BCCI પ્રમુખના રાજ્યમાં મોટું ક્રિકેટ કૌભાંડ, આયોજકો ફરાર; શ્રીનગરમાં ફસાયા ક્રિસ ગેલ સહિત આ આંતરરાષ્ટ્રીય ખેલાડીઓ
છેલ્લું અપડેટ : 04 Nov 2025
કાશ્મીરમાંથી નવી ક્રિકેટ પ્રતિભા શોધવા માટે એક મોટી ટુર્નામેન્ટ તરીકે ઓળખાતી ઈન્ડિયન હેવન પ્રીમિયર લીગ (IHPL) એક કૌભાંડ સાબિત થયું છે. આ કેસ ભારતીય ક્રિકેટ કંટ્રોલ બોર્ડ (BCCI) ના પ્રમુખ મિથુન મન્હાસના ગૃહ રાજ્યમાંથી ઉદ્ભવ્યો છે. IHPLના આયોજકો ખેલાડીઓ, અમ્પાયર્સ, સપોર્ટ સ્ટાફ અને હોટલના બિલ ચૂકવ્યા વિના ટુર્નામેન્ટની વચ્ચેથી ભાગી ગયા.
આયોજકો ફરાર, આંતરરાષ્ટ્રીય ખેલાડીઓ હોટલમાં ફસાયા
આના કારણે ક્રિસ ગેલ અને શાકિબ અલ હસન સહિત ઘણા ભૂતપૂર્વ આંતરરાષ્ટ્રીય સ્ટાર્સ કાશ્મીરની એક હોટલમાં ફસાયા છે. આ લીગમાં ક્રિસ ગેલ, શાકિબ અલ હસન સિવાય જેસી રાયડર, માર્ટિન ગુપ્ટિલ, થિસારા પરેલા અને પ્રવીણ કુમાર જેવા અગ્રણી ખેલાડીઓનો સમાવેશ થાય છે, જેઓ જમ્મુ અને કાશ્મીર સ્પોર્ટ્સ કાઉન્સિલના સમર્થનથી તેનો પ્રચાર કરી રહ્યા હતા.
ઓક્ટોબરના છેલ્લા અઠવાડિયામાં ખૂબ જ ધામધૂમથી શરૂ થયેલી IHPLનું આયોજન મોહાલીમાં એક યુવા સોસાયટી દ્વારા કરવામાં આવ્યું હતું. શહેરના વિવિધ સ્થળોએ ક્રિસ ગેલ, ડેવોન સ્મિથ, જેસી રાયડર અને શાકિબ અલ હસન જેવા ભૂતપૂર્વ ક્રિકેટર્સના વિશાળ બિલબોર્ડ લગાવવામાં આવ્યા હતા, જેમાં જાહેરાત કરવામાં આવી હતી કે આ મેગાસ્ટાર 8 નવેમ્બરના રોજ સમાપ્ત થનારી લીગમાં સ્થાનિક ખેલાડીઓ સાથે રમશે.
પેમેન્ટ ન થવાને કારણે ખેલાડીઓનો બહિષ્કાર
મોટાભાગની મેચો બખ્શી સ્ટેડિયમમાં રમાઈ હતી, જેમાં બ્રેક દરમિયાન લાઉડસ્પીકર પર સંગીત વાગતું હતું. જોકે, શનિવારે લીગ અચાનક સમાપ્ત થઈ ગઈ જ્યારે ખેલાડીઓએ પેમેન્ટન થવાને કારણે મેચોમાં આવવાનો ઈનકાર કર્યો. આયોજકો ગાયબ થઈ ગયા, જેના કારણે હોટેલ માલિકોને ખેલાડીઓને તેમના બાકી પૈસા ચૂકવવામાં ન આવે ત્યાં સુધી જવાથી રોકવાની ફરજ પડી.
આંતરરાષ્ટ્રીય અમ્પાયરે પેમેન્ટનો મુદ્દો ઉઠાવ્યો
આ મુદ્દો ત્યારે પ્રકાશમાં આવ્યો, જ્યારે ટુર્નામેન્ટમાં અમ્પાયરિંગ કરતી ઈંગ્લેન્ડની મેલિસા જ્યુનિપરએ કહ્યું કે તેમને તેમનું પેમેન્ટ નથી મળ્યું. મેલિસા જ્યુનિપરએ કહ્યું, "અમને કોઈ પેમેન્ટ નથી મળ્યું." તેમણે ઉમેર્યું કે હોટેલ સ્ટાફે તેમને "ગુમ થયેલા આયોજકો" વિશે જાણ કરી હતી. પોલીસે હોટલની મુલાકાત લીધી, પરંતુ તેમણે કોઈ કાર્યવાહી શરૂ કરી છે કે કેમ તે અંગે કોઈ સત્તાવાર માહિતી નથી.
