ગાંગુલી અને યુવરાજ બાદ દિલ્હીના કોચિંગ સ્ટાફમાં વધુ એક દિગ્ગજની એન્ટ્રી, શ્રીલંકાના પૂર્વ ફાસ્ટ બોલરનો થયો સમાવેશ
ઈન્ડિયન પ્રીમિયર લીગ (IPL) માં ટાઈટલ દુષ્કાળનો સામનો કરી રહેલી દિલ્હી કેપિટલ્સે તેના કોચિંગ સ્ટાફમાં વધુ એક દિગ્ગજ ખેલાડીનો ઉમેરો કર્યો છે. ફ્રેન્ચાઈઝીએ પહેલાથી જ ભારતના ભૂતપૂર્વ કેપ્ટન સૌરવ ગાંગુલીને તેના હેડ કોચ તરીકે નિયુક્ત કર્યો હતો અને હવે શ્રીલંકાનો ચામિંડા વાસ ફાસ્ટ બોલિંગ કોચ તરીકે ટીમમાં જોડાયો છે.
ગાંગુલી અને યુવરાજ સિંહ પછી દિલ્હીના નવા કોચિંગ સ્ટાફમાં આ ત્રીજો ઉમેરો છે. યુવરાજ બેટિંગ કોચ તરીકે જોવા મળશે. આ ત્રણ દિગ્ગજ ટીમને તેનું પ્રથમ IPL ટાઈટલ જીતવામાં મદદ કરવા માટે પ્રયત્નશીલ રહેશે. ફ્રેન્ચાઈઝીએ શનિવારે એક વીડિયો બહાર પાડ્યો જેમાં વાસની બોલિંગ કોચ તરીકે નિમણૂકની જાહેરાત કરવામાં આવી હતી.
ઓક્શનની તૈયારીઓ થશે
વાસના આગમન સાથે દિલ્હીનો કોચિંગ સ્ટાફ હવે ઓક્શન પહેલા તૈયારીઓ પર ધ્યાન કેન્દ્રિત કરશે. કોચિંગ સ્ટાફ તેમની જરૂરિયાતોના આધારે ખેલાડીઓ મેળવવા માટે વ્યૂહરચના બનાવશે. વાસને તેના સમયનો એક મહાન બોલર માનવામાં આવતો હતો અને તે તેજસ્વી ક્રિકેટ મગજ ધરાવતા ખેલાડીઓમાંનો એક માનવામાં આવતો હતો. આ સંદર્ભમાં તે ટીમની વ્યૂહરચનામાં પણ અસરકારક ભૂમિકા ભજવી શકે છે. તે શ્રીલંકાનો સૌથી સફળ ટેસ્ટ ફાસ્ટ બોલર છે, તેણે 355 ટેસ્ટ વિકેટ અને 400 ODI વિકેટ લીધી છે.
વાસ પહેલા ભૂતપૂર્વ ભારતીય બોલર મુનાફ પટેલે દિલ્હી કેપિટલ્સના બોલિંગ કોચ તરીકે સેવા આપી હતી. ફ્રેન્ચાઈઝીએ એક ઇન્સ્ટાગ્રામ વીડિયો દ્વારા વાસના આગમનની જાહેરાત કરી હતી, જેમાં કેપ્શન આપ્યું હતું, "એક મહાન સીવી! અમારા ફાસ્ટ બોલિંગ કોચ ચામિંડા વાસનું દિલ્હીમાં સ્વાગત છે."
શ્રીલંકાની ટીમ સાથે કામ કર્યું છે
વાસને કોચિંગનો અનુભવ છે. તેણે શ્રીલંકાની પુરુષ ટીમના ફાસ્ટ બોલિંગ કોચ તરીકે કામ કર્યું છે, ત્રણ અલગ અલગ કાર્યકાળ માટે આ પદ પર સેવા આપી છે. વાસે ન્યુઝીલેન્ડ ટીમ સાથે કોચિંગ ડેબ્યુ કર્યું હતું. ત્યારબાદ તેણે 2013-15 સુધી શ્રીલંકાની ટીમ સાથે સેવા આપી હતી. 2016માં વાસ T20 વર્લ્ડ કપ માટે આયર્લેન્ડ ટીમના બોલિંગ કોચ તરીકે સેવા આપી હતી અને ત્યારબાદ શ્રીલંકાની ટીમમાં ફરી જોડાયો હતો.
વાસને IPLમાં રમવાનો પણ અનુભવ છે. તે 2008થી 2010 સુધી ડેક્કન ચાર્જર્સ માટે રમ્યો હતો અને 2009માં ટીમને ટાઈટલ જીતવામાં મોટી ભૂમિકા ભજવી હતી. તેણે ફ્રેન્ચાઈઝી માટે કુલ 13 મેચ રમી, જેમાં 18 વિકેટ લીધી હતી.
