IND vs ENG / બીજા દિવસે પડી 15 વિકેટ, સસ્તામાં ઓલઆઉટ થયું ઈંગ્લેન્ડ; પછી આવી જયસ્વાલની તોફાની ફિફ્ટી
છેલ્લું અપડેટ : 02 Aug 2025
ઓવલ ટેસ્ટમાં બીજા દિવસની રમતના અંત સુધીમાં, ભારતીય ટીમે 2 વિકેટ ગુમાવીને 75 રન બનાવી લીધા છે. ઈંગ્લેન્ડે પ્રથમ ઈનિંગમાં 23 રનની લીડ મેળવી હતી, તેથી ભારત બીજા દિવસની રમતના અંતે 52 રનથી આગળ છે. કેએલ રાહુલ બીજી ઈનિંગમાં પણ ફ્લોપ રહ્યો, કારણ કે તેણે માત્ર 7 રન જ બનાવ્યા હતા. યશસ્વી જયસ્વાલ બીજા દિવસની રમતના અંતે 51 રન અને આકાશદીપ 4 રન બનાવીને અણનમ રહ્યા હતા.
બીજા દિવસે, ભારતે 204/6 ના સ્કોરથી પોતાની ઈનિંગ આગળ વધારી હતી. કરુણ નાયરે પહેલા દિવસે જ પોતાની ફિફ્ટી પૂરી કરી હતી. બીજા દિવસે, ભારતીય ટીમ ફક્ત 34 બોલ રમી શકી, જેમાં તેણે બાકીની ચાર વિકેટ ગુમાવી દીધી. આ 34 બોલમાં, ભારતીય ટીમ પોતાની ઈનિંગમાં ફક્ત 20 રન ઉમેરી શકી. આ રીતે, ભારતની પહેલી ઈનિંગ 224 રન પર સમાપ્ત થઈ હતી. કરુણ નાયરે સૌથી વધુ 57 રન બનાવ્યા હતા.
તોફાની શરૂઆત બાદ ઈંગ્લેન્ડ નિષ્ફળ ગયું
બેન ડકેટ અને ઝેક ક્રોલીએ ઈંગ્લેન્ડને તોફાની શરૂઆત અપાવી. બંનેએ 13મી ઓવરમાં જ ટીમનો સ્કોર 90 રનથી પાર પહોંચાડી દીધો. ડકેટ અને ક્રોલીએ 92 રનની ઓપનિંગ પાર્ટનર કરી, પરંતુ ડકેટ 43 રન બનાવીને આઉટ થયો. ક્રોલીએ 64 રન બનાવ્યા, પરંતુ તેના આઉટ થયા પછી, વિકેટ પડવાની પ્રક્રિયા શરૂ થઈ.
જો રૂટે 29 રન બનાવ્યા, જ્યારે હેરી બ્રુક અંત સુધી ક્રીઝ પર રહ્યો અને 53 રન બનાવીને આઉટ થયા. ઈંગ્લેન્ડે 92 રન સુધી એક પણ વિકેટ નહતી ગુમાવી, પરંતુ આગામી 155 રનમાં તેણે તેની બધી 10 વિકેટ ગુમાવી દીધી. હકીકતમાં, ઈંગ્લેન્ડે 9 વિકેટ ગુમાવી હતી, છતાં તેને ઓલઆઉટ જાહેર કરવામાં આવ્યું હતું. કારણ કે ક્રિસ વોક્સ ઈજાના કારણે પાંચમી ટેસ્ટમાંથી બહાર છે.
ભારત પાસે 52 રનની લીડ છે
ભારત માટે યશસ્વી જયસ્વાલે ઈનિંગની શરૂઆત શાનદાર કરી. જયસ્વાલે 44 બોલમાં પોતાની ફિફ્ટી પૂરી કરી. રસપ્રદ વાત એ હતી કે જયસ્વાલે સિક્સ સાથે પોતાની અડધી સદી પૂરી કરી. કેએલ રાહુલ માત્ર 7 રન બનાવીને આઉટ થયો, જ્યારે સાઈ સુદર્શન પિચમાં અસામાન્ય ઉછાળાનો શિકાર બન્યો, તે 11 રન બનાવીને આઉટ થયો.
