Asia Cup 2025 / પાકિસ્તાન સામે ઈતિહાસ રચી શકે છે અભિષેક શર્મા, વિરાટ કોહલીનો રેકોર્ડ તોડવાથી 11 રન દૂર
છેલ્લું અપડેટ : 27 Sept 2025
એશિયા કપ 2025ની ફાઈનલમાં બધાની નજર ભારતીય ઓપનર અભિષેક શર્મા પર રહેશે. તેના ફોર્મને જોતા, ટીમ ઈન્ડિયા ઈચ્છશે કે તે ફાઈનલમાં પણ પાકિસ્તાન સામે ટીમ માટે રન બનાવે, જ્યારે પાકિસ્તાન તેને જલ્દી આઉટ કરવાનો પ્રયાસ કરશે.
અભિષેક શર્મા આ એશિયા કપમાં ખૂબ જ શાનદાર ફોર્મમાં રહ્યો છે, તે ફક્ત ભારત માટે જ નહીં પરંતુ ટુર્નામેન્ટમાં પણ અત્યાર સુધી સૌથી વધુ રન બનાવનારા ખેલાડીઓની યાદીમાં ટોપ પર છે. ફાઈનલ પહેલાની ત્રણેય મેચમાં અભિષેક શર્માએ સતત અડધી સદી ફટકારી છે, અને હવે તે વિરાટ કોહલીનો રેકોર્ડ તોડવાની ખૂબ નજીક છે.
અભિષેક શર્મા વિરાટ કોહલીનો રેકોર્ડ તોડવાથી 11 રન દૂર
અભિષેક શર્માએ આ ટુર્નામેન્ટમાં સૌથી વધુ રન બનાવ્યા છે, તેણે અત્યાર સુધી રમેલી 6 મેચમાં 309 રન બનાવ્યા છે, તમને જણાવી દઈએ કે અભિષેક શર્મા T20 એશિયા કપમાં 300 રનનો આંકડો પાર કરનાર પહેલો ખેલાડી બની ગયો છે અને હવે તે T20 ટુર્નામેન્ટમાં સૌથી વધુ રન બનાવનાર ખેલાડી બનવાની ખૂબ નજીક છે. T20 ટુર્નામેન્ટમાં સૌથી વધુ રન બનાવવાનો રેકોર્ડ વિરાટ કોહલીના નામે છે, જેણે 2014ના T20 વર્લ્ડ કપમાં 319 રન બનાવ્યા હતા.
ફાઈનલમાં અભિષેક શર્મા પાકિસ્તાન સામે 11 રન બનાવતાની સાથે જ તે T20 ટુર્નામેન્ટમાં સૌથી વધુ રન બનાવનારા બેટ્સમેનોની યાદીમાં ટોચના સ્થાને પહોંચી જશે. હાલમાં, વિરાટ કોહલી આ યાદીમાં ટોપ પર છે, ત્યારબાદ તિલકરત્ને દિલશાન બીજા સ્થાને છે, જ્યારે અભિષેક ત્રીજા સ્થાને છે.
T20 ટુર્નામેન્ટમાં સૌથી વધુ રન બનાવનારા બેટ્સમેન (ફુલ મેમ્બર ટીમ)
- 319 રન - વિરાટ કોહલી (T20 વર્લ્ડ કપ 2014)
- 317 રન - તિલકરત્ને દિલશાન (T20 વર્લ્ડ કપ 2009)
- 309 રન - અભિષેક શર્મા (એશિયા કપ 2025)
- 306 રન - એરોન ફિન્ચ (T20 ટ્રાઈ-સિરીઝ 2018)
- 303 રન - બાબર આઝમ (T20 વર્લ્ડ કપ 2021)
- 302 રન - મહેલા જયવર્ધને (T20 વર્લ્ડ કપ 2010)