ભારત સામેની ટી20 સિરીઝ માટે ન્યૂઝીલેન્ડ ટીમની જાહેરાત, સ્ટાર ઓલરાઉન્ડર બહાર પણ ફાસ્ટ બોલરની વાપસી
છેલ્લું અપડેટ : 23 Sept 2026
ભારત અને ન્યૂઝીલેન્ડ વચ્ચે 22 ઓક્ટોબરથી 5 મેચોની ટી-20 સિરીઝ શરૂ થઈ રહી છે. આ માટે ન્યૂઝીલેન્ડ ક્રિકેટ ટીમની જાહેરાત કરી દેવામાં આવી છે. ઈજા થવાના કારણે સ્ટાર ખેલાડી રચિન રવિન્દ્ર આખી સિરીઝમાંથી બહાર થઈ ગયો છે, જ્યારે ફાસ્ટ બોલર એડમ મિલ્નેની ટીમમાં ફરીથી વાપસી થઈ છે. આ સિરીઝ માટે ભારતીય ટીમ ન્યૂઝીલેન્ડના પ્રવાસે જશે. આ ટી20 સિરીઝ માટે ન્યૂઝીલેન્ડે 16 સભ્યોની ટીમની જાહેરાત કરી છે.
માઈકલ બ્રેસવેલ અને એડમ મિલ્નેની વાપસી
ન્યૂઝીલેન્ડની આ 16 સભ્યોની T20 ટીમમાં T20 વર્લ્ડ કપમાં રમનારા 13 જૂના ખેલાડીઓને સામેલ કરવામાં આવ્યા છે. આ સિવાય ઈજામાંથી ઉભરીને સ્પિન ઓલરાઉન્ડર માઈકલ બ્રેસવેલ અને ફાસ્ટ બોલર એડમ મિલ્નેની ટીમમાં વાપસી થઈ છે. તો બીજી તરફ, ઈજાગ્રસ્ત હોવાના કારણે સ્ટાર ખેલાડી રચિન રવિન્દ્ર અને ફાસ્ટ બોલર બેન સીયર્સ આ સિરીઝનો ભાગ બની શક્યા નથી. બેવોન જેકબ્સને મિડલ ઓર્ડરમાં બેટિંગના એક વિકલ્પ તરીકે ટીમમાં સામેલ કરવામાં આવ્યો છે. તેણે અત્યાર સુધી 11 T20I મેચ રમી છે અને પોતાની છેલ્લી મેચમાં બાંગ્લાદેશ સામે અણનમ 62 રનની શાનદાર ઈનિંગ રમી હતી.
લોકી ફર્ગ્યુસન, મેટ હેનરી, કાઈલ જેમીસન પણ છે ટીમનો ભાગ
ફાસ્ટ બોલર એડમ મિલ્ને લગભગ એક વર્ષ પછી પોતાની પહેલી T20 ઈન્ટરનેશનલ મેચ રમશે. આ 5 મેચોની T20 સિરીઝ માટે તેને એક મજબૂત ફાસ્ટ બોલિંગ ટીમમાં સામેલ કરવામાં આવ્યો છે, જેમાં લોકી ફર્ગ્યુસન, મેટ હેનરી, કાઈલ જેમીસન, જેકબ ડફી, જેક ફોલ્ક્સ અને નાથન સ્મિથ જેવા બોલરો પણ હાજર છે. બીજી તરફ બેન સીયર્સ ઘૂંટીની (Ankle) ઈજાના કારણે આ સિરીઝમાંથી બહાર છે. મિલ્ને પોતાની છેલ્લી T20 મેચ જુલાઈ 2025 માં દક્ષિણ આફ્રિકા સામે રમી હતી.
ભારત વિરુદ્ધ ન્યૂઝીલેન્ડ ટી20 સિરીઝનું શિડ્યુલ
ભારત વિરુદ્ધ ન્યૂઝીલેન્ડ ટી20 સિરીઝની પહેલી મેચ 22 ઓક્ટોબરે ક્રાઈસ્ટચર્ચમાં અને બીજી મેચ 24 ઓક્ટોબરે પણ આ જ મેદાન પર રમાશે. આ પછી ત્રીજો મુકાબલો 27 ઓક્ટોબરે વેલિંગટન, ચોથો 30 ઓક્ટોબરે ઓકલેન્ડ અને છેલ્લી ટી-20 મેચ 1 નવેમ્બરે હેમિલ્ટનમાં રમાશે. ટી-20 સિરીઝ પૂરી થયા પછી 4 નવેમ્બરથી બંને ટીમો વચ્ચે 5 મેચોની વનડે સિરીઝ શરૂ થશે.
ભારત સામેની ટી20 સિરીઝ માટે ન્યૂઝીલેન્ડની સ્ક્વોડ
મિચેલ સેન્ટનર (કેપ્ટન), ફિન એલન, માઈકલ બ્રેસવેલ, માર્ક ચેપમેન, ડેવોન કોનવે, જેકબ ડફી, લોકી ફર્ગ્યુસન, જેક ફોલ્ક્સ, મેટ હેનરી, કાઈલ જેમીસન, એડમ મિલ્ને, ડેરિલ મિચેલ, ગ્લેન ફિલિપ્સ, ટિમ સાઈફર્ટ અને નાથન સ્મિથ.