લેજેન્ડ્સ લીગ ક્રિકેટે આશા આપી હતી
ગયા વર્ષે કાશ્મીરમાં લેજેન્ડ્સ લીગ ક્રિકેટ ટુર્નામેન્ટમાં ભાગ લેનારા ઘણા ખેલાડીઓમાં ગેલ પણ હતો. IHPLની જેમ આ ટુર્નામેન્ટ પણ એક ખાનગી સ્પર્ધા હતી, પરંતુ તેણે સ્ટેડિયમમાં મોટી ભીડ ખેંચી હતી, કારણ કે સ્થાનિક લોકોને લગભગ 40 વર્ષમાં પહેલીવાર આંતરરાષ્ટ્રીય ખેલાડીઓને રમતા જોવાની તક મળી હતી.
આઠ ટીમો, મોટા નામો; છતાં ફ્લોપ શો
યુવા સોસાયટીના ચેરમેન પરમિન્દર સિંહ કાશ્મીરમાં IHPLનું આયોજન કરવા માટે લેજેન્ડ્સ લીગની સફળતાથી પ્રેરિત થયા હશે. તેમણે જમ્મુ અને કાશ્મીર સ્પોર્ટ્સ કાઉન્સિલનું બખ્શી સ્ટેડિયમ બુક કરાવ્યું હતું અને મેચોનું આયોજન કરવા માટે અગાઉથી ભાડું ચૂકવ્યું હતું. લીગમાં રમવા માટે આઠ ટીમોની રચના કરવામાં આવી હતી, જેમાં શ્રીનગર સુલ્તાન્સ, જમ્મુ લાયન્સ, લદ્દાખ હીરોઝ, પુલવામા ટાઈટન્સ, ઉરી પેન્થર્સ, ગુલમર્ગ રોયલ્સ, પટનીટોપ વોરિયર્સ અને કિશ્તવાર જાયન્ટ્સ સામેલ છે.
સોશિયલ મીડિયા પ્રમોશન પણ નિષ્ફળ ગયું
દરેક ટીમમાં એક ભૂતપૂર્વ આંતરરાષ્ટ્રીય ખેલાડી હતો. જોકે, ક્રિસ ગેલ અને અન્ય આંતરરાષ્ટ્રીય સ્ટાર્સની હાજરી હોવા છતાં, IHPL મોટી સંખ્યામાં લોકો આકર્ષિત ન કરી શકી. આયોજકોએ ટિકિટમાં ભારે ડિસ્કાઉન્ટ ઓફર કર્યું અને ટિકિટ વેચાણ વધારવા માટે સ્થાનિક સોશિયલ મીડિયા ઇન્ફ્લુએન્સર ઉમર ઝરગરની મદદ લીધી, પરંતુ કોઈ ફાયદો ન થયો.
સ્પોર્ટ્સ કાઉન્સિલની ભૂમિકા અંગે પ્રશ્નો
આટલી મોટી ટુર્નામેન્ટનું આયોજન કરવાનો અગાઉ કોઈ અનુભવ ન હોવા છતાં, આયોજક યુવા સોસાયટીને મેચનું આયોજન કરવા માટે બખ્શી સ્ટેડિયમનો ઉપયોગ કરવાની મંજૂરી કેવી રીતે આપવામાં આવી તે અંગે પ્રશ્નો ઉભા થઈ રહ્યા છે. સ્પોર્ટ્સ કાઉન્સિલના સચિવ નુઝહત ગુલે જણાવ્યું હતું કે આયોજકો વેન્યુનો ઉપયોગ કરવા માંગતા હતા અને પૈસા ચૂકવ્યા હતા.
નુઝહતે કહ્યું, "મારે IHPL સાથે કોઈ લેવાદેવા નથી. હું ફક્ત ઉદ્ઘાટન સમારોહમાં મહેમાન તરીકે હાજર હતો." યુવા સોસાયટીએ તેની વેબસાઈટ પર IHPLની જાહેરાત કરતી વખતે ભૂતપૂર્વ ક્રિકેટર સુરેન્દ્ર ખન્ના અને આશુ દાનીના ફોટાનો ઉપયોગ કર્યો હતો. જોકે, તેમણે એ નથી કહ્યું કે બંનેની સંસ્થામાં કોઈ ભૂમિકા હતી કે નહીં.
