IPL 2027 પહેલા મુંબઈ ઈન્ડિયન્સને મળ્યો નવો હેડ કોચ, ટીમનો પૂર્વ ખેલાડી સંભાળશે મોટી જવાબદારી
IPL 2027 પહેલા મુંબઈ ઈન્ડિયન્સમાં પરિવર્તનનો સમયગાળો શરૂ થયો છે. થોડા દિવસો પહેલા MIએ જાહેરાત કરી હતી કે મહેલા જયવર્ધનેનો હેડ કોચ તરીકેનો કાર્યકાળ સમાપ્ત થઈ રહ્યો છે. બધાને પ્રશ્ન થયો હતો કે મુંબઈ ઈન્ડિયન્સ તેના નવા હેડ કોચ તરીકે કોને નિયુક્ત કરશે. હવે મુંબઈ ઈન્ડિયન્સે સત્તાવાર રીતે તેના નવા હેડ કોચની જાહેરાત કરી છે. પાંચ વખતનો IPL ચેમ્પિયન કિરોન પોલાર્ડ MI કોચ કરશે. પોલાર્ડ વર્ષોથી મુંબઈ ફ્રેન્ચાઈઝી સાથે સંકળાયેલો છે અને હવે તેને એક મોટી જવાબદારી સોંપવામાં આવી છે.
મુંબઈ ઈન્ડિયન્સે નવા કોચની જાહેરાત કરી
મહેલા જયવર્ધનેના કાર્યકાળ દરમિયાન મુંબઈ ઈન્ડિયન્સે ત્રણ વખત IPL ટ્રોફી જીતી હતી. જોકે, MI અને મહેલાએ પરસ્પર સંમતિથી અલગ થવાનો નિર્ણય લીધો. મુંબઈ ઈન્ડિયન્સે સોશિયલ મીડિયા દ્વારા જાહેરાત કરી કે કિરોન પોલાર્ડને બેટિંગ કોચમાંથી હેડ કોચ બનાવવામાં આવ્યો છે. MIના માલિક નીતા અંબાણીએ પોલાર્ડને હેડ કોચ તરીકે નિયુક્ત કરવા પર કહ્યું, "કિરોન પોલાર્ડ 22 વર્ષીય ખેલાડી તરીકે મુંબઈ ઈન્ડિયન્સમાં જોડાયો હતો અને છેલ્લા 16 વર્ષોમાં તે અમારા પરિવારનો એક અભિન્ન ભાગ બની ગયો છે."
અંબાણીએ વધુમાં ઉમેર્યું, "એક ખેલાડી તરીકે તેણે અમને ઘણી યાદગાર ક્ષણો આપી છે. કોચ તરીકે તે રમત પ્રત્યેનો પોતાનો અનુભવ અને સમજ શેર કરવાનું ચાલુ રાખે છે. હેડ કોચ તરીકે તેને આ નવી જવાબદારી સંભાળતા જોઈને અમને આનંદ થાય છે. પોલાર્ડ MI જર્સી પહેરીને ટીમ માટે રમવાનું મહત્ત્વ સમજે છે. મને વિશ્વાસ છે કે તે તેની નવી ભૂમિકામાં એ જ આત્મવિશ્વાસ અને પ્રતિબદ્ધતા લાવશે. હું તેને ટીમના આ નવા પ્રકરણમાં દરેક સફળતાની શુભેચ્છા પાઠવું છું."
MI સાથે કિરોન પોલાર્ડની સફર કેવી રહી છે?
કિરોન પોલાર્ડ IPL 2010માં મુંબઈ ઈન્ડિયન્સ સાથે જોડાયો હતો. તે પછી, તે 13 વર્ષ સુધી MI સાથે ખેલાડી તરીકે રહ્યો. MI માટે રમતી વખતે પોલાર્ડે 189 મેચોમાં 3,412 રન બનાવ્યા અને 69 વિકેટ લીધી. પોલાર્ડે 2013, 2015, 2017, 2019 અને 2020માં મુંબઈ ઈન્ડિયન્સની ટાઈટલ જીતમાં મુખ્ય ભૂમિકા ભજવી હતી.
કિરોન પોલાર્ડે 2022 IPL પછી નિવૃત્તિ લેવાનો નિર્ણય લીધો. ત્યારબાદ તે મુંબઈ ઈન્ડિયન્સનો બેટિંગ કોચ બન્યો. ચાર વર્ષ સુધી આ ભૂમિકામાં રહ્યા બાદ તેને હવે હેડ કોચ તરીકે બઢતી આપવામાં આવી છે.
