કરિયરમાં 904 પોઈન્ટનું હાઈએસ્ટ રેટિંગ મળ્યું હતું. અશ્વિને 18 ડિસેમ્બર 2024 ના રોજ ક્રિકેટના તમામ ફોર્મેટમાંથી નિવૃત્તિની જાહેરાત કરી હતી. ઈન્ટરનેશનલ ક્રિકેટમાંથી નિવૃત્તિ લેનાર ખેલાડીનું નામ પણ ICC રેન્કિંગમાંથી દૂર કરવામાં આવે છે.
