WPL 2026 / નેટ સિવર બ્રન્ટની સદી સામે વ્યર્થ ગઈ રિચા ઘોષની તોફાની ઈનિંગ, MIએ મેચ જીતી જીવંત રાખી પ્લેઓફની આશા
છેલ્લું અપડેટ : 27 Jan 2026
નેટ સિવર બ્રન્ટ (100*) એ WPL ઈતિહાસમાં પ્રથમ સદી ફટકારી, જેના કારણે મુંબઈ ઈન્ડિયન્સ (MI) એ સોમવારે રોયલ ચેલેન્જર્સ બેંગલુરુ (RCB) ને 15 રનથી હરાવ્યું અને પ્લેઓફની આશા જીવંત રાખી.
વડોદરા ખાતે રમાયેલી WPLની 16મી મેચમાં મુંબઈ ઈન્ડિયન્સે પ્રથમ બેટિંગ કરી અને નિર્ધારિત 20 ઓવરમાં 4 વિકેટ ગુમાવીને 199 રન બનાવ્યા. જેના જવાબમાં, RCB તેની 20 ઓવરમાં 184/9 જ બનાવી શક્યું. RCB માટે રિચા ઘોષ (90) એ તોફાની ઈનિંગ રમી હતી.
RCBની ઈનિંગ
200 રનનો ટાર્ગેટ ચેઝ કરતી વખતે RCBની શરૂઆત ખરાબ રહી હતી. તેની અડધી ટીમ 35 રન પર ડગઆઉટમાં પાછી ફરી હતી. ગ્રેસ હેરિસ (15), કેપ્ટન સ્મૃતિ મંધાના (6), જ્યોર્જિયા વોલ (9), ગૌતમી નાઈક (1) અને રાધા યાદવ (0) મોટો સ્કોર કરવામાં નિષ્ફળ રહી હતી.
અહીંથી રિચા ઘોષે એકલા હાથે બાજી સંભાળી. વિસ્ફોટક મહિલા બેટ્સમેને માત્ર 50 બોલમાં 10 ચોગ્ગા અને 6 છગ્ગાની મદદથી 90 રન બનાવીને ટીમની જીતની આશા જીવંત રાખી હતી. રિચા ઈનિંગ પર આઉટ થઈ હતી, પરંતુ RCB પહેલાથી જ મેચ જીતવાથી દૂર રહી ગઈ હતી.
રિચા ઉપરાંત, નાદીન ડી ક્લર્ક (28), અરુંધતી રેડ્ડી (14) અને શ્રેયંકા પાટીલ (12*) એ નાના પણ મૂલ્યવાન યોગદાન આપ્યા. MI માટે હેલી મેથ્યુઝે સૌથી વધુ 3 વિકેટ લીધી. શબનીમ ઈસ્માઈલ અને એમેલિયા કેરે 2-2 વિકેટ લીધી હતી. જ્યારે અમનજોત કૌરે 1 વિકેટ લીધી હતી.
બ્રન્ટે WPL ઈતિહાસની પ્રથમ સદી ફટકારી
આ પહેલા નેટ સિવર બ્રન્ટે લીગના ઈતિહાસમાં પ્રથમ સદી ફટકારી હતી, જેમાં તેણે અણનમ 100 રન બનાવ્યા હતા. તેણે અને હેલી મેથ્યુઝ (56) એ બીજી વિકેટ માટે 131 રનની પાર્ટનરશિપ કરી હતી, જેના કારણે મુંબઈ ઈન્ડિયન્સે RCB સામે ચાર વિકેટે 199 રન બનાવ્યા હતા.
સિવર બ્રન્ટે તેની ઈનિંગ દરમિયાન 57 બોલનો સામનો કર્યો હતો, જેમાં 16 ચોગ્ગા અને 1 છગ્ગો ફટકાર્યો હતો. મેથ્યુઝે 39 બોલમાં 9 ચોગ્ગા ફટકાર્યા હતા. બંને બેટ્સમેનોએ માત્ર 73 બોલમાં 131 રન બનાવીને મુંબઈને મોટો સ્કોર અપાવ્યો હતો. કેપ્ટન હરમનપ્રીતે પણ 20 રનનું યોગદાન આપ્યું હતું.
સંજીવન સંજનાએ 7 રનમાં પોતાની વિકેટ ગુમાવ્યા બાદ બ્રન્ટ અને મેથ્યુઝે ઈનિંગને સ્થિર કરી હતી. RCB માટે, લોરેન બેલે 21 રન આપીને 2 વિકેટ લીધી, જ્યારે શ્રેયંકા પાટિલ અને નાદીન ડી ક્લર્કે 1-1 વિકેટ લીધી હતી.
બ્રન્ટ પહેલા જ્યોર્જિયા વોલ અને સોફી ડિવાઈને WPLમાં સૌથી વધુ 99 રન બનાવ્યા હતા. વોલે 2025ની સિઝનમાં RCB સામે UP માટે આ ઈનિંગ રમી હતી, જ્યારે સોફીએ 2023ની સિઝનમાં ગુજરાત જાયન્ટ્સ સામે RCB માટે એટલા જ રન બનાવ્યા હતા.
