VIDEO: GT vs MI / જીતનો સિલસિલો જાળવી રાખવા માંગશે ગુજરાત, મુંબઈની ટીમમાં થઈ શકે છે ફેરફાર
છેલ્લું અપડેટ : 20 Apr 2026
પાછલી ત્રણ જીતથી ઉત્સાહિત, ગુજરાત ટાઈટન્સ આજે (20 એપ્રિલ) IPL મેચમાં મુંબઈ ઈન્ડિયન્સ સામે પોતાની જીતનો સિલસિલો ચાલુ રાખવાનો પ્રયાસ કરશે, મુંબઈની ટીમ સતત હારના બાદ દબાણ હેઠળ છે. બંને ટીમોએ છેલ્લા કેટલાક અઠવાડિયામાં સ્પષ્ટ વિરોધાભાસ દર્શાવ્યો છે. આજની મેચ અમદાવાદના નરેન્દ્ર મોદી સ્ટેડિયમ ખાતે રમાશે.
ગુજરાત ટાઈટન્સે પોતાના અભિયાનની શરૂઆત સતત બે હાર સાથે કરી હતી, પરંતુ ત્યારથી સતત ત્રણ મેચ જીતીને પોતાની લય પાછી મેળવી છે. તેનાથી વિપરીત, મુંબઈએ પોતાની પહેલી મેચમાં જીત સાથે શરૂઆત કરી હતી, પરંતુ ત્યારથી તેનું પ્રદર્શન બગડ્યું છે. તેને સતત ચાર હારનો સામનો કરવો પડ્યો છે.
નબળા પ્રદર્શનને કારણે મુંબઈ દબાણમાં
પાંચ વખતની ચેમ્પિયન મુંબઈ પોતાના નબળા પ્રદર્શનને કારણે ઘણા દબાણ હેઠળ છે અને પોતાની પ્લેઓફમાં પહોંચવાની આશા જીવંત રાખવા માટે કોઈપણ કિંમતે જીત મેળવવી જ પડશે. ટીમે પાવરપ્લેમાં સારું પ્રદર્શન નથી કર્યું. વધુમાં, મિડલ ઓર્ડરના બેટ્સમેનોના અસંગત પ્રદર્શન અને બોલિંગ એટેકમાં તીક્ષ્ણતાના અભાવે મુંબઈ ઈન્ડિયન્સને ભારે અસર કરી છે. ભારતીય કેપ્ટન સૂર્યકુમાર યાદવ અને તિલક વર્મા મુંબઈ ઈન્ડિયન્સના મિડલ ઓર્ડરના મુખ્ય આધાર રહ્યા છે, પરંતુ બંનેમાંથી કોઈએ અપેક્ષા મુજબ પ્રદર્શન નથી કર્યું.
સૂર્યકુમારે અડધી સદી ફટકારી છે, પરંતુ તેના પ્રદર્શનમાં સાતત્યનો અભાવ રહ્યો છે. બીજી તરફ, તિલક ખરાબ ફોર્મમાં છે, તે પાંચ ઈનિંગ્સમાં ફક્ત 43 રન બનાવી શક્યો છે. કેપ્ટન હાર્દિક પંડ્યાનું પ્રદર્શન પણ નબળું રહ્યું છે. તેણે ચાર મેચમાં ફક્ત 81 રન બનાવ્યા છે, જે મુંબઈની બેટિંગની મુશ્કેલીઓ વધારે છે.
જસપ્રીત બુમરાહ ચિંતાનું કારણ
મુંબઈની સમસ્યાઓ ફક્ત બેટિંગ સુધી મર્યાદિત નથી, તેના બોલર્સ પણ નિષ્ફળ રહ્યા છે. ફાસ્ટ બોલર જસપ્રીત બુમરાહની અત્યાર સુધી વિકેટ લેવામાં અસમર્થતા એક મોટી ચિંતા છે. જ્યારે તેણે ઈકોનોમિકલ બોલિંગ કરી છે, ત્યારે બેટ્સમેન તેની સામે જોખમ લેવાનું ટાળીને સરળતાથી રમી રહ્યા છે.
