Champions Trophy 2025 / ભારતીય ટીમની જાહેરાતની તારીખ લંબાવાઈ, હવે આ દિવસે થઈ શકે છે જાહેર

ચેમ્પિયન્સ ટ્રોફી 2025ને લઈને ઉત્સાહ દિવસેને દિવસે વધી રહ્યો છે. ICC 8 વર્ષ પછી આ ટૂર્નામેન્ટ પાછુ લાવ્યું છે. દરમિયાન, એવા અહેવાલો હતા કે ભારતીય ટીમની જાહેરાત 12 જાન્યુઆરી સુધીમાં થઈ શકે છે, પરંતુ હવે એક અહેવાલ સામે આવ્યો છે કે ટીમની જાહેરાતમાં વિલંબ થવાની સંભાવના છે. સિલેકશન કમિટી નિયમો મુજબ ટીમની જાહેરાત કરવા માટે ICC પાસેથી થોડો વધુ સમય માંગી શકે છે. જોકે, ઈંગ્લેન્ડ સામેની T20 ટીમની જાહેરાત આગામી થોડા દિવસોમાં શક્ય છે.

આ પણ વાંચો: ચેમ્પિયન્સ ટ્રોફી પહેલા ભારતીય ખેલાડીએ લીધો સંન્યાસ

જ્યારે પણ કોઈ મલ્ટી નેશનલ ટૂર્નામેન્ટ હોય છે, ત્યારે નિયમો મુજબ, ટીમોએ તેના લગભગ એક મહિના પહેલા તેમની સ્કવોડની જાહેરાત કરવાની હોય છે. જોકે, પછીથી તેમાં કેટલાક ફેરફારો કરી શકાય છે. પરંતુ આ વખતે ICC એ 5 અઠવાડિયા પહેલા ટીમની જાહેરાત કરવાનો આદેશ આપ્યો હતો. એવી શક્યતાઓ વધુ છે કે જે ખેલાડીઓને ઈંગ્લેન્ડ સામેની ત્રણ મેચની ODI સિરીઝમાં તક આપવામાં આવશે તેઓ 2025ની ચેમ્પિયન્સ ટ્રોફીમાં રમશે.

ક્યારે જાહેર થશે ટીમ?

અગાઉ ટીમની જાહેરાતની તારીખ 12 જાન્યુઆરી હોવાનું કહેવામાં આવ્યું હતું. પરંતુ હવે અહેવાલ અનુસાર, ભારતીય ટીમની જાહેરાત લગભગ એક અઠવાડિયા પછી 18 કે 19 જાન્યુઆરીએ થઈ શકે છે. તેના બરાબર એક મહિના પછી, એટલે કે 19 ફેબ્રુઆરીથી, ચેમ્પિયન્સ ટ્રોફી શરૂ થશે. આ ઉપરાંત, એવું પણ સામે આવ્યું છે કે ઈંગ્લેન્ડ સામેની T20 સિરીઝ માટે ટીમમાં વધુ ફેરફારો નહીં કરવામાં આવે. બાંગ્લાદેશ અને સાઉથ આફ્રિકા સામેની સિરીઝમાં રમનારા મોટાભાગના ખેલાડીઓ ઈંગ્લેન્ડ સામે પણ રમશે.

ચેમ્પિયન્સ ટ્રોફીમાં રમશે મોહમ્મદ શમી?

ચેમ્પિયન્સ ટ્રોફી 2025 પહેલા ભારતીય ટીમ માટે સારા સમાચાર એ પણ છે કે મોહમ્મદ શમીને બેંગલુરુમાં BCCI સેન્ટર ઓફ એક્સેલન્સ તરફથી ફિટનેસ અંગે ક્લીનચીટ મળી ગઈ છે અથવા ટૂંક સમયમાં મળશે. આવી સ્થિતિમાં, શમી ફક્ત ચેમ્પિયન્સ ટ્રોફીમાં જ નહીં પરંતુ ઈંગ્લેન્ડ સામેની ODI સિરીઝમાં પણ રમતો જોવા મળી શકે છે.