AFG vs AUS / T20 વર્લ્ડકપમાં અફઘાનિસ્તાને સર્જ્યો મોટો અપસેટ, 7 વખતની ચેમ્પિયન ઓસ્ટ્રેલિયન ટીમને હરાવી

T20 વર્લ્ડ કપ 2024માં અફઘાનિસ્તાને મોટો અપસેટ સર્જ્યો છે. તેણે 7 વખતની ચેમ્પિયન ઓસ્ટ્રેલિયન ટીમને હરાવી છે. સુપર 8ના મેચમાં અફઘાનિસ્તાનનો 21 રને વિજય થયો હતો. પ્રથમ બેટિંગ કરતા અફઘાનિસ્તાને 149 રનનો લક્ષ્યાંક આપ્યો હતો. જવાબમાં ઓસ્ટ્રેલિયાની ટીમ 127 રનના સ્કોર પર ઓલઆઉટ થઈ ગઈ હતી. અફઘાનિસ્તાન તરફથી ગુલાબદિન નાયબે 4 વિકેટ ઝડપી હતી. જ્યારે નવીન-ઉલ-હકે 3 વિકેટ લીધી હતી. ઓસ્ટ્રેલિયન ટીમે 6 વખત ODI વર્લ્ડ કપ અને એક વખત T20 વર્લ્ડ કપ જીત્યો છે.

ટોસ હાર્યા બાદ પ્રથમ બેટિંગ કરવા ઉતરેલી અફઘાન ટીમે 20 ઓવરમાં 6 વિકેટ ગુમાવીને 148 રન બનાવ્યા હતા. આ દરમિયાન ઓપનર ગુરબાઝે 49 બોલનો સામનો કરીને 60 રન બનાવ્યા હતા. તેણે 4 ચોગ્ગા અને 4 છગ્ગા ફટકાર્યા હતા. ઈબ્રાહિમ ઝદરાને 51 રનની ઈનિંગ રમી હતી. તેણે 48 બોલનો સામનો કર્યો અને 6 ચોગ્ગા ફટકાર્યા. આ દરમિયાન ઓસ્ટ્રેલિયા તરફથી પેટ કમિન્સે 3 વિકેટ ઝડપી હતી. એડમ ઝમ્પાએ 2 વિકેટ લીધી હતી.

અફઘાનિસ્તાન સામે ઘૂંટણિયે આવ્યું ઓસ્ટ્રેલિયા 

અફઘાનિસ્તાન સામે મેદાનમાં ઉતરેલી દિગ્ગજોથી ભરેલી કાંગારૂ ટીમે આત્મસમર્પણ કર્યું હતું. ઓસ્ટ્રેલિયાની ટીમ પૂરી 20 ઓવર પણ રમી શકી નહોતી. તે 19.2 ઓવરમાં 127 રન બનાવીને ઓલઆઉટ થઈ ગઈ હતી. ઓસ્ટ્રેલિયા તરફથી ગ્લેન મેક્સવેલે 41 બોલનો સામનો કરીને 59 રન બનાવ્યા હતા. તેણે 6 ચોગ્ગા અને 3 છગ્ગા ફટકાર્યા હતા. કેપ્ટન મિચેલ માર્શ 12 રન બનાવીને આઉટ થયો હતો. માર્કસ સ્ટોઇનિસ 11 રન બનાવીને આઉટ થયો હતો. ઓપનર ટ્રેવિસ હેડ ખાતું પણ ખોલાવી શક્યો નહોતો. સ્ટોઈનિસ 11 રન બનાવીને પેવેલિયન પરત ફર્યો હતો. મેથ્યુ વેડ 5 રન બનાવીને આઉટ થયો હતો.

અફઘાનિસ્તાનના બોલરોનું શાનદાર પ્રદર્શન

અફઘાનિસ્તાનના બોલરોએ ઓસ્ટ્રેલિયાન ટીમને પરેશાન કરી હતી. ગુલાબદિન નાયબે 4 ઓવરમાં માત્ર 20 રન આપીને 4 વિકેટ લીધી હતી. નવીન-ઉલ-હકે 4 ઓવરમાં 20 રન આપીને 3 વિકેટ લીધી હતી. મોહમ્મદ નબીએ 1 ઓવરમાં માત્ર 1 રન આપ્યો અને 1 વિકેટ લીધી. કેપ્ટન રાશિદ ખાનને પણ સફળતા મળી. ઓમરઝાઈએ ​​પણ એક વિકેટ લીધી હતી.