પેરિસ પેરાલિમ્પિકમાં ભારતને મળ્યો 21મો મેડલ, શોટપુટ ઈવેન્ટમાં સચિન ખિલારીએ જીત્યો સિલ્વર

પેરિસ પેરાલિમ્પિકના 7મા દિવસે, ભારતના સચિન ખિલારીએ મેન્સ શોટપુટ F46 કેટેગરીમાં સિલ્વર મેડલ જીત્યો છે. આ આજનો પ્રથમ મેડલ છે. આ સિલ્વર મેડલ જીતવા સાથે, સચિન 40 વર્ષ બાદ પેરાલિમ્પિક શોટપુટ મેડલ જીતનાર પ્રથમ ભારતીય પુરૂષ એથ્લેટ બની ગયો છે. અગાઉ 1984માં ભારતે મેન્સ શોટપુટમાં પહેલો મેડલ જીત્યો હતો. સચિનના આ મેડલ સાથે ભારતના મેડલની સંખ્યા 21 થઈ ગઈ છે. સચિન 16.32 મીટરના એશિયન રેકોર્ડ થ્રો સાથે બીજા ક્રમે રહ્યો હતો. કેનેડાના ગ્રેગ સ્ટુઅર્ટે ગોલ્ડ મેડલ જીત્યો હતો. બ્રોન્ઝ મેડલ ક્રોએશિયાના લુકા બાકોવિકને મળ્યો હતો. સચિને અગાઉ વર્લ્ડ પેરા એથ્લેટિક્સ ચેમ્પિયનશિપ 2024માં એશિયન રેકોર્ડ સાથે ગોલ્ડ મેડલ જીત્યો હતો.

34 વર્ષીય એથ્લેટે તેના બીજા પ્રયાસમાં પોતાનું સર્વશ્રેષ્ઠ પ્રદર્શન કર્યું અને પોતાનો જ 16.30 મીટરનો એશિયન રેકોર્ડ તોડ્યો. તેણે મે 2024માં જાપાનમાં યોજાયેલી વર્લ્ડ પેરા-એથ્લેટિક્સ ચેમ્પિયનશિપમાં ગોલ્ડ મેડલ જીતીને આ રેકોર્ડ બનાવ્યો હતો. ખિલારીનો સિલ્વર મેડલ ચાલુ પેરા ગેમ્સમાં પેરા-એથ્લેટિક્સમાં જીતેલો 11મો મેડલ છે. તેણે ગયા વર્ષે ચીનમાં યોજાયેલી એશિયન પેરા ગેમ્સમાં પણ ગોલ્ડ મેડલ જીત્યો હતો. F46 કેટેગરી એ એથ્લેટ્સ માટે છે જેમના હાથમાં નબળાઈ હોય, નબળા સ્નાયુઓ હોય અથવા તેમના હાથમાં હલનચલનનો અભાવ હોય. આમાં, એથ્લેટ ઉભા રહીને સ્પર્ધા કરે છે.