IND-A vs SA-A / બોલિંગ બાદ બેટિંગમાં પણ ચમક્યા તનુષ કોટિયન અને અંશુલ કંબોજ, ઈન્ડિયા-A એ 3 વિકેટથી જીતી પહેલી મેચ
છેલ્લું અપડેટ : 02 Nov 2025
રિષભ પંતની કેપ્ટનશિપ હેઠળ ઈન્ડિયા-A એ શાનદાર વિજય નોંધાવી છે. બેંગલુરુમાં રમાયેલી પ્રથમ અનઓફિશિયલ મેચના અંતિમ દિવસે, યજમાન ટીમે સાઉથ આફ્રિકા-Aને 3 વિકેટથી હરાવીને બે મેચની સિરીઝમાં 1-0ની લીડ મેળવી છે. કેપ્ટન રિષભ પંતે આ મેચમાં 90 રનની શાનદાર ઈનિંગ રમી હતી. આ ઉપરાંત, ઓલરાઉન્ડર તનુષ કોટિયન અને અંશુલ કંબોજે બેટ અને બોલ બંનેથી શાનદાર પ્રદર્શન કરીને ટીમને જીત અપાવી.
ઈન્ડિયા-A એ સિરીઝમાં લીડ મેળવી
275 રનનો ટાર્ગેટ ચેઝ કરતી વખતે રિષભ પંત આઉટ થયા પછી, ઈન્ડિયા-A ટીમ આ મેચના અંતિમ દિવસે હારના ભયમાં હતી. યજમાન ટીમે 215 રનમાં 7 વિકેટ ગુમાવી દીધી હતી. ત્યારબાદ અંશુલ કંબોજ અને માનવ સુથારે સાતમી વિકેટ માટે અણનમ 62 રનની પાર્ટનરશિપ નોંધાવી, જેનાથી ટીમને શાનદાર જીત મળી. અંશુલ કંબોજે 46 બોલમાં અણનમ 37 રન બનાવ્યા, જેમાં 4 ચોગ્ગા અને 2 છગ્ગાનો સમાવેશ થાય છે. માનવ સુથારે પણ 56 બોલમાં અણનમ 20 રન બનાવ્યા, જેમાં 3 ચોગ્ગાનો સમાવેશ થાય છે.
જ્યારે તનુષ કોટિયને 30 બોલમાં 23 રન બનાવ્યા, જેમાં 2 ચોગ્ગાનો સમાવેશ થાય છે. ટીમ તરફથી કેપ્ટન રિષભ પંતે પણ 113 બોલમાં 90 રન બનાવ્યા, જેમાં 11 ચોગ્ગા અને 4 છગ્ગાનો સમાવેશ થાય છે. આયુષ બદોની 34 રન બનાવીને આઉટ થયો હતો. સાઉથ આફ્રિકા તરફથી, ટિયાન વેન વુરેન ત્રણ વિકેટ લીધી, જ્યારે ત્શેપો મોરેકીએ બે વિકેટ લીધી. તનુષ કોટિયને આ મેચમાં સારું પ્રદર્શન કર્યું હતું.
તનુષ કોટિયને પોતાની તાકાત બતાવી
આ મેચમાં તનુષ કોટિયને બેટ અને બોલ બંનેથી પોતાની તાકાત બતાવી. તેણે આ મેચમાં કુલ 8 વિકેટ લીધી હતી. તેણે પહેલી ઈનિંગમાં 13 રન અને બીજી ઈનિંગમાં 23 રન બનાવ્યા હતા. તેના ઉત્કૃષ્ટ પ્રદર્શન માટે તેને 'પ્લેયર ઓફ ધ મેચ' જાહેર કરવામાં આવ્યો હતો. અંશુલ કંબોજે બંને ઈનિંગ્સમાં 4-4 વિકેટ પણ લીધી હતી.
સાઉથ આફ્રિકા-A એ પ્રથમ ઈનિંગમાં 309 રન બનાવ્યા હતા. જવાબમાં, યજમાન ટીમ ફક્ત 234 રનમાં ઓલઆઉટ થઈ ગઈ હતી. બીજી ઈનિંગમાં, મુલાકાતી ટીમ ફક્ત 199 રનમાં જ સમેટાઈ ગઈ હતી. આમ, ઈન્ડિયા-Aને જીતવા માટે 275 રનનો ટાર્ગેટ મળ્યો હતો, જે તેણે 7 વિકેટ ગુમાવીને પ્રાપ્ત કર્યો.
