IND vs AUS / ત્રીજી ODIમાં રોહિત શર્માએ પૂર્ણ કરી ખાસ સદી, દિગ્ગજ ખેલાડીઓના ક્લબમાં મારી એન્ટ્રી
છેલ્લું અપડેટ : 25 Oct 2025
ભારત અને ઓસ્ટ્રેલિયા વચ્ચે ત્રીજી ODI રમાઈ રહી છે. આ મેચમાં ઓસ્ટ્રેલિયાએ પહેલા બેટિંગ કરતા 236 રન બનાવ્યા છે. ભારતીય બોલિંગ એટેકે શાનદાર પ્રદર્શન કર્યું, અને ટીમ ફિલ્ડર્સે પણ તેમને સાથે આપતા શાનદાર કેચ ઝડપ્યા. શ્રેયસ અય્યર, વિરાટ કોહલી અને રોહિત શર્માએ તેમની ફિલ્ડિંગથી પ્રભાવિત કર્યા.
રોહિત શર્માએ ODI ક્રિકેટમાં પોતાનો 100મો કેચ ઝડપ્યો
રોહિત શર્માએ ઓસ્ટ્રેલિયા સામેની ત્રીજી ODIમાં 2 કેચ ઝડપ્યા. તેણે હર્ષિત રાણાના બોલ પર મિચેલ ઓવેનનો કેચ લીધો, જે એક રન બનાવીને આઉટ થયો હતો. ત્યારબાદ તેણે પ્રસિદ્ધ કૃષ્ણાના બોલ પર નાથન એલિસને કેચ આઉટ કરાવ્યો, જે 16 રન બનાવીને આઉટ થયો હતો. આ 2 કેચ સાથે, રોહિતે ODI ક્રિકેટમાં એક ખાસ સદી પૂર્ણ કરી.
રોહિતે દિગ્ગજોના ક્લબમાં પ્રવેશ કર્યો
રોહિત શર્મા ભારત માટે 100 કે તેથી વધુ કેચ લેનાર છઠ્ઠો ભારતીય ખેલાડી બન્યો છે. તેની પહેલા, વિરાટ કોહલી, મોહમ્મદ અઝહરુદ્દીન, સચિન તેંડુલકર, રાહુલ દ્રવિડ અને સુરેશ રૈનાએ આ સિદ્ધિ મેળવી છે. હવે, રોહિત દિગ્ગજોના ક્લબમાં પ્રવેશ કરી ચૂક્યો છે.
ભારત માટે ODI ક્રિકેટમાં સૌથી વધુ કેચ લેનારા ફિલ્ડર્સ
- વિરાટ કોહલી - 163
- મોહમ્મદ અઝહરુદ્દીન - 156
- સચિન તેંડુલકર - 140
- રાહુલ દ્રવિડ - 124
- સુરેશ રૈના - 102
- રોહિત શર્મા - 100
વિરાટ કોહલીએ જેક્સ કાલિસને પાછળ છોડી દીધો
વિરાટ કોહલીએ પણ મેચમાં 2 કેચ ઝડપ્યા હતા. તેણે મેથ્યુ શોર્ટ અને કૂપર કોનોલીના કેચ ઝડપ્યા હતા, અને આ સાથે તેણે આંતરરાષ્ટ્રીય ક્રિકેટમાં કેચ ઝડપવાના સંદર્ભમાં સાઉથ આફ્રિકાના દિગ્ગજ જેક્સ કાલિસને પાછળ છોડી દીધો. આંતરરાષ્ટ્રીય ક્રિકેટમાં કોહલીના નામે હવે 339 કેચ છે, જ્યારે જેક્સ કાલિસે આંતરરાષ્ટ્રીય ક્રિકેટમાં 338 કેચ ઝડપ્યા છે.
