RCBએ નવા હેડ કોચની કરી જાહેરાત, છેલ્લા 6 વર્ષથી સપોર્ટ સ્ટાફમાં નિભાવી રહ્યો હતો મહત્ત્વપૂર્ણ ભૂમિકા
છેલ્લું અપડેટ : 06 Nov 2025
હાલમાં દરેક ક્રિકેટ ફેનના મનમાં એક પ્રશ્ન છે કે IPL 2026 માટે તમામ ફ્રેન્ચાઈઝી ક્યા ખેલાડીને રિટેન કરશે અને કોને રિલીઝ કરશે. 2026માં IPLની 19મી સિઝન રમાશે. આ દરમિયાન તમને જણાવી દઈએ કે 2026માં WPL એટલે કે વિમેન્સ પ્રીમિયર લીગની ચોથી સિઝન પણ રમાશે, અને ટૂંક સમયમાં તેના માટે મેગા ઓક્શન યોજાશે. આ પહેલા 5 નવેમ્બરના રોજ WPLની પાંચેય ફ્રેન્ચાઈઝીઓએ તેમના રિટેન કરેલા ખેલાડીઓના નામ જાહેર કર્યા હતા. RCBની વિમેન્સ ટીમે ઓક્શન પહેલા ચાર ખેલાડીઓને રિટેન કરી હતી, જેમાં સ્મૃતિ મંધાના, એલિસ પેરી, રિચા ઘોષ અને શ્રેયંકા પાટિલનો સમાવેશ થાય છે. RCBએ તેની વિમેન્સ ટીમના નવા હેડ કોચની પણ જાહેરાત કરી છે, જે આગામી સિઝનથી આ ભૂમિકા સંભાળશે.
માલોલન રંગરાજન મુખ્ય કોચ તરીકે કાર્યભાર સંભાળશે
RCB ફ્રેન્ચાઈઝીએ માલોલન રંગરાજનને તેની વિમેન્સ ટીમના હેડ કોચ તરીકે નિયુક્ત કર્યો છે, જે છેલ્લા 6 વર્ષથી સપોર્ટ સ્ટાફ સાથે જોડાયેલ છે. તે લ્યુક વિલિયમ્સનું સ્થાન લેશે, જેણે RCB વિમેન્સ ટીમને તેના પ્રથમ WPL ટાઈટલ સુધી પહોંચાડ્યું હતું, પરંતુ તેની અન્ય કોચિંગ જવાબદારીઓને કારણે તેણે આ પદ છોડવાનો નિર્ણય લીધો હતો. માલોલન રંગરાજન અગાઉ RCB વિમેન્સ ટીમ માટે સ્કાઉટિંગના હેડ તરીકે સેવા આપી ચૂક્યો છે અને 2025માં ટીમ માટે આસિસ્ટન્ટ કોચ તરીકે પણ સેવા આપી હતી.
માલોલન રંગરાજનની કારકિર્દી વિશે વાત કરવામાં આવે, તો તેણે કુલ 47 ફર્સ્ટ-ક્લાસ મેચ રમી છે, જેમાં 136 વિકેટ લીધી છે અને 1,379 રન બનાવ્યા છે. તેની ફર્સ્ટ-ક્લાસ કારકિર્દી દરમિયાન તે તમિલનાડુ, ઉત્તરાખંડ અને સાઉથ ઝોન ટીમો માટે રમ્યો છે.
અન્યા શ્રુબસોલ પણ કોચિંગ સ્ટાફનો ભાગ છે
રોયલ ચેલેન્જર્સ બેંગલુરુ માટે WPL 2025ની સિઝન અપેક્ષા મુજબ નહતી રહી, જેના કારણે તેના કોચિંગ સ્ટાફમાં ફેરફારની અપેક્ષાઓ હતી. RCBએ આગામી સિઝન માટે ઈંગ્લેન્ડની વર્લ્ડ કપ વિજેતા ટીમની સભ્ય અન્યા શ્રુબસોલને પણ તેના સપોર્ટ સ્ટાફમાં ઉમેરી છે. તેના આગમનથી ટીમના બોલર્સને ઘણી મદદ મળશે, આગામી સિઝનમાં તેનો અનુભવ ટીમ માટે મહત્ત્વપૂર્ણ હશે.
