IND vs WI / વેસ્ટ ઈન્ડિઝ સામેની ODIમાં આ 4 ખેલાડીઓને બેન્ચ પર બેસવું પડશે, પ્લેઈંગ ઈલેવનમાં નહીં મળે જગ્યા
છેલ્લું અપડેટ : 21 Sept 2026
વેસ્ટ ઈન્ડિઝની ટીમ આ જ મહિને ભારતના પ્રવાસે આવી રહી છે, જ્યાં બંને ટીમો વચ્ચે 3 ODI અને 5 T20 મેચોની સિરીઝ રમાશે. ODI સિરીઝની શરૂઆત 27 સપ્ટેમ્બરથી થવા જઈ રહી છે. BCCI દ્વારા આ સિરીઝ માટે 15 સભ્યોની ભારતીય ટીમની જાહેરાત કરી દેવામાં આવી છે. જોકે પ્લેઈંગ ઈલેવનની સત્તાવાર જાહેરાત ટોસ સમયે થશે, પરંતુ ટીમ કોમ્બિનેશન જોતાં 15માંથી 4 એવા ખેલાડીઓ છે જેમને આખી સિરીઝ દરમિયાન બહાર બેસી રહેવું પડી શકે છે.
યશસ્વી જયસ્વાલ
યુવા ઓપનર યશસ્વી જયસ્વાલને 15 સભ્યોની ટીમમાં સ્થાન તો મળ્યું છે, પરંતુ અંતિમ 11માં તેને તક મળવી ઘણી મુશ્કેલ જણાય છે. ટીમમાં કેપ્ટન શુભમન ગિલની સાથે અનુભવી રોહિત શર્મા ઓપનિંગ કરતો જોવા મળશે. મજબૂત ઓપનિંગ જોડીની હાજરીના કારણે જયસ્વાલને કદાચ આખી સિરીઝ બેન્ચ પર બેસીને જ વિતાવવી પડશે.
આકિબ નબી ડાર
જમ્મુ-કાશ્મીરના ફાસ્ટ બોલર આકિબ નબી ડારને પ્રથમ વખત ભારતની ODI ટીમમાં સામેલ કરવામાં આવ્યો છે. જોકે આંતરરાષ્ટ્રીય સ્તરે ડેબ્યુ કરવા માટે તેણે હજુ રાહ જોવી પડી શકે છે. ફાસ્ટ બોલિંગ વિભાગમાં મોહમ્મદ સિરાજ, પ્રસિદ્ધ કૃષ્ણા અને ગુરનૂર બ્રારની ત્રિપુટી મેદાનમાં ઉતરે તેવી પૂરી સંભાવના છે, જેથી આકિબને બહાર બેસવું પડી શકે છે.
નમન ધીર
ઘરેલુ ક્રિકેટમાં પંજાબ અને IPLમાં મુંબઈ ઈન્ડિયન્સ તરફથી દમદાર પ્રદર્શન કરનાર નમન ધીરને પણ પહેલીવાર ભારતીય ODI ટીમમાં તક અપાઈ છે. મિડલ ઓર્ડરમાં પહેલેથી જ મજબૂત અને અનુભવી ખેલાડીઓની હાજરી હોવાથી નમન ધીર માટે આ સિરીઝમાં પ્લેઈંગ ઈલેવનમાં સ્થાન મેળવવું પડકારજનક રહેશે.
ધ્રુવ જુરેલ
ધ્રુવ જુરેલને ટીમમાં રિઝર્વ વિકેટકીપર-બેટ્સમેન તરીકે પસંદ કરવામાં આવ્યો છે. મુખ્ય વિકેટકીપર તરીકે કેએલ રાહુલ પહેલેથી ટીમમાં હાજર હોવાથી જુરેલને કોઈપણ મેચ રમવાની તક મળવાની શક્યતા ઘણી ઓછી છે. જો રાહુલને કોઈ ઈજા પહોંચે તો જ જુરેલ માટે પ્લેઈંગ ઈલેવનના દરવાજા ખુલી શકે છે.