ગૌતમ ગંભીર લાંબો સમય ટકી શકશે નહીં... વર્લ્ડ કપના હીરોએ હેડ કોચ વિશે કર્યો મોટો દાવો

ગૌતમ ગંભીરે ટીમ ઈન્ડિયાના કોચ તરીકે શાનદાર શરૂઆત કરી છે. તેના નેતૃત્વમાં સૂર્યકુમાર યાદવની કેપ્ટન્સીમાં, ભારતીય ટીમે શ્રીલંકાને ત્રણ મેચની T20 સીરિઝમાં 3-0થી હરાવ્યું હતું. T20 વર્લ્ડ કપ બાદ રાહુલ દ્રવિડના કોચ પદ છોડવાના નિર્ણય બાદ ગંભીરને આ જવાબદારી મળી છે. ગંભીરની મેન્ટરશિપ હેઠળ KKRએ IPL 2024નું ટાઇટલ જીત્યું. જોકે, ભૂતપૂર્વ ભારતીય ક્રિકેટર અને 2007 T20 વર્લ્ડ કપ વિજેતા જોગીન્દર શર્માનું માનવું છે કે, ગંભીર લાંબા સમય સુધી હેડ કોચ તરીકે રહી શકશે નહીં.

જોગીન્દર શર્માએ શું કહ્યું?

જોગીન્દર શર્માનું કહેવું છે કે, ગૌતમ ગંભીરના ખેલાડીઓ સાથે મતભેદ હોઈ શકે છે. તેણે શુભંકર મિશ્રાના પોડકાસ્ટ દરમિયાન કહ્યું, 'ગૌતમ ગંભીર ટીમની કમાન સંભાળવા જઈ રહ્યો છે પરંતુ હું માનું છું કે, ગૌતમ ગંભીર લાંબો સમય ટકી શકશે નહીં. કારણ કે ગૌતમ ગંભીરના પોતાના કેટલાક નિર્ણયો છે. શક્ય છે કે કોઈ ખેલાડી સાથે અણબનાવ થઈ શકે. હું વિરાટ કોહલીની વાત નથી કરી રહ્યો. ગૌતમ ગંભીરના નિર્ણયો મોટાભાગે એવા હોય છે જે બીજાને પસંદ નથી આવતા.

2007માં ભારતની ટી-20 વર્લ્ડ કપ જીતમાં છેલ્લી ઓવર ફેંકનાર જોગીન્દરે કહ્યું, 'ગૌતમ ગંભીર સીધી વાત કરનારો છે. તે કોઈની પાસે જવાનો નથી. ગૌતમ ગંભીર કોઈની ચાપલુસી કરનારો નથી. તેને ક્રેડિટ આપનારા આપણે જ છીએ. તે પોતાનું કામ કરે છે, સાચા દિલથી કરે છે, ખૂબ પ્રામાણિકતાથી કરે છે.

2027 સુધી જવાબદારી મળી

ગૌતમ ગંભીરને 2027 સુધી ભારતીય હેડ કોચની જવાબદારી મળી છે. ભારતીય ટીમે આ સમયગાળા દરમિયાન ચાર આઈસીસી ઈવેન્ટ્સ રમવાની છે. જેમાં 2027માં યોજાનાર વર્લ્ડ કપનો પણ સમાવેશ થાય છે. ભારતીય ટીમ પણ પરિવર્તનના સમયગાળામાંથી પસાર થઈ રહી છે. રોહિત અને કોહલીએ ટી-20માંથી નિવૃત્તિ લઈ લીધી છે. ટીમ ઈન્ડિયાને જલ્દી જ વનડે અને ટેસ્ટમાં પણ નવો કેપ્ટન શોધવો પડશે. આ કારણે ગંભીર પર મોટી જવાબદારી આવવાની છે.