હાર્દિક પંડ્યા ઘરેલું ટુર્નામેન્ટમાંથી પણ બહાર થયો, સૈયદ મુશ્તાક અલી ટ્રોફી માટે બરોડાની ટીમમાં ન મળ્યું સ્થાન

ભારતીય ક્રિકેટર હાર્દિક પંડ્યા ઘણા સમયથી ઇજાઓથી પીડાઈ રહ્યો છે અને હાલમાં બેંગલુરુમાં BCCI સેન્ટર ઓફ એક્સેલન્સ ખાતે રિહેબ હેઠળ છે. આના કારણે તેની વાપસીમાં વિલંબ થયો છે. હવે, સમાચાર આવી રહ્યા છે કે હાર્દિક સ્થાનિક T20 ટુર્નામેન્ટ સૈયદ મુશ્તાક અલી ટ્રોફી પણ ચૂકી જશે. બરોડા ટીમે ટુર્નામેન્ટ માટે તેની 15 સભ્યોની ટીમની જાહેરાત કરી છે, પરંતુ હાર્દિકનું નામ સામેલ નથી. તેના સ્થાને તેના ભાઈ કૃણાલ પંડ્યાને ટીમની કેપ્ટનશિપ સોંપવામાં આવી છે.

હાર્દિકે T20 વર્લ્ડ કપ પછી કોઈ આંતરરાષ્ટ્રીય નથી મેચ રમી

હાર્દિક પંડ્યાનો છેલ્લી આંતરરાષ્ટ્રીય મેચ 8 માર્ચે T20 વર્લ્ડ કપ 2026 ફાઈનલ હતી. આ મેચ ન્યુઝીલેન્ડ સામે રમાઈ હતી. તેણે છેલ્લા આઠ મહિનામાં કોઈ આંતરરાષ્ટ્રીય મેચ નથી રમી અને લગભગ છ મહિનાથી કોઈ સ્પર્ધાત્મક ક્રિકેટ નથી રમી. તેને ઓક્ટોબરમાં ઓસ્ટ્રેલિયા A સામે ODI સિરીઝ માટે ઈન્ડિયા A ટીમમાં પસંદ કરવામાં આવ્યો હતો. જોકે, પગની ઈજાને કારણે તેને સિરીઝમાંથી બહાર કરવામાં આવ્યો હતો. ત્યારબાદ તે ન્યુઝીલેન્ડ પ્રવાસમાંથી પણ બહાર થઈ ગયો, જ્યાં તે T20 અને ODI સિરીઝ રમવાનો હતો.

હાર્દિક CoE ખાતે રિહેબ હેઠળ છે

હાર્દિક હાલમાં બેંગલુરુમાં સેન્ટર ઓફ એક્સેલન્સમાં છે અને છેલ્લા કેટલાક સમયથી ત્યાં રહે છે. અહેવાલો અનુસાર, તેણે રહેવા માટે એક ઘર પણ ભાડે લીધું છે. હાર્દિક હજુ પણ અસ્વસ્થતા વિના બોલિંગ નથી કરી શકતો, જ્યારે પણ તે બોલિંગ કરવાનો પ્રયાસ કરે છે, ત્યારે તેને દુખાવો થાય છે. આ કારણે તે ક્રિકેટથી દૂર છે. જોકે, તેની ઈજાઓ સતત બદલાતી રહી છે. IPL દરમિયાન તેને પીઠની ઇજા થઈ હતી, જેના કારણે તેણે કેટલીક મેચો ગુમાવવી પડી હતી, અને સૂર્યકુમાર યાદવે કેપ્ટન તરીકેની જવાબદારી સંભાળી હતી. જ્યારે આ કમરની સમસ્યા ઉકેલાઈ ગઈ, ત્યારે તેને પગમાં ખેંચાણનો સામનો કરવો પડ્યો. આ નવી ઈજાએ તેને ટીમ ઈન્ડિયાના આયર્લેન્ડ અને ઈંગ્લેન્ડના પ્રવાસનો ભાગ બનવાથી રોક્યો.

હાર્દિક પંડ્યા આવતા વર્ષે યોજાનાર ODI વર્લ્ડ કપ પહેલા ભારતીય ટીમ માટે એક મહત્ત્વપૂર્ણ ખેલાડી છે. સાઉથ આફ્રિકા અને ઝિમ્બાબ્વેની પિચો પર પેસ બોલિંગ ઓલરાઉન્ડર તરીકેની તેની ભૂમિકા વધુ મહત્ત્વપૂર્ણ બની જાય છે. ભારતીય ટીમના હેડ કોચે તાજેતરમાં જણાવ્યું હતું કે જસપ્રીત બુમરાહ અને હાર્દિક વર્લ્ડ કપ માટે ટીમના સૌથી મહત્ત્વપૂર્ણ ખેલાડીઓ છે અને તેથી, તેને સંપૂર્ણપણે સ્વસ્થ થવા માટે પૂરતો સમય આપવો જોઈએ.

સૈયદ મુશ્તાક અલી ટ્રોફી માટે બરોડાની ટીમ

કૃણાલ પંડ્યા (કેપ્ટન), અતિત શેઠ (વાઈસ-કેપ્ટન), દીપક હુડા, શિવાલિક શર્મા, શાશ્વત રાવત, અમિત પાસી (વિકેટકીપર), જિતેશ શર્મા (વિકેટકીપર), ભાનુ પાનિયા, મહેશ પિઠિયા, પરિક્ષિત પાટીદાર, હેમંત પુંડે, રાજ લિંબાણી, રસિક ડાર, ધ્રુવ બી. પટેલ, સફવાન પટેલ.