U19 World Cup 2026 / પાકિસ્તાન સામેની મેચ પહેલા સચિન તેંડુલકરે ભારતના યુવા ખેલાડીઓને આપ્યો ગુરુ મંત્ર
છેલ્લું અપડેટ : 31 Jan 2026
અંડર-19 વર્લ્ડ કપમાં 1 ફેબ્રુઆરીએ ભારત અને પાકિસ્તાન વચ્ચે મહામુકાબલો રમાશે. આ વર્લ્ડ કપમાં બંને ટીમો પહેલીવાર એકબીજા સામે ટકરાશે. આ મહત્ત્વપૂર્ણ મેચ પહેલા ક્રિકેટના ભગવાન તરીકે ઓળખાતા સચિન તેંડુલકરે ભારતીય ખેલાડીઓ સાથે વાત કરી અને તેમને ગુરુ મંત્ર આપ્યો. ભારતીય ટીમ હાલમાં ઉત્તમ ફોર્મમાં છે, તેણે આ ટુર્નામેન્ટમાં અત્યાર સુધી બધી મેચ જીતી છે. આયુષ મ્હાત્રેની કેપ્ટનશિપ હેઠળ,ભારતીય ટીમ તમામ વિભાગોમાં શાનદાર પ્રદર્શન કરી રહી છે.
ઈંગ્લેન્ડ ગ્રુપ Bમાંથી સેમીફાઈનલમાં આગળ વધ્યું
ઈંગ્લેન્ડે શુક્રવારે ન્યુઝીલેન્ડને હરાવીને સેમીફાઈનલમાં પોતાનું સ્થાન સુરક્ષિત કરી લીધું છે. આનાથી ભારત અને પાકિસ્તાન વચ્ચે રવિવારની મેચ વધુ મહત્ત્વપૂર્ણ બની ગઈ છે. ગ્રુપ Bમાંથી હવે ફક્ત એક જ ટીમ સેમીફાઈનલ માટે ક્વોલિફાય થશે. આવી સ્થિતિમાં ભારતીય ટીમ પાકિસ્તાનને હરાવીને સેમીફાઈનલમાં પોતાનું સ્થાન સુરક્ષિત કરવા માંગશે. સચિન તેંડુલકરે પાકિસ્તાન સામેની મહત્ત્વપૂર્ણ મેચ પહેલા અંડર-19 વર્લ્ડ કપમાં ભાગ લઈ રહેલા ભારતીય ખેલાડીઓ સાથે વર્ચ્યુઅલી વાતચીત કરી હતી.
BCCIએ સચિન તેંડુલકર સાથેની વાતચીતના ફોટો શેર કર્યા
ભારતીય ક્રિકેટ કંટ્રોલ બોર્ડ (BCCI) એ X પર વર્ચ્યુઅલ મીટિંગના ફોટો શેર કરતા લખ્યું કે, "આ અનુભવ અત્યંત મૂલ્યવાન હતો, જેમાં આગામી પેઢીને બદલાતી રમતમાં સફળતા અને લાંબા કારકિર્દી માટે મૂલ્યવાન જાણકારી અને દૃષ્ટિકોણ મળ્યા." BCCIએ વધુમાં લખ્યું હતું કે, "વાતચીત ફક્ત ટેકનિકલ કૌશલ્ય અને ફિટનેસ સુધી મર્યાદિત નહતી, પરંતુ સફળતા છતાં એકાગ્રતા, શિસ્ત, નમ્રતા અને સ્થિર રહેવાના મહત્ત્વ પર પણ ભાર મૂકવામાં આવ્યો હતો."
ભારતે પ્રથમ સુપર સિક્સ મેચમાં શાનદાર જીત મેળવી
ઈંગ્લેન્ડે ન્યુઝીલેન્ડ સામે 65 રનથી વિજય મેળવીને સેમીફાઈનલમાં સ્થાન મેળવ્યું છે. બીજી અફઘાનિસ્તાને પણ આયર્લેન્ડને 191 રનથી હરાવ્યું હતું. આ સ્થિતિમાં ભારત અને પાકિસ્તાન વચ્ચે રવિવારની મેચ નોકઆઉટ મેચ બની ગઈ છે, કારણ કે ગ્રુપ Bમાંથી હવે ફક્ત એક જ ટીમ સેમીફાઈનલમાં આગળ વધશે. ભારતે અગાઉ ક્વીન્સ સ્પોર્ટ્સ ક્લબ ખાતે પોતાની પહેલી સુપર સિક્સ મેચમાં ઝિમ્બાબ્વે સામે 204 રન મોટી જીત મેળવી હતી. આ મેચમાં વિહાન મલ્હોત્રાની શાનદાર સદી અને અભિજ્ઞાન કુંડુની શાનદાર અડધી સદીએ ભારતને સરળ જીત મેળવવામાં મદદ કરી હતી. ભારત અને પાકિસ્તાન વચ્ચેની મેચ દરમિયાન ફરી એકવાર બધાની નજર વૈભવ સૂર્યવંશી પર રહેશે.
