અભિષેક શર્માની સદી અને સંજુ સેમસનનું વિસ્ફોટક પ્રદર્શન, અફઘાનિસ્તાનને ક્લીન સ્વીપ કરવામાં આ હતા ભારતના 5 હીરો
છેલ્લું અપડેટ : 18 Sept 2026
અભિષેક શર્માની ધમાકેદાર સદીએ ભારતીય ટીમને ત્રીજી T20Iમાં અફઘાનિસ્તાનને હરાવવામાં મદદ કરી. આ સાથે, ભારતીય ટીમે સિરીઝ 3-0 થી જીતી લીધી છે. ત્રીજી મેચમાં પ્રથમ બેટિંગ કરતા, ટીમ ઈન્ડિયાએ 221 રનનો વિશાળ સ્કોર બનાવ્યો. જવાબમાં, અફઘાન ટીમ ફક્ત 94 રનમાં ઓલઆઉટ થઈ ગઈ અને 127 રનથી હારનો સામનો કરવો પડ્યો.
ભારત સામે 127 રનની હાર એ T20 ઈતિહાસમાં અફઘાનિસ્તાનની સૌથી મોટી હાર છે. વધુમાં, અફઘાન ટીમે T20I ફોર્મેટમાં ક્યારેય ભારતને હરાવ્યું નથી, જ્યારે ટીમ ઈન્ડિયાએ 12 મેચ જીતી છે. ભારતીય ટીમની 3-0 થી જીતમાં અભિષેક શર્માએ મુખ્ય ભૂમિકા ભજવી હતી. તેના સિવાય, અન્ય ખેલાડીઓ છે જેમણે ટીમ ઈન્ડિયાને સિરીઝ જીતવામાં મદદ કરી. ચાલો તમને આવા પાંચ ખેલાડીઓ વિશે જણાવીએ.
અભિષેક શર્મા
ઓપનર અભિષેક શર્માએ અફઘાનિસ્તાન સામે શાનદાર બેટિંગ કરી. પહેલી મેચમાં તેણે 82 રન બનાવ્યા હતા, પરંતુ સદી ચૂકી ગયો હતો. શર્માએ બીજી મેચમાં 39 રન બનાવ્યા હતા. ગુરુવારે રમાયેલી ત્રીજી મેચમાં અભિષેકે 108 રન બનાવ્યા હતા. તે સિરીઝમાં સૌથી વધુ રન બનાવનાર ખેલાડી હતો, ડાબા હાથના બેટ્સમેનએ ત્રણ મેચમાં 229 રન બનાવ્યા હતા. તેને પ્લેયર ઓફ ધ સિરીઝ પણ જાહેર કરવામાં આવ્યો હતો.
સંજુ સેમસન
વિકેટકીપર-બેટ્સમેન સંજુ સેમસન પહેલી મેચમાં ફ્લોપ રહ્યો હતો, જેના કારણે તેના ફોર્મ પર પ્રશ્નો ઉભા થયા હતા. જોકે, બીજી મેચમાં તેણે માત્ર 20 બોલમાં અડધી સદી ફટકારી હતી. ત્રીજી મેચમાં પણ સેમસનના બેટે સારું પ્રદર્શન કર્યું હતું, અડધી સદી ફટકારી હતી. સેમસન આખી સિરીઝમાં 117 રન બનાવીને સૌથી વધુ રન બનાવનાર ખેલાડીમાં બીજા નંબર પર રહ્યો હતો.
નીતિશ કુમાર રેડ્ડી
ઓલરાઉન્ડર નીતિશ કુમાર રેડ્ડીએ પણ અફઘાનિસ્તાન સામેની T20 સિરીઝમાં ટીમ ઈન્ડિયાની જીતમાં મુખ્ય ભૂમિકા ભજવી હતી. રેડ્ડીએ પહેલી મેચમાં ખરાબ બોલિંગ કરી હતી, પરંતુ બીજી અને ત્રીજી મેચમાં ત્રણ-ત્રણ વિકેટ લીધી હતી. તે ભલે બેટિંગમાં કંઈ ખાસ ન કરી શક્યો હોય, પરંતુ તેણે બોલિંગમાં કુલ છ વિકેટ લીધી. તે સિરીઝમાં સૌથી વધુ વિકેટ લેનાર બોલર બન્યો હતો.
અર્શદીપ સિંહ
ફાસ્ટ બોલર અર્શદીપ સિંહને ત્રીજી મેચમાં રમવાની તક નહતી મળી. જોકે, તેણે સિરીઝમાં શાનદાર બોલિંગ કરી. અર્શદીપે બે મેચમાં પાંચ વિકેટ લીધી. તેણે એક મેચ ઓછી રમી, છતાં તે સૌથી વધુ વિકેટ લેનાર બોલરમાં બીજા નંબર પર રહ્યો હતો.
ઈશાન કિશન
ઈશાન કિશન ત્રીજી T20 મેચમાં સારું પ્રદર્શન કરવામાં નિષ્ફળ ગયો હતો. તે 10 રન બનાવીને રન આઉટ થયો. જોકે, કિશને પ્રથમ બે મેચમાં ટીમ ઈન્ડિયાની જીતમાં મુખ્ય ભૂમિકા ભજવી હતી. ઈશાને સિરીઝમાં કુલ 90 રન બનાવ્યા, તે ભારત માટે સૌથી વધુ રન બનાવનાર બેટ્સમેનમાં ત્રીજા નંબર પર રહ્યો હતો.