VIDEO: PBKS vs SRH / મુલ્લાનપુરમાં વિજય ક્રમ જાળવી રાખવા માંગશે પંજાબ કિંગ્સ, સનરાઈઝર્સ હૈદરાબાદ સાથે થશે ટક્કર
છેલ્લું અપડેટ : 11 Apr 2026
શનિવારે IPLની 19મી સિઝનમાં ડબલ હેડરની પહેલી મેચમાં પંજાબ કિંગ્સ અને સનરાઇઝર્સ હૈદરાબાદ મુલ્લાનપુરના ઈન્ટરનેશનલ ક્રિકેટ સ્ટેડિયમમાં ટકરાશે. બંને ટીમોની આ ચોથી લીગ મેચ હશે. પંજાબ કિંગ્સ અત્યાર સુધી ટુર્નામેન્ટમાં અજેય છે. તેણે તેની ત્રણમાંથી બે મેચ જીતી છે, જ્યારે KKR સામેની તેની પાછલી મેચ વરસાદને કારણે ધોવાઈ ગઈ હતી. પંજાબ તેની જીતનો ક્રમ જાળવી રાખવાનો પ્રયાસ કરશે.
જ્યારે બીજી તરફ સનરાઈઝર્સ હૈદરાબાદ તેની ત્રણમાંથી બે મેચ હારી ગયું છે અને ફક્ત એક જ જીત્યું છે. સનરાઈઝર્સ હૈદરાબાદની ટીમ તેની પાછલી મેચ હાર્યા બાદ ચંદીગઢ પહોંચી છે. પાછલી મેચમાં, તે લખનૌ સુપર જાયન્ટ્સ સામે પાંચ વિકેટથી હારી હતી. સનરાઈઝર્સ હૈદરાબાદ હાલમાં તેની બીજી જીતની શોધમાં છે. સનરાઈઝર્સ હૈદરાબાદ હાલમાં પોઈન્ટ્સ ટેબલમાં છઠ્ઠા ક્રમે છે, જ્યારે પંજાબ બીજા ક્રમે છે. આ બીજી વખત છે જ્યારે બંને ટીમો મુલ્લાનપુર મેદાન પર ટકરાશે. છેલ્લી વખત સનરાઈઝર્સ હૈદરાબાડે બે વર્ષ પહેલા આ મેદાન પર પંજાબ કિંગ્સને બે રનથી હરાવ્યું હતું.
હેડ-અભિષેક ચિંતાનો વિષય
સનરાઈઝર્સ હૈદરાબાદ પાસે ટ્રેવિસ હેડ અને અભિષેક શર્માની ઘાતક ઓપનિંગ જોડી છે, પરંતુ તેમનું ફોર્મ ટીમ માટે મોટી ચિંતાનો વિષય છે. હેડે ત્રણ મેચમાં 64 રન બનાવ્યા છે અને અભિષેક શર્માએ ફક્ત 55 રન બનાવ્યા છે. ફક્ત એક મેચમાં, બંનેએ 82 રનની પાર્ટનરશિપ કરી હતી, જ્યારે અન્ય બે મેચમાં તેઓએ શરૂઆતમાં પોતાની વિકેટ ગુમાવી હતી. અભિષેક શર્મા છેલ્લી મેચમાં પોતાનું ખાતું પણ નહતો ખોલી શક્યો અને હેડ ફક્ત 7 રન બનાવીને આઉટ થયો હતો.
પંજાબની મજબૂત બેટિંગ
આ દરમિયાન, પંજાબ પાસે મજબૂત બેટિંગ લાઈન-અપ છે. પ્રિયાંશ આર્યાએ ચેન્નાઈ સુપર કિંગ્સ સામે ટીમને ધમાકેદાર શરૂઆત આપી હતી, જ્યારે પ્રભસિમરને બંને મેચમાં શાનદાર બેટિંગ કરી છે. કેપ્ટન શ્રેયસ અય્યર પણ અડધી સદી સાથે ફોર્મમાં પાછો ફર્યો છે. કૂપર કોનોલી ટીમ માટે વિશ્વસનીય ખેલાડી સાબિત થઈ રહ્યો છે. ત્રીજા નંબર પર બેટિંગ કરતા, તેણે બે મેચમાં 72 અને 36 રન બનાવ્યા છે અને ટીમની જીતમાં મુખ્ય ભૂમિકા ભજવી.
મુલ્લાનપુર મેદાન પર 13મી મેચ
- પહેલા બેટિંગ કરનારી ટીમે છ મેચ જીતી.
- પહેલા બોલિંગ કરનારી ટીમે છ મેચ જીતી.
- બેટ્સમેન દ્વારા સૌથી વધુ સ્કોર - 103 પ્રિયાંશ આર્ય
- બોલર દ્વારા શ્રેષ્ઠ પ્રદર્શન - 4/28 યુઝવેન્દ્ર ચહલ
- સૌથી વધુ ટીમ સ્કોર - 228 રન (MI)
- સૌથી ઓછો ટીમ સ્કોર - 95 રન (KKR)
- પંજાબ અહીં 11 મેચ રમ્યું છે, જેમાં સાત હાર્યું છે અને ચારમાં જીત મેળવી છે.