IND vs SA / ભારતીય કપ્તાન શુભમન ગિલ ICUમાં દાખલ, કોલકાતા ટેસ્ટમાં પંત કરી રહ્યો છે કેપ્ટનશિપ
છેલ્લું અપડેટ : 16 Nov 2025
ભારતીય ટીમના કેપ્ટન શુભમન ગિલની તબિયત 15 નવેમ્બર, શનિવારે રાત્રે અચાનક બગડી ગઈ હતી. ગરદનમાં દુખાવાની ફરિયાદ બાદ તેને કોલકાતાની વુડલેન્ડ્સ હોસ્પિટલમાં દાખલ કરવામાં આવ્યો હતો. ગિલને ગરદનમાં ખૂબ દુઃખાવો છે જેના કારણે તેને ICUમાં દાખલ કરાયો છે.
પ્રથમ ટેસ્ટના બીજા દિવસે બેટિંગ કરતી વખતે ગરદનમાં ઝટકો લાગવાથી તે રિટાયર્ડ હર્ટ થયો હતો. આ પછી BCCI એ ગિલના સ્વાસ્થ્ય અંગે અપડેટ આપ્યું છે. ગિલ હવે પ્રથમ ટેસ્ટમાંથી બહાર થઈ ગયો છે. હવે એવું માનવામાં આવે છે કે 22 નવેમ્બરથી ગુવાહાટીમાં રમાનારી બીજી ટેસ્ટમાં પણ તેનું રમવું શંકાસ્પદ છે.
શુભમન ગિલને ઈજા કેવી રીતે થઈ?
26 વર્ષીય શુભમન ગિલને સિમોન હાર્મરની બોલિંગ દરમિયાન ઝટકો લાગ્યો, જેના પછી તેને ગરદનમાં દુખાવો થયો. શરૂઆતમાં, ઈજા ગંભીર નહતી લાગી અને ફિઝિયોએ તાત્કાલિક સારવાર આપી હતી, પરંતુ પછી તેની સ્થિતિ વધુ ખરાબ થઈ ગઈ હતી.
સાંજ સુધીમાં દુખાવો એટલો વધી ગયો હતો કે તેને સ્ટ્રેચર પર સ્ટેડિયમની બહાર લઈ જવો પડ્યો. તેની ગરદનને સપોર્ટ આપવા માટે સર્વાઈકલ કોલર લગાવવામાં આવ્યો હતો અને તબીબી ટીમે તેને તાત્કાલિક હોસ્પિટલમાં દાખલ કર્યો હતો.
એક અહેવાલ મુજબ, ગિલના અનેક ટેસ્ટ કરવામાં આવ્યા હતા અને સ્નાયુઓમાં ખેંચાણ ઘટાડવા માટે દવા આપવામાં આવી હતી. તેને આખી રાત નિરીક્ષણ હેઠળ રાખવામાં આવ્યો હતો. પ્રારંભિક સંકેતો સૂચવે છે કે તેને સ્વસ્થ થવામાં થોડા દિવસો લાગી શકે છે, જેના કારણે આગામી ટેસ્ટમાં તેના રમવાની શક્યતા ખૂબ જ ઓછી છે.
રિષભ પંત કેપ્ટન બન્યો
સાઉથ આફ્રિકાએ બીજી ઈનિંગમાં બેટિંગ શરૂ કરી ત્યારે રિષભ પંતને કાર્યકારી કેપ્ટન તરીકે નિયુક્ત કરવામાં આવ્યો હતો. આ સ્પષ્ટપણે દર્શાવે છે કે ટીમ મેનેજમેન્ટ ગિલના પાછા ફરવાની અપેક્ષા નથી રાખતું.
મોર્ને મોર્કેલનું નિવેદન
મેચના બીજા દિવસના અંતે પ્રેસ કોન્ફરન્સમાં, બોલિંગ કોચ મોર્ને મોર્કેલે જણાવ્યું હતું કે ઈજા ભારે વર્કલોડને કારણે થઈ હોય તેવું લાગતું નથી. તેણે કહ્યું, "પહેલા આપણે એ સમજવાની જરૂર છે કે તેને ગરદનની સમસ્યા કેવી રીતે થઈ. શક્ય છે કે તેને ગઈકાલે રાત્રે સારી ઊંઘ ન આવી હોય. તે ખૂબ જ ફિટ ખેલાડી છે અને પોતાની જાતનું સારી રીતે ધ્યાન રાખે છે."
BCCIએ આપ્યું અપડેટ
BCCI એ એક નિવેદન પણ બહાર પાડ્યું જેમાં કહેવામાં આવ્યું હતું કે કેપ્ટન શુભમન ગિલને કોલકાતામાં સાઉથ આફ્રિકા સામે ચાલી રહેલી ટેસ્ટના બીજા દિવસે ગરદનમાં ઈજા થઈ હતી. દિવસની રમત પછી તેને ટેસ્ટ માટે હોસ્પિટલમાં લઈ જવામાં આવ્યો હતો.
તેઓ હાલમાં હોસ્પિટલમાં નિરીક્ષણ હેઠળ છે. તે હવે આ ટેસ્ટ મેચમાં ભાગ નહીં લે. BCCI મેડિકલ ટીમ તેનું નિરીક્ષણ કરી રહી છે.
