IND vs NZ / મોહમ્મદ સિરાજને બહાર રાખવાનો નિર્ણય ખોટો નથી, ટીમ ઈન્ડિયાના કોચે પ્લેઈંગ ઈલેવન પર આપ્યું નિવેદન

વેલિંગ્ટન ટેસ્ટમાં પ્રદર્શન કરતાં ભારતની પ્લેઈંગ ઈલેવન વધુ ધ્યાન ખેંચી રહી છે. ટીમ ઈન્ડિયાએ પહેલી મેચમાં રવિન્દ્ર જાડેજા અને મોહમ્મદ સિરાજ જેવા અનુભવી ખેલાડીઓને પ્લેઈંગ ઈલેવનમાંથી બહાર રાખ્યા હતા, જેના કારણે ઘણા ક્રિકેટ નિષ્ણાતોમાં ગંભીર પ્રશ્નો ઉભા થયા છે. સુનિલ ગાવસ્કર, અજય જાડેજા અને અજિંક્ય રહાણેએ કોમેન્ટ્રી દરમિયાન આ નિર્ણય પર આશ્ચર્ય વ્યક્ત કર્યું. જોકે, ટીમ ઈન્ડિયા મેનેજમેન્ટને આ નિર્ણયમાં કોઈ સમસ્યા નથી દેખાતી. બેટિંગ કોચ સિતાંશુ કોટકે વેલિંગ્ટન ટેસ્ટના પહેલા દિવસ પછી કહ્યું હતું કે મોહમ્મદ સિરાજને પ્લેઈંગ ઈલેવનમાંથી બહાર રાખવાનો નિર્ણય ખોટો નહતો.
'અમે શ્રેષ્ઠ પ્લેઈંગ ઈલેવન પસંદ કર્યું'
સિતાંશુ કોટકે મીડિયા સાથે વાત કરતા કહ્યું કે વેલિંગ્ટન ટેસ્ટની પરિસ્થિતિઓને ધ્યાનમાં રાખીને ટીમ ઈન્ડિયાએ શ્રેષ્ઠ પ્લેઈંગ ઈલેવન પસંદ કરી છે. તેણે કહ્યું, "પરિસ્થિતિ અને વિરોધી ટીમને ધ્યાનમાં રાખીને, કેપ્ટન અને ટીમ મેનેજમેન્ટ માને છે કે આ શ્રેષ્ઠ પ્લેઈંગ ઈલેવન છે. વ્યક્તિગત રીતે, મને લાગે છે કે સિરાજને ડ્રોપ કરવો એ ખોટો નિર્ણય નહતો."
'પ્રસિદ્ધ કૃષ્ણાની પસંદગી કરવી એ સાચો નિર્ણય હતો'
સિતાંશુ કોટકે કહ્યું કે પ્રસિદ્ધ કૃષ્ણાને પ્લેઈંગ ઈલેવનમાં પસંદ કરવો એ સાચો નિર્ણય હતો. તેણે કહ્યું, "કૃષ્ણા એક આક્રમક બોલર છે. તેની સામે રન બનાવી શકાય છે. જ્યારે તે વિકેટ લે છે ત્યારે લોકો તેને પસંદ કરે છે, પરંતુ જ્યારે તે રન આપે છે ત્યારે તેઓ ગુસ્સે થાય છે. અમે વેલિંગ્ટન ટેસ્ટ માટે બે સ્વિંગ બોલર અને બે સીમ બોલર પસંદ કર્યા છે. અમે દરેક દિવસને ધ્યાનમાં રાખીને ટીમ પસંદ કરી છે." સિતાંશુ કોટકે રવિન્દ્ર જાડેજાની જગ્યાએ વોશિંગ્ટન સુંદરની પસંદગી અંગે પણ જણાવ્યું. તેણે કહ્યું કે ન્યુઝીલેન્ડમાં ડાબા હાથના બેટ્સમેનોની સંખ્યા મોટી છે, જેના કારણે સુંદરને ટીમમાં સ્થાન મળ્યું.
ન્યુઝીલેન્ડના નામે રહ્યો પ્રથમ દિવસ
વેલિંગ્ટન ટેસ્ટનો પ્રથમ દિવસ ન્યુઝીલેન્ડના નામે રહ્યો. ટીમે માત્ર 70 રનમાં પાંચ વિકેટ ગુમાવી દીધી હતી, પરંતુ હેનરી નિકલ્સે પછી સદી સાથે રમત પલટી નાખી. તેણે ગ્લેન ફિલિપ્સ સાથે 173 રનની પાર્ટનરશિપ કરીને દિવસની રમતનો અંત લાવ્યો અને ન્યુઝીલેન્ડ પાંચ વિકેટે 243 રન સુધી પહોંચવામાં સફળ રહ્યું. ભારતીય બોલર્સમાં બુમરાહે સૌથી વધુ ત્રણ વિકેટ લીધી. કંબોજ અને આકાશ દીપે એક-એક વિકેટ લીધી.








