IND vs WI / જોન કેમ્પબેલે દિલ્હી ટેસ્ટમાં સદી ફટકારતા લગાવી રેકોર્ડ્સની લાઈન, 23 વર્ષ બાદ થયું આવું

વેસ્ટ ઈન્ડિઝના ઓપનર જોન કેમ્પબેલે દિલ્હીના અરુણ જેટલી સ્ટેડિયમમાં રમાઈ રહેલી ભારત સામેની ટેસ્ટ મેચમાં હેડલાઈન્સમાં સ્થાન મેળવ્યું છે. કેમ્પબેલે ફોલોઓન માટે ઉતરેલી વેસ્ટ ઈન્ડિઝ ટીમ માટે બીજી ઈનિંગમાં સદી ફટકારી હતી. કેમ્પબેલે 199 બોલનો સામનો કર્યો અને 115 રન બનાવ્યા, તેણે 12 ચોગ્ગા અને 3 છગ્ગા ફટકાર્યા હતા.

જોન કેમ્પબેલની ટેસ્ટ કારકિર્દીની આ પહેલી સદી હતી. કેમ્પબેલે પોતાની સદી સાથે કેટલાક મહત્ત્વપૂર્ણ રેકોર્ડ પણ બનાવ્યા. લગભગ 23 વર્ષ બાદ વેસ્ટ ઈન્ડિઝના કોઈ ઓપનરે ભારતમાં ભારતીય ટીમ સામે ટેસ્ટ સદી ફટકારી છે. અગાઉ, વેવેલ હિન્ડ્સે નવેમ્બર 2002માં કોલકાતાના ઈડન ગાર્ડન્સ ખાતે 100 રનની ઇનિંગ રમી હતી.

જૂન 2006 પછી વેસ્ટ ઈન્ડિઝના બેટ્સમેન દ્વારા ભારત સામે આ પહેલી ટેસ્ટ સદી હતી. ડેરન ગંગાએ ત્યારે બાસેટેર ટેસ્ટમાં 135 રન બનાવ્યા હતા. એ પણ નોંધનીય છે કે માર્ચ 2023 પછી વેસ્ટ ઈન્ડિઝના ઓપનર દ્વારા આ પહેલી ટેસ્ટ સદી હતી. આ વર્ષે વેસ્ટ ઈન્ડિઝના બેટ્સમેન દ્વારા આ પહેલી ટેસ્ટ સદી પણ હતી.

લેફટી બેટ્સમેન જોન કેમ્પબેલે પોતાની પહેલી ટેસ્ટ સદી સુધી પહોંચવા માટે 50 ઈનિંગ્સ લીધી હતી. ટ્રેવર ગોડાર્ડે ઓપનર તરીકે પોતાની પહેલી ટેસ્ટ સદી સુધી પહોંચવા માટે સૌથી વધુ ઈનિંગ્સ લીધી હતી. કેમ્પબેલે ભારતીય સ્પિનર ​​રવિન્દ્ર જાડેજાને છગ્ગો ફટકારીને પોતાની ટેસ્ટ સદી પૂર્ણ કરી. તે ટેસ્ટ ક્રિકેટમાં આ સિદ્ધિ મેળવનાર પાંચમો વેસ્ટ ઈન્ડિઝ બેટ્સમેન છે.

પ્રથમ ટેસ્ટ સદી માટે સૌથી વધુ ઈનિંગ્સ (ઓપનર)

• 58- ટ્રેવર ગોડાર્ડ (દક્ષિણ આફ્રિકા)
• 50- જોન કેમ્પબેલ (વેસ્ટ ઈન્ડિઝ)
• 44- ડેરન ગંગા (વેસ્ટ ઈન્ડિઝ)
• 32- ઈમરુલ કાયેસ (બાંગ્લાદેશ)
• 31- બોબ સિમ્પસન (ઓસ્ટ્રેલિયા)

છગ્ગા સાથેની પહેલી ટેસ્ટ સદી (વેસ્ટ ઈન્ડિઝના બેટ્સમેન)

• કોલિન્સ કિંગ
• રોબર્ટ સેમ્યુઅલ્સ
• રિડલે જેકબ્સ
• શેન ડોરિચ
• જોન કેમ્પબેલ

જોન કેમ્પબેલ દિલ્હીમાં પોતાની પહેલી ટેસ્ટ સદી ફટકારનાર 17મો બેટ્સમેન છે. આ કોઈપણ ભારતીય મેદાન માટે સૌથી વધુ છે. વિવ રિચાર્ડ્સ અને કપિલ દેવ જેવા દિગ્ગજોએ પણ દિલ્હીમાં પોતાની પહેલી ટેસ્ટ સદી ફટકારી હતી. છેલ્લે નયન મોંગિયાએ 1996માં ઓસ્ટ્રેલિયા સામે આ મેદાન પર 152 રન બનાવ્યા હતા. દિલ્હીમાં પોતાની પહેલી ટેસ્ટ સદી ફટકારનારા 17 બેટ્સમેનમાંથી 6 વેસ્ટ ઈન્ડિઝના છે.