રણજીમાં વિરાટ કોહલીને જોવાના ક્રેઝમાં ઘાયલ થયા ફેન્સ, અરુણ જેટલી સ્ટેડિયમની બહાર એકઠી થઈ ભીડ

ટીમ ઈન્ડિયાનો સ્ટાર બેટ્સમેન વિરાટ કોહલી રણજી ટ્રોફીમાં દિલ્હી માટે મેચ રમતો જોવા મળી રહ્યો છે. ફેન્સ ઘરેલું ક્રિકેટમાં તેની વાપસીની આતુરતાથી રાહ જોઈ રહ્યા હતા. તેને મેદાન પર જોવા માટે ફેન્સ મોટી સંખ્યામાં સ્ટેડિયમ પર પહોંચી રહ્યા છે. આ દરમિયાન અરુણ જેટલી સ્ટેડિયમમાં નાસભાગ મચી ગઈ.

સ્ટેડિયમની અંદર જવા માટે થઈ ધક્કા-મુક્કી

વિરાટ કોહલીની એક ઝલક મેળવવા માટે મોટી સંખ્યામાં ફેન્સ સ્ટેડિયમ પહોંચી રહ્યા છે. આ દરમિયાન, લોકો સ્ટેડિયમની અંદર જવા માટે એકબીજાને ધક્કો મારી રહ્યા હતા, જેના કારણે કેટલાક લોકો ઘાયલ પણ થયા હતા. આ દરમિયાન પોલીસની બાઈકને પણ નુકસાન થયું હતું.

દિલ્હી પોલીસના જણાવ્યા અનુસાર, શરૂઆતમાં સ્ટેડિયમમાં પ્રવેશ માટે ફક્ત એક જ ગેટ ખોલવામાં આવ્યો હતો, જેના કારણે લોકોને મુશ્કેલીઓનો સામનો કરવો પડ્યો હતો. બાકીના ગેટ બાદમાં ખોલવામાં આવ્યા હતા. હાલમાં પરિસ્થિતિ સંપૂર્ણપણે સામાન્ય છે.

સ્ટેડિયમમાં પ્રવેશ ફ્રી છે

દિલ્હી ડિસ્ટ્રિક્ટ ક્રિકેટ એસોસિએશને આ મેચને લઈને એક મોટો નિર્ણય લીધો હતો. એસોસિએશને ફેન્સ માટે પ્રવેશ ફ્રી રાખ્યો છે. જોકે, ફેન્સે સ્ટેડિયમમાં પ્રવેશવા માટે પોતાનું આધાર કાર્ડ લાવવું પડશે. આ સાથે, એક ફોટો કોપી પણ લાવવી પડશે જેથી ચકાસણી થઈ શકે. ગૌતમ ગંભીર સ્ટેન્ડ ફેન્સ માટે ખુલ્લું મૂકવામાં આવ્યું છે.

દિલ્હીએ ટોસ જીતીને બોલિંગ કરવાનો નિર્ણય લીધો

અરુણ જેટલી સ્ટેડિયમમાં રમાઈ રહેલી મેચમાં, દિલ્હીના કેપ્ટન બદોનીએ ટોસ જીતીને પ્રથમ બોલિંગ કરવાનો નિર્ણય લીધો હતો. વિરાટ કોહલી લગભગ 12 વર્ષ પછી ઘરેલુ ક્રિકેટ રમતો જોવા મળી રહ્યો છે. આ મેચમાં વિરાટ કોહલી નંબર 4 પર બેટિંગ કરતો જોવા મળશે.

બંને ટીમો

રેલ્વે: અંચિત યાદવ, વિવેક સિંહ, સૂરજ આહુજા (કેપ્ટન), ઉપેન્દ્ર યાદવ (વિકેટ કીપર), મોહમ્મદ સૈફ, ભાર્ગવ મેરાઈ, કર્ણ શર્મા, રાહુલ શર્મા, હિમાંશુ સાંગવાન, અયાન ચૌધરી, કુણાલ યાદવ.

દિલ્હી: અર્પિત રાણા, સનત સાંગવાન, વિરાટ કોહલી, યશ ધુલ, આયુષ બદોની (કેપ્ટન), પ્રણવ  રઘુવંશી (વિકેટકીપર), સુમિત માથુર, શિવમ શર્મા, નવદીપ સૈની, મણિ ગ્રેવાલ, સિદ્ધાંત શર્મા.