Brian Bennett World Record: 21 વર્ષીય બેટ્સમેને ક્રિકેટમાં નવી હિસ્ટ્રી રચી સૌને ચોંકાવ્યા
છેલ્લું અપડેટ : 03 Oct 2025
બેટ્સમેન બ્રાયન બેનેટે ક્રિકેટ જગતમાં અજાયબી કરી છે. 21 વર્ષીય ઝિમ્બાબ્વેના આ બેટ્સમેન બ્રાયને 72 કલાકમાં પોતાનો બીજો વિશ્વ રેકોર્ડ બનાવ્યો છે. 30 સપ્ટેમ્બરના રોજ તે ત્રણેય ફોર્મેટમાં સદી ફટકારનાર વિશ્વનો સૌથી નાની ઉંમરનો બેટ્સમેન બન્યો હતો. ત્યારબાદ 2 ઓક્ટોબરના દિવસે કેન્યા સામેની T20 વર્લ્ડ કપ 2026 ક્વોલિફિકેશન મેચમાં તેણે બીજો મોટો રેકોર્ડ બનાવ્યો છે. જેમાં તે T20 ઇન્ટરનેશનલ મેચમાં છ બોલમાં છ ચોગ્ગા ફટકારનાર પ્રથમ બેટ્સમેન બન્યો છે.
બ્રાયન બેનેટનો નવો વર્લ્ડ રેકોર્ડ
21 વર્ષીય ખેલાડીએ કેન્યા સામેની વર્લ્ડ કપ ક્વોલિફાયરની બીજી સેમિફાઇનલમાં ઝિમ્બાબ્વેની ઇનિંગની ચોથી ઓવરમાં આ સિદ્ધિ મેળવી હતી. તેણે લુકાસ ઓલુઓચ નામના કેન્યાના બોલર સામે છ બોલમાં છ ચોગ્ગા ફટકારવાનો રેકોર્ડ બનાવ્યો હતો. એક ઓવરમાં છ ચોગ્ગા ફટકારીને વર્લ્ડ રેકોર્ડ બનાવવા ઉપરાંત બ્રાયન બેનેટે 204થી વધુના સ્ટ્રાઇક રેટથી 25 બોલમાં 51 રન પણ બનાવ્યા હતા. તેની ઇનિંગમાં આઠ ચોગ્ગા અને બે છગ્ગા સામેલ હતા.
બ્રાયન બેનેટે કેન્યા સામે 51 રન બનાવ્યા
કેન્યાએ મેચમાં પ્રથમ બેટિંગ કરી અને 20 ઓવરમાં 6 વિકેટ ગુમાવીને 122 રન બનાવ્યા. જવાબમાં બ્રાયન બેનેટે ઝિમ્બાબ્વે માટે ઇનિંગની શરૂઆત કરી. તેણે તેના સાથી ઓપનર સાથે પ્રથમ વિકેટ માટે 76 રન ઉમેર્યા. બેનેટ ઝિમ્બાબ્વે માટે આઉટ થનારો પ્રથમ બેટ્સમેન હતો. પરંતુ જતા પહેલા તેણે 76 રનની ઓપનિંગ ભાગીદારીમાં 51 રનનું યોગદાન આપ્યું હતું અને એક જ ઓવરમાં છ ચોગ્ગા ફટકારવાના તેના વિશ્વ રેકોર્ડે આમાં મુખ્ય ભૂમિકા ભજવી હતી.
30 સપ્ટેમ્બરે બનાવ્યો હતો આ રેકોર્ડ
આ પહેલા બ્રાયન બેનેટે 30 સપ્ટેમ્બરના રોજ તાંઝાનિયા સામે 111 રન બનાવ્યા હતા, જે તેની પ્રથમ T20 આંતરરાષ્ટ્રીય સદી હતી. આ સાથે તે આંતરરાષ્ટ્રીય ક્રિકેટના ત્રણેય ફોર્મેટમાં સદી ફટકારનાર વિશ્વનો સૌથી યુવા બેટ્સમેન બન્યો. બ્રાયન બેનેટે ODIમાં એક, ટેસ્ટ માં બે અને T20માં એક સદી ફટકારી છે.
