એબી ડી વિલિયર્સે પસંદ કર્યા 5 બેસ્ટ ક્રિકેટર્સ, વિરાટ કોહલીને ન કર્યો સામેલ; આ પાકિસ્તાનીને આપ્યું સ્થાન
છેલ્લું અપડેટ : 01 Sept 2025
દરેક ક્રિકેટ પ્રેમી એબી ડી વિલિયર્સ અને વિરાટ કોહલી વચ્ચેની મિત્રતા વિશે જાણે છે. બંને ખેલાડીઓ એકબીજાનો ખૂબ આદર કરે છે અને ઘણી વાર એકબીજાની પ્રશંસા કરી છે. પરંતુ જ્યારે સાઉથ આફ્રિકાના ભૂતપૂર્વ ક્રિકેટર ડી વિલિયર્સને તેના 5 બેસ્ટ ક્રિકેટર્સ (જેની સામે અને જેની સાથે રમ્યો હોય) વિશે પૂછવામાં આવ્યું, ત્યારે આશ્ચર્યજનક વાત એ હતી કે તેણે તેમાં વિરાટ કોહલીનો સમાવેશ નહતો કર્યો. સચિન તેંડુલકરનો તેની યાદીમાં સમાવેશ થાય છે. જોકે, આ પછી તેણે વિરાટની માફી પણ માંગી હતી.
એબી ડી વિલિયર્સે 5 બેસ્ટ ક્રિકેટર્સમાં સચિન તેંડુલકરના રૂપમાં એક ભારતીય ખેલાડીનો સમાવેશ કર્યો. તેના સિવાય, ડી વિલિયર્સે પાકિસ્તાની, ઓસ્ટ્રેલિયન, ઈંગ્લિશ અને સાઉથ આફ્રિકનના ખેલાડીઓની પસંદગી કરી હતી.
ડી વિલિયર્સે સાઉથ આફ્રિકાના ઓલરાઉન્ડર જેક્સ કાલિસ, ઈંગ્લેન્ડના એન્ડ્રુ ફ્લિન્ટોફ, ઓસ્ટ્રેલિયાના શેન વોર્નની પસંદગી કરી હતી. આ સિવાય તેણે પાકિસ્તાનના બોલર મોહમ્મદ આસિફની પણ પસંદગી કરી હતી.
વિરાટ કોહલીની માફી માંગી
જોકે, ડી વિલિયર્સે યાદીમાં વિરાટ કોહલીનો સમાવેશ ન કરવા બદલ માફી પણ માંગી હતી. એક પોડકાસ્ટમાં આ ખેલાડીઓના નામ આપતાં તેણે કહ્યું, "જ્યારે સચિન તેંડુલકર બેટિંગ કરવા આવતા હતા, ત્યારે જે રીતે તેમનું સ્વાગત કરવામાં આવતું હતું, એવું લાગતું હતું કે બધું જ બંધ થઈ ગયું છે. તેમને બેટિંગ કરતા જોવાનું ખૂબ સારું લાગે છે. વિરાટ કોહલી, માફ કરશો. આવા પ્રશ્નોના જવાબ આપવા થોડા મુશ્કેલ બની જાય છે."
એબી ડી વિલિયર્સ માને છે કે જેક્સ કાલિસ અત્યાર સુધીનો બેસ્ટ ક્રિકેટર છે. તેણે કહ્યું, "જેક્સ કાલિસ અત્યાર સુધીનો બેસ્ટ ઓલરાઉન્ડર અથવા બેસ્ટ ક્રિકેટર છે."
આ યાદીમાં પાકિસ્તાનના મોહમ્મદ આસિફને પસંદ કરતાં તેણે કહ્યું, "તે મારી કારકિર્દીમાં મારી સામે બોલિંગ કરનાર બેસ્ટ બોલરોમાંથી એક હતો. મને શેન વોર્ન સામે રમવાનું ગમતું હતું, પરંતુ મને ક્યારેય કોઈ મુશ્કેલી નથી પડી." તેણે કહ્યું કે તેને વોર્નનું વ્યક્તિત્વ પણ ગમ્યું.
એન્ડ્રુ ફ્લિન્ટોફ વિશે તેણે કહ્યું, "તે મોટી મેચોમાં સારું પ્રદર્શન કરે છે. એજબેસ્ટનમાં તેણે જેક્સ કાલિસને જે બોલ ફેંક્યો તે મેં જોયેલો બેસ્ટ યોર્કર હતો."
