માટી વિના પણ ઘરમાં લહેરાશે હરિયાળી: વાસ્તુ અનુસાર પાણીમાં ઉગાડો આ 3 છોડ, સુખ-સમૃદ્ધિમાં થશે વધારો
ઘરની સુંદરતા વધારવા માટે મોટાભાગના લોકો વિવિધ પ્રકારના ઇન્ડોર પ્લાન્ટ્સ લગાવવાનું પસંદ કરતા હોય છે. જોકે, કેટલાક એવા છોડ પણ છે જેને માટી વગર માત્ર પાણીમાં પણ સરળતાથી ઉગાડી શકાય છે. આ માટે કોઈ મોટા કૂંડા કે વધુ જગ્યાની જરૂર પડતી નથી; માત્ર કાચની બોટલ કે બરણી અને થોડું પાણી પૂરતું છે. વાસ્તુશાસ્ત્રમાં અમુક છોડને સુખ, સમૃદ્ધિ અને સકારાત્મક ઊર્જાના પ્રતીક માનવામાં આવ્યા છે. તેમને યોગ્ય દિશામાં રાખવાથી ઘરમાં શાંતિપૂર્ણ વાતાવરણ જળવાઈ રહે છે. જાણો પાણીમાં સરળતાથી ઉગી શકતા આવા ૩ ખાસ છોડ અને તેમની યોગ્ય દિશા વિશે:
મની પ્લાન્ટ: ઘરમાં લાવે છે આર્થિક સમૃદ્ધિ
વાસ્તુશાસ્ત્ર અને ફેંગશુઈ બંનેમાં મની પ્લાન્ટને ધન-સંપત્તિ અને સમૃદ્ધિ સાથે જોડવામાં આવે છે. માન્યતા મુજબ, ઘરમાં લીલોછમ મની પ્લાન્ટ રાખવાથી સકારાત્મકતા વધે છે અને પ્રગતિના નવા માર્ગ ખૂલે છે.
ઉગાડવાની રીત: સ્વચ્છ કાચની બોટલ કે જારમાં પાણી ભરીને મની પ્લાન્ટની કટિંગ સરળતાથી મૂકી શકાય છે.
યોગ્ય દિશા: વાસ્તુ મુજબ મની પ્લાન્ટ માટે અગ્નિ ખૂણો (દક્ષિણ-પૂર્વ દિશા) શ્રેષ્ઠ માનવામાં આવે છે.
સંભાળ: સમયાંતરે પાણી બદલતા રહેવું અને પીળા કે સૂકા પાંદડાંને તરત દૂર કરવા. વેલાને હંમેશાં ઉપર તરફ વધવા દેવો જોઈએ.
લકી બામ્બૂ: પોઝિટિવ વાઇબ્સ અને સૌભાગ્યનું પ્રતીક
લકી બામ્બૂ પોતાના આકર્ષક લુકને કારણે હોમ ડેકોર અને ઑફિસ ડેસ્ક માટે ખૂબ લોકપ્રિય છે. ફેંગશુઈ અનુસાર તે સૌભાગ્ય, સફળતા અને આરોગ્યનું પ્રતીક છે.
ઉગાડવાની રીત: પારદર્શક કાચના વાસણમાં પાણી ભરીને તેને રાખી શકાય છે. સુંદરતા વધારવા માટે વાસણના તળિયે રંગબેરંગી કાંકરા કે પથ્થર પણ ઉમેરી શકાય.
યોગ્ય દિશા: લકી બામ્બૂને પૂર્વ અથવા ઈશાન ખૂણામાં (ઉત્તર-પૂર્વ દિશા) રાખવું અત્યંત શુભ ગણાય છે.
સંભાળ: છોડના મૂળિયાં હંમેશાં પાણીમાં ડૂબેલા રહે તે જરૂરી છે, પરંતુ પાંદડાં પાણીમાં ન ડૂબે તેનું ધ્યાન રાખવું. અઠવાડિયે ઓછામાં ઓછું એકવાર પાણી બદલવું.
પીસ લિલી: માનસિક શાંતિ અને પવિત્રતાનો અહેસાસ
ઘેરા લીલા પાંદડાં અને આકર્ષક સફેદ ફૂલો ધરાવતી પીસ લિલી ઘરના કોઈપણ ખૂણાને પ્રીમિયમ લુક આપે છે. વાસ્તુ મુજબ તે ઘરમાં પવિત્રતા, સુમેળ અને માનસિક શાંતિનું વાતાવરણ બનાવે છે.
ઉગાડવાની રીત: પીસ લિલીને પાણીમાં ઉગાડવા માટે તેના મૂળિયાંમાંથી માટી સંપૂર્ણપણે સાફ કરવી અનિવાર્ય છે. ત્યારબાદ મૂળિયાંને સ્વચ્છ પાણીમાં ગોઠવવા.
યોગ્ય દિશા: તેને ઘરની ઉત્તર અથવા પૂર્વ દિશામાં મૂકવાની સલાહ આપવામાં આવે છે.
સંભાળ: છોડને સીધા તડકાથી દૂર રાખી પરોક્ષ કુદરતી પ્રકાશ મળે તેવી જગ્યાએ રાખવો. મૂળિયાંને સડતા બચાવવા માટે પાણી નિયમિતપણે બદલવું.
કાચના વાસણમાં છોડ રોપતી વખતે આટલું ધ્યાન રાખો:
પારદર્શક કાચની બોટલ કે બરણીનો ઉપયોગ કરવો, જેથી પાણીની સ્વચ્છતા અને મૂળિયાંના વિકાસ પર સરળતાથી નજર રાખી શકાય.
કન્ટેનરને અંદરથી નિયમિતપણે સાફ કરવું જેથી લીલ કે ચીકાશ ન જામે.
જો પાણીમાંથી દુર્ગંધ આવવા લાગે કે મૂળિયાં કાળા પડી સડવા લાગે, તો તરત જ ક્ષતિગ્રસ્ત ભાગ કાપીને તાજું પાણી ભરવું.
વાસ્તુ નિયમોની સાથે સાથે છોડને પૂરતો પ્રકાશ અને નિયમિત માવજત મળવી એટલી જ અનિવાર્ય છે.
