ડેવિડ વોર્નરનો મોટો ખુલાસો, સેન્ડપેપર વિવાદની તપાસમાં સ્ટાર્ક, લિયોન અને હેઝલવુડની પૂછપરછ જ નહતી થઈ!
2018માં સાઉથ આફ્રિકા અને ઓસ્ટ્રેલિયા વચ્ચે કેપટાઉનમાં રમાયેલી ટેસ્ટ મેચ દરમિયાન થયેલા સેન્ડપેપર વિવાદને લઈને ડેવિડ વોર્નરે મોટો આરોપ લગાવ્યો છે. આ મામલે વોર્નર અને તત્કાલીન કેપ્ટન સ્ટીવ સ્મિથ પર 12 મહિના માટે પ્રતિબંધ મૂકવામાં આવ્યો હતો, જ્યારે કેમેરોન બેનક્રોફ્ટને નવ મહિના માટે સસ્પેન્ડ કરવામાં આવ્યો હતો. આ ઉપરાંત, વોર્નર હવે ક્યારેય ઓસ્ટ્રેલિયાની ટીમનું નેતૃત્વ નહીં કરી શકે તેવો નિર્ણય પણ લેવામાં આવ્યો હતો.
ક્રિકેટ ઓસ્ટ્રેલિયાએ આ મામલે સંપૂર્ણ તપાસ કર્યા બાદ આ નિર્ણય સંભળાવ્યો હતો. જોકે, વોર્નરે હવે આ તપાસને 'કવર-અપ' ગણાવી છે.
વોર્નરે ઇન્સ્ટાગ્રામ પર લખ્યું, "મારી જાણકારી મુજબ, ક્રિકેટ ઓસ્ટ્રેલિયાએ 2018માં પોતાની તપાસ દરમિયાન જોશ હેઝલવુડ, નાથન લિયોન કે મિચેલ સ્ટાર્કની પૂછપરછ નહતી કરી. જો આ સાચું હોય, તો પછી ક્રિકેટ ઓસ્ટ્રેલિયા કેવી રીતે કહી શકે કે બોલર્સને આ સમગ્ર મામલાની જાણ નહતી?"
તેણે વધુમાં લખ્યું, "એવું લાગે છે કે તેમણે શરૂઆતથી જ નક્કી કરી લીધું હતું કે કોને દોષી ઠેરવવા છે. ત્યારબાદ પોતાના હેતુને પૂર્ણ કરવા માટે નબળી તપાસ કરવામાં આવી અને હવે તેઓ આ ખોટી વાતને જાળવી રાખવા માંગે છે કે બોલર્સને કંઈ ખબર નહતી. આ સમગ્ર મામલો કવર-અપ જેવો લાગે છે."
આઠ વર્ષ જૂની આ ઘટના તાજેતરમાં ફરી ચર્ચામાં આવી છે. ઓસ્ટ્રેલિયાના પૂર્વ ઓપનર ઉસ્માન ખ્વાજાએ પોતાની આત્મકથા 'સબર' માં દાવો કર્યો હતો કે બોલ સાથે ચેડાં કરવા માટે સેન્ડપેપરનો ઉપયોગ કરવામાં આવી રહ્યો હતો તેની જાણ સમગ્ર ટીમને હતી.
ડેવિડ વોર્નરે પણ ખ્વાજાના દાવાનું સમર્થન કર્યું છે. શનિવારે તેણે સવાલ ઉઠાવ્યો હતો કે જો ક્રિકેટ ઓસ્ટ્રેલિયાએ બોલર્સની પૂછપરછ જ નહતી કરી, તો પછી તેઓ આ સમગ્ર ઘટનાથી અજાણ હતા તેવો દાવો કેવી રીતે કરી શકે?
જોકે, વોર્નરે ઓસ્ટ્રેલિયાના વર્તમાન કેપ્ટન પેટ કમિન્સનું નામ નથી લીધું. કમિન્સ પણ 2018માં કેપટાઉનમાં રમાયેલી તે ટેસ્ટ મેચનો ભાગ હતો.
શું છે સમગ્ર વિવાદ?
2021માં કમિન્સ, હેઝલવુડ, સ્ટાર્ક અને લિયોન સહિતના બોલિંગ ગ્રુપે એક નિવેદન જાહેર કર્યું હતું. તેમાં તેમણે કહ્યું હતું કે મેદાન પર બોલ સાથે ચેડાં કરવા માટે સેન્ડપેપર લઈ જવામાં આવી રહ્યું હતું તેની તેમને કોઈ જાણકારી નહોતી. આજ સુધી તેઓ પોતાના આ નિવેદન પર મક્કમ છે.
શુક્રવારે પેટ કમિન્સે 68 મિનિટની લાંબી પ્રેસ કોન્ફરન્સ યોજી હતી. આ દરમિયાન તેણે ખ્વાજા દ્વારા કરવામાં આવેલા તમામ દાવાઓને ફગાવી દીધા હતા અને તેમને 'સંપૂર્ણપણે વાહિયાત' ગણાવ્યા હતા.
કમિન્સના જાહેર નિવેદનના થોડા કલાકો બાદ વોર્નરે ઓસ્ટ્રેલિયન કેપ્ટન પર નિશાન સાધ્યું હતું. તેણે કહ્યું હતું કે કમિન્સે ખ્વાજાને મુશ્કેલીમાં મૂકી દીધો છે અને તે પોતાના બાળપણના મિત્ર માટે દુઃખ અનુભવે છે.
ખ્વાજાએ પોતાના પુસ્તકમાં એવો પણ દાવો કર્યો હતો કે કેપટાઉન ટેસ્ટ પહેલા રમાયેલી બીજી ટેસ્ટ મેચમાં પણ બોલ સાથે ચેડાં કરવાની ઘટના બની હતી. જોકે, કમિન્સે આ દાવાને પણ નકારી કાઢ્યો હતો.
જોકે, કમિન્સે એ વાત સ્વીકારી હતી કે તે સમય દરમિયાન ટીમના ડ્રેસિંગ રૂમનું વાતાવરણ યોગ્ય નહતું અને ખેલાડીઓમાં 'કોઈપણ ભોગે જીત મેળવવાની' માનસિકતા હતી.
