IND vs ENG / ટેસ્ટ સિરીઝ વચ્ચે આવ્યા મોટા સમાચાર, ECB એ ડ્યુક્સ બોલ અંગે લીધો આ નિર્ણય
છેલ્લું અપડેટ : 19 Jul 2025
ભારત અને ઈંગ્લેન્ડ વચ્ચે ચાલી રહેલી પાંચ મેચની ટેસ્ટ સિરીઝમાં ઉપયોગમાં લેવાતા ડ્યુક્સ બોલની ક્વોલિટી પર પ્રશ્નો ઉભા થઈ રહ્યા છે. બોલ ઝડપથી ઘસાઈ જવા અને વારંવાર બદલવાના વિવાદ બાદ, તેનું ઉત્પાદન કરતી કંપનીએ હવે આ બાબતની સંપૂર્ણ તપાસ કરવાનો નિર્ણય લીધો છે. ડ્યુક્સ બોલનું ઉત્પાદન કરતી બ્રિટિશ ક્રિકેટ બોલ્સ લિમિટેડના માલિક દિલીપ જાજોદિયાએ ઇન્ટરવ્યુમાં જણાવ્યું હતું કે તેઓ ઈંગ્લેન્ડ અને વેલ્સ ક્રિકેટ બોર્ડ (ECB) દ્વારા પરત કરવામાં આવેલા તમામ વપરાયેલા બોલની તપાસ કરશે. તેમણે કહ્યું કે, "અમે આ બોલને નિરીક્ષણ માટે પાછા લઈ જઈશું, ઉત્પાદન ટીમ સાથે ચર્ચા કરીશું અને જરૂર પડ્યે ફેરફારો કરીશું."
30 ઓવરની અંદર બોલ ખરાબ થઈ રહ્યો છે
આ સિરીઝમાં અત્યાર સુધી, અમ્પાયર્સને મેદાન પર ઘણી વખત બોલ બદલવો પડ્યો છે કારણ કે લગભગ 30 ઓવરની અંદર બોલ તેની ચમક અને અસર ગુમાવી રહ્યા હતા. આનાથી ખેલાડીઓને માત્ર સમસ્યાઓ જ નહતી થતી, પરંતુ મેચની ગતિ પર પણ અસર પડી હતી. શુભમન ગિલ અને ઈંગ્લેન્ડના ભૂતપૂર્વ ફાસ્ટ બોલર સ્ટુઅર્ટ બ્રોડે બોલની ક્વોલિટી પર નારાજગી વ્યક્ત કરી હતી.
ટેસ્ટ ક્રિકેટમાં વિવિધ દેશોમાં વિવિધ બોલનો ઉપયોગ થાય છે. ઈંગ્લેન્ડમાં ડ્યુક્સ, ભારતમાં એસજી અને ઓસ્ટ્રેલિયામાં કૂકાબુરા બોલ. ડ્યુક્સ બોલ 1760થી બનાવવામાં આવી રહ્યો છે, પરંતુ તાજેતરના વર્ષોમાં ટેસ્ટ અને કાઉન્ટી ક્રિકેટમાં તેની ક્વોલિટી અંગે ટીકા વધી છે.
ECB એ બોલ પરત કર્યા
ડ્યુક્સ પર વધતા વિવાદ વચ્ચે, ઈંગ્લેન્ડ ક્રિકેટ બોર્ડ (ECB) એ આ અઠવાડિયાના અંત સુધીમાં બધા વપરાયેલા બોલ ઉત્પાદક કંપનીને સોંપવાનો નિર્ણય લીધો છે. આ સ્પષ્ટ કરે છે કે બોર્ડ પણ બોલની ક્વોલિટી પ્રત્યે ગંભીર છે. નોંધનીય છે કે ઈંગ્લેન્ડ વર્તમાન સિરીઝમાં 2-1થી આગળ છે અને આગામી મેચ 23 જુલાઈથી માન્ચેસ્ટરના ઓલ્ડ ટ્રેફર્ડ ખાતે રમાશે. આવી સ્થિતિમાં, ડ્યુક્સ બોલનો રિવ્યુ સિરીઝની બાકીની મેચો પર પણ અસર કરી શકે છે.
