VIDEO: ક્રિસ્ટિયાનો રોનાલ્ડોની વિદાય? સ્પેન સામે હાર બાદ પોર્ટુગલના સુપરસ્ટારની આંખો છલકાઈ, સ્ટેડિયમમાં ફેન્સ પણ રડી પડ્યા
છેલ્લું અપડેટ : 07 Jul 2026
Cristiano Ronaldo World Cup 2026 : જ્યારે રમતગમતના ઇતિહાસમાં કોઈ મહાન ખેલાડી પોતાની સફરના અંતિમ પડાવ પર હોય, ત્યારે આખી દુનિયાની નજર તેના પર ટકેલી હોય છે, ક્રિસ્ટિયાનો રોનાલ્ડો સાથે પણ કંઈક એવું જ થયું. ફિફા વર્લ્ડ કપ 2026માં પોર્ટુગલ અને સ્પેન વચ્ચે રમાયેલી રોમાંચક મેચ માત્ર એક હાર-જીત નહોતી, પરંતુ એક યુગની અંતિમ ક્ષણોની સાક્ષી હતી. રોનાલ્ડો કદાચ વર્લ્ડ કપની એ એક ટ્રોફી ક્યારેય જીતી ન શક્યો જે હંમેશા તેનાથી દૂર રહી, પરંતુ તેણે ફૂટબોલ ચાહકોના દિલમાં જે સ્થાન મેળવ્યું છે તે ક્યારેય ભૂલી શકાશે નહીં.
રોનાલ્ડોની છેલ્લી વર્લ્ડકપ સફર સમાપ્ત, મેદાન પર જ રડી પડ્યો
મેચ પૂરી થઈ ત્યારે સ્કોરબોર્ડ પર પોર્ટુગલ 0 અને સ્પેન 1 દેખાઈ રહ્યું હતું. સ્પેનના ખેલાડીઓ ઉજવણી કરી રહ્યા હતા અને રોનાલ્ડો મેદાન પર બિલકુલ શાંત ઊભો હતો. તે પોતાની કારકિર્દીમાં છેલ્લી વાર આ ભવ્ય સ્ટેજને નિહાળી રહ્યો હતો. આ શાંત ક્ષણો પછી રોનાલ્ડોની આંખોમાંથી આંસુ વહી પડ્યા. સ્ટોપેજ ટાઈમમાં મિકેલ મેરિનોએ કરેલા ગોલે સ્પેનને ક્વાર્ટર ફાઇનલમાં પહોંચાડી દીધું અને રોનાલ્ડોની છેલ્લી વર્લ્ડ કપ સફર પર પૂર્ણવિરામ મૂકી દીધું.
રોનાલ્ડોને મેદાન પરથી બહાર જતો જોઈને સ્ટેડિયમમાં હાજર તેના ફેન્સ પણ રડી પડ્યા હતા. દુનિયા આંતરરાષ્ટ્રીય ફૂટબોલની એક સૌથી મોટી કારકિર્દીના અંતિમ પ્રકરણની સાક્ષી બની રહી હતી. 41 વર્ષની ઉંમરે રોનાલ્ડોમાં કદાચ પહેલા જેવી સ્પીડ નહોતી રહી, પરંતુ તેનો લડાયક મૂડ અકબંધ હતો. પોર્ટુગલના મેનેજર રોબર્ટો માર્ટિનેઝે તેના પર પૂરો ભરોસો રાખ્યો અને રોનાલ્ડોએ પણ મેદાન પર કટોકટીની ક્ષણોમાં સ્પેનના ડિફેન્ડર્સ સામે એકલા હાથે સંઘર્ષ કરીને એ ભરોસો સાર્થક કરવાનો પ્રયાસ કર્યો.
મેચની શરૂઆતથી જ લુઈસ ડી લા ફુએન્ટેની સ્પેનિશ ટીમ મજબૂત દેખાતી હતી. રોડ્રી, પેડ્રી અને દાની ઓલ્મો પોર્ટુગલના ડિફેન્સ લાઇન વચ્ચે સતત જગ્યા બનાવી રહ્યા હતા. પોર્ટુગલના ગોલકીપર ડિઓગો કોસ્ટાએ શાનદાર સેવ્સ કર્યા અને ડિફેન્સમાં રૂબેન ડાયસ તથા રેનાટો વેઇગાની જોડીએ સ્પેનના આક્રમણને 90 મિનિટ સુધી રોકી રાખ્યું. ડિફેન્સમાં નૂનો મેન્ડિસે સ્પેનના સ્ટાર ખેલાડી લેમિન યામલને આખી મેચ દરમિયાન શાંત રાખ્યો હતો. પરંતુ જ્યારે મેન્ડિસ ઇન્જરીના કારણે મેદાનની બહાર ગયો, ત્યારે પોર્ટુગલનું સંતુલન બગડ્યું. સ્પેને આ તક ઝડપી લીધી. 6 મિનિટના સ્ટોપેજ ટાઈમમાં ફેબિયન રુઇઝ અને ફેરન ટોરેસના પાસિંગની મદદથી મિકેલ મેરિનોએ ડિફેન્સની નાની ભૂલનો ફાયદો ઉઠાવીને બોલને નેટમાં ધકેલી દીધો.
