પિચ પર ઉતર્યા વિના જ આવી ગયું પરિણામ, અરુણાચલ પ્રદેશે રણજી ટ્રોફી મેચ છોડી, નાગાલેન્ડ જીતી ગયું
છેલ્લું અપડેટ : 11 Oct 2026
રણજી ટ્રોફી 2026-27ની શરૂઆતમાં થયેલી એક મેચના પરિણામથી બધાને આશ્ચર્ય થયું છે. પ્લેટ ગ્રુપમાં અરુણાચલ પ્રદેશ અને નાગાલેન્ડ વચ્ચે મેચ રમવાની હતી. જોકે, અરુણાચલ પ્રદેશની ટીમ મેચમાં હાજર ન રહી શકી, જેના કારણે નાગાલેન્ડ વોકઓવર દ્વારા જીતી ગયું. સામાન્ય રીતે, જ્યારે કોઈ ટીમ મેચમાંથી ખસી જાય છે, ત્યારે વિરોધી ટીમને જીતવા માટે મેદાન પર હાજર રહેવું પડે છે. જોકે, BCCIએ જાહેરાત કરી હતી કે અરુણાચલ પ્રદેશની ટીમ પહેલી મેચ માટે નહીં આવે, જેના કારણે નાગાલેન્ડની ટીમ મેદાન પર રહેવાને બદલે ઘરે પરત ફરી.
નાગાલેન્ડ વોકઓવર દ્વારા જીત્યું
અરુણાચલ ક્રિકેટ એસોસિએશન (ACA) હાલમાં કાનૂની વિવાદમાં ફસાયેલું છે. ACA બે જૂથોમાં વિભાજીત થઈ ગયું છે, અને તેમની વચ્ચે કેસ ચાલી રહ્યો છે. આ કારણે, 2026-27 માટે અરુણાચલ પ્રદેશની રણજી ટ્રોફી ટીમની જાહેરાત નથી થઈ શકી. 11 ઓક્ટોબરે નાગાલેન્ડ સામે રમવાનું હતું, પરંતુ અરુણાચલ પ્રદેશની ટીમ હાજર નહતી.
BCCIએ અધિકારીઓને પહેલાથી જ જાણ કરી દીધી હતી કે અમદાવાદમાં આ પ્લેટ ગ્રુપ મેચ શરૂ નહીં થઈ શકે. સામાન્ય રીતે, જો કોઈ ટીમ મેચ છોડી દે છે, તો વિરોધી ટીમ જીતવા માટે મેદાન પર હોવી જોઈએ. જોકે, BCCI તરફથી માહિતી મળ્યા બાદ નાગાલેન્ડે મેદાન પર આવવાને બદલે એરપોર્ટ જવાનો નિર્ણય લીધો.
BCCIના સચિવ દેવજીત સૈકિયાએ અગાઉ સ્પષ્ટતા કરી હતી કે ACAમાં બે જૂથો વચ્ચે ચાલી રહેલા તણાવ ક્રિકેટના નિર્ણયો અને ટીમ પસંદગીમાં અવરોધ લાવી રહ્યા છે. અરુણાચલ પ્રદેશના છ જિલ્લાઓના ક્રિકેટ એસોસિએશનો આરોપ લગાવ્યો છે કે સત્તાવાર ACA ચૂંટણીમાં નિયમોનું ઉલ્લંઘન થયું છે અને ફરીથી ચૂંટણીની માંગ કરી છે. આ કેસ હાલમાં ગુવાહાટી હાઈકોર્ટની ઇટાનગર શાખામાં પેન્ડિંગ છે.
17 વર્ષમાં પહેલીવાર કોઈ મેચ રદ્દ થઈ
અરુણાચલ પ્રદેશે રમવાનો ઇનકાર કર્યા પછી, નાગાલેન્ડને વિજેતા જાહેર કરવામાં આવ્યું અને છ પોઈન્ટ આપવામાં આવ્યા. અરુણાચલ પ્રદેશ આગામી અઠવાડિયે સિક્કિમ સામે રમવાનું છે. જો કાનૂની કાર્યવાહી આગળ ન વધે અને કોઈ પરિણામ ન આવે, તો આ મેચ પણ રદ્દ થઈ શકે છે. 17 વર્ષમાં આ પહેલીવાર છે જ્યારે રણજી ટ્રોફી મેચ રદ્દ કરવામાં આવી છે. અગાઉ, 2009માં, સર્વિસિસ ટીમે સુરક્ષા ચિંતાઓને કારણે શ્રીનગર જવાનો ઇનકાર કર્યો હતો અને જમ્મુ અને કાશ્મીર વોકઓવર દ્વારા જીત્યું હતું.
