IND vs SL / રિષભ પંતે એડમ ગિલક્રિસ્ટનો મોટો રેકોર્ડ તોડ્યો, સૌથી વધુ છગ્ગા મારનારા ટોપ 3 ખેલાડીઓની યાદીમાં પ્રવેશ્યો
છેલ્લું અપડેટ : 24 Aug 2026
ભારત અને શ્રીલંકા વચ્ચેની કોલંબો ટેસ્ટમાં રિષભ પંતે પોતાની વિસ્ફોટક બેટિંગથી એક મોટો રેકોર્ડ તોડ્યો છે. પંત ટેસ્ટ ક્રિકેટમાં આક્રમક બેટિંગ માટે જાણીતો છે. રિષભે શ્રીલંકા સામેની કોલંબો ટેસ્ટમાં પણ શાનદાર બેટિંગ દર્શાવી હતી. પંતે બીજા દિવસે ઓસ્ટ્રેલિયન ક્રિકેટ દિગ્ગજ એડમ ગિલક્રિસ્ટનો રેકોર્ડ તોડ્યો અને હવે ટેસ્ટ ક્રિકેટમાં સૌથી વધુ છગ્ગા મારનારા ટોપ 3 ખેલાડીઓની યાદીમાં પ્રવેશ કર્યો.
રિષભ પંતે એડમ ગિલક્રિસ્ટને પાછળ છોડી દીધો
એડમ ગિલક્રિસ્ટ વર્ષોથી ટેસ્ટ ક્રિકેટમાં સૌથી વધુ છગ્ગા મારનારા નંબર 3 સ્થાન પર હતો. તેણે 97 મેચમાં કુલ 100 છગ્ગા ફટકાર્યા હતા. પાછલી મેચમાં રિષભ પંતે પોતાની ટેસ્ટ કારકિર્દીનો 100મો છગ્ગો માર્યો હતો. આ સાથે, તે 100 છગ્ગા મારનાર પ્રથમ ભારતીય ટેસ્ટ ક્રિકેટર બન્યો હતો. તેણે ઓસ્ટ્રેલિયાના એડમ ગિલક્રિસ્ટની બરાબરી કરી હતી. હવે પંતે આ દિગ્ગજને પાછળ છોડી દીધો છે.
શ્રીલંકા સામેની કોલંબો ટેસ્ટમાં રિષભ પંતે પહેલી ઈનિંગમાં બે છગ્ગા ફટકાર્યા છે. આ સાથે તેણે ગિલક્રિસ્ટને પાછળ છોડી દીધો છે. હવે તેણે ટેસ્ટ ક્રિકેટમાં કુલ 102 છગ્ગા ફટકાર્યા છે. નોંધપાત્ર વાત એ છે કે, ગિલક્રિસ્ટે 100 છગ્ગાનો આંકડો પૂર્ણ કરવા માટે 97 મેચનો સમય લીધો હતો, જ્યારે રિષભ પંત ફક્ત 52 મેચમાં 102 છગ્ગા ફટકારી ચૂક્યો છે. તે હવે ટેસ્ટ ઇતિહાસમાં સૌથી વધુ છગ્ગા મારનારા ખેલાડીઓની યાદીમાં ત્રીજા સ્થાને પહોંચી ગયો છે. રિષભ પંત પછી, ટેસ્ટ ક્રિકેટમાં સૌથી વધુ છગ્ગા મારનાર ભારતીય ખેલાડી વીરેન્દ્ર સેહવાગ છે, જેણે 104 ટેસ્ટ મેચમાં 91 છગ્ગા ફટકાર્યા છે.
ટેસ્ટ ઈતિહાસમાં સૌથી વધુ છગ્ગા મારનારા 5 ખેલાડીઓ
ટેસ્ટ ક્રિકેટમાં સૌથી વધુ છગ્ગા મારનારા ખેલાડીઓની યાદીમાં બેન સ્ટોક્સ ટોપ પર છે. તેણે 122 મેચમાં 138 છગ્ગા ફટકાર્યા છે. બ્રેન્ડન મેક્કુલમ 107 છગ્ગા સાથે બીજા સ્થાને છે. રિષભ પંત જે રીતે બેટિંગ કરી રહ્યો છે, તે જોતાં તે ટૂંક સમયમાં આ બંને દિગ્ગજોને પાછળ છોડી શકે છે. ટેસ્ટ ક્રિકેટમાં સૌથી વધુ છગ્ગા મારનારા 5 ખેલાડીઓની યાદી નીચે મુજબ છે.
બેન સ્ટોક્સ (ઈંગ્લેન્ડ): 122 મેચ - 138 છગ્ગા
બ્રેન્ડન મેક્કુલમ (ન્યુઝીલેન્ડ): 101 મેચ - 107 છગ્ગા
રિષભ પંત (ભારત): 52 મેચ - 102* છગ્ગા
એડમ ગિલક્રિસ્ટ (ઓસ્ટ્રેલિયા): 93 મેચ - 100 છગ્ગા
ટિમ સાઉથી (ન્યુઝીલેન્ડ): 107 મેચ - 98 છગ્ગા
