VIDEO: IND vs AFG / રોહિત શર્માએ આપ્યું તેની ફિટનેસનું સબૂત, ત્રીજી ODIમાં સ્લિપમાં ઝડપ્યા ત્રણ અદ્ભુત કેચ
છેલ્લું અપડેટ : 21 Jun 2026
ભારત અને અફઘાનિસ્તાન વચ્ચે શનિવારે એટલે કે 20 જૂન 2026ના રોજ રમાયેલી ODI સિરીઝની ત્રીજી મેચમાં ભારતીય ટીમના અનુભવી સ્ટાર બેટર રોહિત શર્માએ પોતાની શાનદાર ફિલ્ડિંગથી બધાને આશ્ચર્યચકિત કરી દીધા છે. 39 વર્ષીય રોહિત શર્માએ સ્લિપમાં સતત 3 અદ્ભુત કેચ પકડીને સાબિત કરી દીધું છે કે, ઉંમર વધવા છતાં તેની ફિટનેસ, રિફ્લેક્સિસ અને ચપળતા આજે પણ યુવા ખેલાડીઓ જેવી જ મજબૂત છે.
ચેન્નાઈના ઐતિહાસિક એમ.એ. ચિદમ્બરમ સ્ટેડિયમ ખાતે રમાયેલી આ મેચમાં રોહિત શર્માએ જે ત્રણેય કેચ ઝડપ્યા, તે તમામ ભારતના ઘાતક ફાસ્ટ બોલર પ્રસિદ્ધ કૃષ્ણાની ઓવરમાં આવ્યા હતા. પ્રસિદ્ધની ધારદાર બોલિંગ અને સ્લિપમાં રોહિતની અઅદ્ભુત જુગલબંદીએ અફઘાનિસ્તાનના ટોપ ઓર્ડર બેટિંગ લાઈનઅપને સંપૂર્ણપણે ધ્વસ્ત કરી નાખ્યો હતો.
પ્રસિદ્ધ કૃષ્ણાની તોફાની બોલિંગ અને રોહિતનો ક્લાસ
અફઘાનિસ્તાનની ઈનિંગની શરૂઆતથી જ ભારતીય ફાસ્ટ બોલર્સે દબાણ બનાવવાનું શરૂ કર્યું હતું. પાવરપ્લે દરમિયાન પ્રસિદ્ધ કૃષ્ણાએ અફઘાન ઓપનર રહમાનુલ્લાહ ગુરબાઝને એક્સ્ટ્રા બાઉન્સથી મુશ્કેલીમાં મૂક્યો હતો. બોલ બેટની બહારની સાઇડને સ્પર્શીને ફર્સ્ટ સ્લિપ તરફ ગયો, જ્યાં ઉભેલા રોહિત શર્માએ કોઈ ભૂલ કર્યા વગર અત્યંત સરળતાથી કેચ ઝડપી લીધો હતો.
ત્યારબાદ અનુભવી બેટર રહમત શાહ ક્રીઝ પર આવ્યો હતો. એક સરસ ચોગ્ગો ફટકાર્યા બાદ તે સેટ થતો દેખાઈ રહ્યો હતો, પરંતુ પ્રસિદ્ધ કૃષ્ણાએ તેને વધુ સમય પિચ પર ટકવા નહતો દીધો. ઓફ સ્ટમ્પની બહાર જતી પ્રસિદ્ધની એક શાનદાર લેન્થ બોલ રહમત શાહના બેટની કિનારી લઈને સીધી સ્લિપમાં ગયો અને રોહિત શર્માએ પોતાના શાનદાર રિફ્લેક્સિસ બતાવીને બીજો કેચ ઝડપી ભારતને મોટી સફળતા અપાવી હતી.
અફઘાનિસ્તાનની ટીમ હજુ આ બે મોટા ઝટકાઓમાંથી બહાર આવે તે પહેલા જ પ્રસિદ્ધ કૃષ્ણાએ ઈબ્રાહિમ ઝદરાનને પણ પોતાની જાળમાં ફસાવી લીધો હતો. ઝદરાનના બેટનો મોટો કિનારો લઈને બોલ સ્લિપ તરફ હવામાં ગયો અને ત્યાં હાજર રોહિત શર્માએ ડાઇવ લગાવીને સતત ત્રીજો કેચ ઝડપી લેતા સ્ટેડિયમમાં હાજર હજારો દર્શકો રોહિત-રોહિતના નારા લગાવવા લાગ્યા હતા.
પાવરપ્લેમાં અફઘાનિસ્તાન ઘૂંટણિયે
પ્રસિદ્ધ કૃષ્ણાનો કહેર અહીં જ અટક્યો નહોતો. તેણે પાવરપ્લે દરમિયાન જ અફઘાનિસ્તાનને ચોથો મોટો ઝટકો આપ્યો, જ્યારે યુવા બેટર દરવિશ રસૂલીને શ્રેયસ અય્યરના હાથે કેચ આઉટ કરાવીને પવેલિયન ભેગો કર્યો હતો. રોહિત શર્માની શાનદાર કેચિંગ અને પ્રસિદ્ધની આ તોફાની બોલિંગના કારણે ભારતે મેચની શરૂઆતની 10 ઓવરમાં જ અફઘાનિસ્તાન પર સંપૂર્ણ સકંજો કસી લીધો હતો.
ODI ક્રિકેટમાં પ્રથમ 10 ઓવરમાં 4 કે તેથી વધુ વિકેટ લેનારા ભારતીય બોલર્સ
આ શાનદાર સ્પેલ સાથે પ્રસિદ્ધ કૃષ્ણાએ ODI ક્રિકેટના પ્રથમ પાવરપ્લે (10 ઓવર) માં 4 કે તેથી વધુ વિકેટ ઝડપનારા ભારતના દિગ્ગજ બોલર્સ ક્લબમાં પોતાનું નામ નોંધાવી દીધું છે:
- મોહમ્મદ સિરાજ - 5 વિકેટ vs શ્રીલંકા (કોલંબો) 2023
- જવાગલ શ્રીનાથ - 4 વિકેટ vs શ્રીલંકા (જોહાનિસબર્ગ) 2003
- ભુવનેશ્વર કુમાર - 4 વિકેટ vs શ્રીલંકા (પોર્ટ ઓફ સ્પેન) 2013
- જસપ્રીત બુમરાહ - 4 વિકેટ vs ઈંગ્લેન્ડ (ધ ઓવલ) 2022
- મોહમ્મદ સિરાજ - 4 વિકેટ vs શ્રીલંકા (તિરુવનંતપુરમ) 2023
- અર્શદીપ સિંહ - 4 વિકેટ vs સાઉથ આફ્રિકા (જોહાનિસબર્ગ) 2023
- પ્રસિદ્ધ કૃષ્ણા - 4 વિકેટ vs અફઘાનિસ્તાન (ચેન્નાઈ) 2026
