T20 વર્લ્ડ કપ 2026ના ચાર મહિના પહેલા ન્યુઝીલેન્ડને લાગ્યો ઝટકો, કેન વિલિયમસને અચાનક જાહેર કરી નિવૃત્તિ
છેલ્લું અપડેટ : 02 Nov 2025
ન્યુઝીલેન્ડના દિગ્ગજ બેટ્સમેન કેન વિલિયમસને અચાનક T20 આંતરરાષ્ટ્રીય ક્રિકેટમાંથી નિવૃત્તિની જાહેરાત કરી છે. T20 વર્લ્ડ કપ 2026ના માત્ર ચાર મહિના પહેલા, તેનો નિર્ણય આશ્ચર્યજનક છે. તેણે ટીમને અને ફેન્સને મોટો ઝટકો આપ્યો છે. વિલિયમસન ઘણા વર્ષોથી ન્યુઝીલેન્ડની T20 બેટિંગ લાઈન-અપનો મુખ્ય ભાગ રહ્યો છે અને હવે તેની ગેરહાજરી ચોક્કસપણે અનુભવાશે.
કેન વિલિયમસને T20 આંતરરાષ્ટ્રીય ક્રિકેટમાંથી નિવૃત્તિ લીધી
કેન વિલિયમસને ઓક્ટોબર 2011માં ન્યુઝીલેન્ડ માટે T20 આંતરરાષ્ટ્રીય ક્રિકેટમાં ડેબ્યુ કર્યું હતું. ત્યારથી, તે ટીમનો મહત્ત્વપૂર્ણ ભાગ બની ગયો અને તેણે ઘણા રન બનાવ્યા છે. વિલિયમસને T20I ક્રિકેટમાં ન્યુઝીલેન્ડનું નેતૃત્વ પણ કર્યું હતું, જેમાં તેનો રેકોર્ડ શાનદાર રહ્યો હતો. તેણે છેલ્લે 2024માં રમાયેલા T20 વર્લ્ડ કપમાં ન્યુઝીલેન્ડનું નેતૃત્વ કર્યું હતું. ત્યારથી તે આ ફોર્મેટથી બ્રેક પર હતો. બધાએ ધાર્યું હતું કે વિલિયમસન ફેબ્રુઆરી 2026માં શરૂ થતા T20 વર્લ્ડ કપમાં ભાગ લેશે અને પછી આ ફોર્મેટમાંથી નિવૃત્તિ લેશે. જોકે, તેણે ટુર્નામેન્ટના ચાર મહિના પહેલા જ T20 આંતરરાષ્ટ્રીય ક્રિકેટમાંથી નિવૃત્તિની જાહેરાત કરી દીધી છે.
કેન વિલિયમસન શા માટે નિવૃત્તિ લીધી?
નિવૃત્તિના પોતાના કારણો સમજાવતા, વિલિયમસને કહ્યું, "હું બધી યાદો અને અનુભવો માટે પોતાને ભાગ્યશાળી માનું છું. આ મારા અને ટીમ માટે યોગ્ય સમય છે. મારી નિવૃત્તિ ટીમને આગામી સિરીઝ અને T20 વર્લ્ડ કપ માટે સ્પષ્ટતા આપશે. અમારી પાસે T20માં ઘણી પ્રતિભા છે અને હવે તેમને વર્લ્ડ કપ માટે તૈયાર કરવા મહત્ત્વપૂર્ણ છે. હવે આ ફોર્મેટમાં ટીમને આગળ વધારવાનો સમય છે, અને હું તેમને સપોર્ટ આપવાનું ચાલુ રાખીશ."
કેન વિલિયમસનની T20I કારકિર્દી
કેન વિલિયમસને ન્યુઝીલેન્ડ માટે 93 T20 આંતરરાષ્ટ્રીય મેચ રમી છે, જેમાં 2575 રન બનાવ્યા છે. આ દરમિયાન તેણે 33.44ની એવરેજ અને 123.08ની સ્ટ્રાઇક રેટથી બેટિંગ કરી છે. તેણે T20Iમાં 18 અડધી સદી ફટકારી છે અને તેનો હાઈએસ્ટ સ્કોર 95 રહ્યો છે.