Religion / કોજાગરી પૂર્ણિમા પર કેવી રીતે કરશો લક્ષ્મીજીની કૃપા પ્રાપ્ત? આ 7 સરળ ઉપાયોથી ઘરમાં આવશે ધન અને ઐશ્વર્ય
હિન્દુ ધર્મમાં શરદ પૂર્ણિમાનું વિશેષ મહત્વ છે. તેને કોજાગરી પૂર્ણિમા અને રાસ પૂર્ણિમા તરીકે પણ ઓળખવામાં આવે છે. ધાર્મિક માન્યતાઓ અનુસાર, આ રાત્રે ચંદ્ર સોળે કળાએ ખીલેલો હોય છે અને તેની ચાંદનીમાંથી અમૃત વર્ષા થતી હોવાનું માનવામાં આવે છે.
આ જ કારણથી શરદ પૂર્ણિમાની રાત્રે દૂધ-પૌંઆ અથવા ચોખાની ખીર બનાવીને ચાંદનીમાં રાખવાનો અને બીજા દિવસે પ્રસાદ તરીકે તેનું સેવન કરવાનો રિવાજ છે.
એવી માન્યતા છે કે શરદ પૂર્ણિમાની રાત્રે માતા લક્ષ્મી પૃથ્વી પર ભ્રમણ કરે છે અને જે ભક્તો જાગરણ કરીને તેમની આરાધના કરે છે, તેમના પર અપાર કૃપા વરસાવે છે. તેથી ઘણા લોકો આખી રાત જાગીને લક્ષ્મીજી અને ભગવાન વિષ્ણુની પૂજા કરે છે. ધાર્મિક ગ્રંથો અને જ્યોતિષશાસ્ત્રમાં સુખ, શાંતિ, ધન અને સમૃદ્ધિની પ્રાપ્તિ માટે કેટલાક ખાસ ઉપાયો દર્શાવવામાં આવ્યા છે. ચાલો જાણીએ શરદ પૂર્ણિમાએ કરવા જેવા ૭ ખાસ ઉપાય:
ધન પ્રાપ્તિ માટે કોડીનો ઉપાય
શરદ પૂર્ણિમાની રાત્રે માતા લક્ષ્મીની મૂર્તિ કે ફોટા સમક્ષ ૧૧ કોડીઓ મૂકો અને તેના પર હળદર-કંકુનું તિલક કરો. વિધિવત પૂજા કર્યા પછી, બીજા દિવસે સવારે આ કોડીઓને લાલ કપડામાં બાંધીને તમારી તિજોરી કે પૈસા રાખવાના સ્થાને મૂકી દો. માન્યતા અનુસાર આ ઉપાયથી ઘરમાં ધન-સમૃદ્ધિમાં વધારો થાય છે.
પીપળાના વૃક્ષની પૂજા
શરદ પૂર્ણિમાની સવારે સ્નાન કર્યા પછી પીપળાના વૃક્ષને જળ ચઢાવો અને ઘીનો દીવો પ્રગટાવો. શાસ્ત્રો અનુસાર પીપળાના વૃક્ષમાં ત્રિદેવની સાથે માતા લક્ષ્મીનો પણ વાસ માનવામાં આવે છે. આ સમયે પરિવારની સુખ-શાંતિ અને સમૃદ્ધિ માટે પ્રાર્થના કરો.
શિવલિંગ પર ચંદન અને જળાભિષેક
આ દિવસે ભગવાન શિવની પૂજાનું પણ ખાસ મહત્વ છે. શિવલિંગ પર શુદ્ધ જળ કે ગંગાજળથી અભિષેક કરી, ચંદનનો લેપ લગાવો અને બિલીપત્ર અર્પણ કરો. 'ૐ નમઃ શિવાય' મંત્રનો જાપ કરતા મનોકામના પૂર્તિ માટે પ્રાર્થના કરો.
ચાંદનીમાં ખીર મૂકવી
ગાયના દૂધ અને ચોખામાંથી ખીર બનાવો. રાત્રે ચંદ્ર પૂર્ણ રૂપમાં આકાશમાં આવે ત્યારે ખીરને સ્વચ્છ ચાંદીના, માટીના કે કાચના વાસણમાં મૂકી, તેના પર ઝીણું કપડું કે જાળી ઢાંકીને ચાંદની પડે તેવી જગ્યાએ મૂકો. મોડી રાત્રે અથવા વહેલી સવારે પરિવાર સાથે આ ‘અમૃતમયી ખીર’ પ્રસાદ રૂપે ગ્રહણ કરો.
ચંદ્રદેવને અર્ઘ્ય અર્પણ કરવું
શરદ પૂર્ણિમાની રાત્રે જળમાં કાચું દૂધ, અક્ષત (ચોખા) અને સફેદ ફૂલ ઉમેરીને ચંદ્રદેવને અર્ઘ્ય અર્પણ કરો. અર્ઘ્ય આપતી વખતે 'ૐ સોમાય નમઃ' મંત્રનો જાપ કરવો. તેનાથી માનસિક શાંતિ મળે છે અને કુંડળીમાં ચંદ્ર દોષ દૂર થાય છે.
માતા લક્ષ્મી અને વિષ્ણુ પૂજન
ઘરના પૂજા સ્થાનમાં લક્ષ્મી-નારાયણની મૂર્તિ સમક્ષ ગાયના ઘીનો દીવો પ્રગટાવો. કમળનું ફૂલ કે ગુલાબ અર્પણ કરી શ્રીસૂક્ત, વિષ્ણુ સહસ્રનામ કે 'ૐ શ્રીં હ્રીં ક્લીં શ્રી સિદ્ધ લક્ષ્મ્યૈ નમઃ' મંત્રનો જાપ કરો.
તુલસી ક્યારે દીવો પ્રગટાવો
સંધ્યાકાળે અથવા ચંદ્ર ઉગ્યા પછી તુલસીના ક્યારા પાસે ગાયના ઘીનો દીવો પ્રગટાવો. ત્યારબાદ તુલસીજીની ૭ કે ૧૧ પરિક્રમા કરીને સુખી દાંપત્યજીવન અને પારિવારિક શાંતિ માટે પ્રાર્થના કરો.
શરદ પૂર્ણિમાની રાત્રે ખુલ્લા આકાશ નીચે બેસીને ચાંદનીનો આનંદ માણવાથી માનસિક તાજગી અને શીતળતા મળે છે. જોકે, ચંદ્ર સામે એકીટશે લાંબો સમય જોવાથી દ્રષ્ટિ સુધરે છે એ વાતનું કોઈ વૈજ્ઞાનિક પ્રમાણ નથી, તેથી આંખો પર અયોગ્ય તાણ ન પડે તેનું ધ્યાન રાખવું.
