ચેન્નાઈના હારવા છતાં પણ એમએસ ધોનીએ બનાવ્યો ખાસ રેકોર્ડ, આ મામલે કરી એબી ડી વિલિયર્સની બરાબરી

IPL 2024ની 59મી મેચ ગુજરાત ટાઇટન્સ અને ચેન્નાઈ સુપર કિંગ્સ વચ્ચે રમાઈ હતી. અમદાવાદના નરેન્દ્ર મોદી સ્ટેડિયમમાં આ મેચનું આયોજન કરવામાં આવ્યું હતું. જ્યાં હોમ ટીમ ગુજરાત ટાઇટન્સે ચેન્નાઈ સુપર કિંગ્સને હરાવ્યું હતું. GTએ આ મેચ 35 રને જીતી હતી. આ મેચમાં હાર સાથે ચેન્નાઈ માટે પ્લેઓફમાં પ્રવેશવા માટે મુશ્કેલીઓ વધી ગઈ છે. ચેન્નાઈ સુપર કિંગ્સની ટીમ ભલે આ મેચ હારી ગઈ હોય, પરંતુ કરોડો ફેન્સના ફેવરિટ એમએસ ધોનીએ એક ખાસ રેકોર્ડ પોતાના નામે કરી લીધો છે.

એમએસ ધોનીએ આ રેકોર્ડ બનાવ્યો હતો

ચેન્નાઈ સુપર કિંગ્સના ભૂતપૂર્વ કેપ્ટન એમએસ ધોનીએ ગુજરાત ટાઇટન્સ સામે રમાયેલી મેચમાં 11 બોલમાં 26 રનની અણનમ ઇનિંગ રમી હતી. આ મેચમાં તેણે એક ફોર અને ત્રણ સિક્સ ફટકારી હતી. આ મેચમાં ધોનીએ ત્રીજી સિક્સ ફટકારતા જ એક ખાસ રેકોર્ડમાં એબી ડી વિલિયર્સની બરાબરી કરી લીધી. IPLમાં એમએસ ધોનીના નામે હવે 251 સિક્સ છે. એબી ડી વિલિયર્સે પણ IPLમાં આટલી જ સિક્સ ફટકારી છે. હવે બંને બેટ્સમેન IPLમાં સૌથી વધુ સિક્સ મારનાર ખેલાડીઓની યાદીમાં ચોથા સ્થાને છે.

આ પણ વાંચો: 'પોતાને ધોની સમજી બેઠો છે, તેની કેપ્ટનશિપમાં અભિમાન છલકે છે..., આ પ્લેયર પર ભડક્યો ડી વિલિયર્સ

IPLમાં સૌથી વધુ સિક્સ મારનાર બેટ્સમેન

• ક્રિસ ગેલ - 357 સિક્સ
• રોહિત શર્મા - 276 સિક્સ
• વિરાટ કોહલી - 264 સિક્સ
• એબી ડી વિલિયર્સ - 251 સિક્સ
• એમએસ ધોની - 251 સિક્સ

કેવી રહી મેચ?

ચેન્નાઈ સુપર કિંગ્સને મહત્ત્વની મેચમાં ગુજરાત ટાઇટન્સ સામે હારનો સામનો કરવો પડ્યો હતો. આ મેચમાં હાર સાથે ટીમને પોઈન્ટ્સ ટેબલમાં નેટ રન રેટમાં નુકસાન થયું છે. આ મેચમાં ચેન્નાઈ સુપર કિંગ્સના કેપ્ટન ઋતુરાજ ગાયકવાડે ટોસ જીતીને પહેલા બોલિંગ કરવાનો નિર્ણય કર્યો હતો. આ પછી પ્રથમ બેટિંગ કરતા ગુજરાત ટાઇટન્સની ટીમે શુભમન ગિલ અને સાઈ સુદર્શનની સદીના આધારે 20 ઓવરમાં ત્રણ વિકેટ ગુમાવીને 231 રન બનાવ્યા હતા. આ મેચમાં શુભમને 55 બોલમાં 104 રન અને સાઈ સુદર્શને 51 બોલમાં 103 રનની શાનદાર ઈનિંગ રમી હતી.

જ્યારે બીજી ઈનિંગમાં ચેન્નાઈ સુપર કિંગ્સ ટીમને શરૂઆતમાં જ ઝટકો લાગ્યો હતો અને આ મેચમાં તેમનો ટોપ ઓર્ડર સંપૂર્ણપણે નિષ્ફળ ગયો હતો. જોકે મિચેલ અને મોઈને વચ્ચેની ઓવરોમાં કેટલાક રન બનાવ્યા હતા, પરંતુ ટીમ 20 ઓવરમાં 8 વિકેટ ગુમાવીને માત્ર 196 રન સુધી જ પહોંચી શકી હતી અને GTએ આસાનીથી મેચ જીતી લીધી હતી.