અન્ય બોલર્સ પણ સંઘર્ષ કરી રહ્યા છે. શાર્દુલ ઠાકુર અને દીપક ચહર મહત્ત્વપૂર્ણ ક્ષણોમાં વિકેટ લેવામાં અસમર્થ રહ્યા છે, જ્યારે હાર્દિક તેની બોલિંગથી કમાલ નથી દેખાડી શક્યો. તેના સ્પિનર્સના પ્રદર્શનમાં નિરંતરતા નથી. રોહિત શર્માની ઈજાએ મુંબઈની મુશ્કેલીઓમાં વધારો કર્યો છે. તે RCB સામેની મેચમાં ઈજાગ્રસ્ત થયો હતો અને પંજાબ કિંગ્સ સામેની પાછલી મેચમાં નહતો રમી શક્યો.
ગુજરાતનો ટોપ-ઓર્ડર બેટ્સમેન પર આધાર
તેનાથી વિપરીત, ગુજરાત ટાઈટન્સે તેની સમસ્યાઓ છતાં જીતવાના રસ્તા શોધી કાઢ્યા છે. તેની બેટિંગ તેના ટોપ-ઓર્ડર બેટ્સમેન પર ખૂબ નિર્ભર છે, જેમાં કેપ્ટન શુભમન ગિલ, સાઈ સુદર્શન અને જોસ બટલર મોટાભાગે રન બનાવે છે.
ગ્લેન ફિલિપ્સ, વોશિંગ્ટન સુંદર અને રાહુલ તેવતિયા જેવા મિડલ ઓર્ડરના બેટ્સમેન હજુ સુધી વિશ્વસનીય પ્રદર્શન નથી કરી શક્યા. બોલિંગની વાત કરીએ તો, ગુજરાત ટાઈટન્સના બોલર્સે ટુકડાઓમાં સારું પ્રદર્શન કર્યું છે. મોહમ્મદ સિરાજ અને કાગીસો રબાડા ક્યારેક મોંઘા રહ્યા છે, જ્યારે પ્રસિદ્ધ કૃષ્ણા અને રાશિદ ખાનનું પ્રદર્શન ઉતાર-ચઢાવવાળું રહ્યું છે.
IPL 2026 માટે બંને ટીમો
ગુજરાત ટાઈટન્સઃ શુભમન ગિલ (કેપ્ટન), અનુજ રાવત, જોસ બટલર, કુમાર કુશાગ્ર, ગ્લેન ફિલિપ્સ, રાશિદ ખાન, માનવ સુથાર, નિશાંત સિંધુ, રાહુલ તેવટિયા, વોશિંગ્ટન સુંદર, ગુરનુર બરાર, અરશદ ખાન, મોહમ્મદ સિરાજ, પ્રસિદ્ધ કૃષ્ણા, કગીસો રબાડા, સાઈ કિશોર, ઈશાંત શર્મા, અશોક શર્મા, જેસન હોલ્ડર, ટોમ બેન્ટન, લ્યુક વુડ, સાઈ સુદર્શન, શાહરૂખ ખાન, જયંત યાદવ, કુલવંત ખેજરોલિયા.
મુંબઈ ઈન્ડિયન્સ: હાર્દિક પંડ્યા (કેપ્ટન), ક્વિન્ટન ડી કોક (વિકેટકીપર), ડેનિશ માલેવાર, રોબિન મિન્ઝ (વિકેટકીપર), રયાન રિકેલ્ટન (વિકેટકીપર), શેરફેન રધરફોર્ડ, રોહિત શર્મા, સૂર્યકુમાર યાદવ, તિલક વર્મા, અથર્વ અંકોલેકર, રાજ બાવા, કોર્બીન બોશ, વિલ જેક્સ, મયંક રાવત, નમન ધીર, મિચેલ સેન્ટનર, શાર્દુલ ઠાકુર, અશ્વિની કુમાર, ટ્રેન્ટ બોલ્ટ, જસપ્રિત બુમરાહ, દીપક ચહર, એએમ ગઝનફર, મયંક માર્કંડે, મોહમ્મદ ઈઝહાર, રઘુ શર્મા.