Recipe: આ રીતે બનાવશો પનીર ફ્રાઈડ રાઈસ, તો ઘરના બધા આંગળા ચાટતા રહી જશે
વીકેન્ડ હોય કે કોઈ ખાસ પ્રસંગ, ફ્રાઈડ રાઈસ ખાવાની મજા જ કંઈક અલગ હોય છે. પરંતુ ઘણીવાર આપણે વિચારીએ છીએ કે ઘરે રેસ્ટોરન
વીકેન્ડ હોય કે કોઈ ખાસ પ્રસંગ, ફ્રાઈડ રાઈસ ખાવાની મજા જ કંઈક અલગ હોય છે. પરંતુ ઘણીવાર આપણે વિચારીએ છીએ કે ઘરે રેસ્ટોરન્ટ કે લારી જેવો સ્વાદ કેવી રીતે લાવવો? આજે તમારા માટે એક એવી સરળ રેસીપી લાવ્યા છીએ, જે ઘરે બનાવવી ખૂબ જ સરળ છે. આ રીતે જ્યારે તમે પનીર ફ્રાઈડ રાઈસ બનાવશો, ત્યારે બાળકો હોય કે મોટા, બધા આંગળા ચાટતા રહી જશે અને તમારા વખાણ કરતા થાકશે નહીં.
જરૂરી સામગ્રી
- રાંધેલા ભાત: 2 કપ (બાસમતી ચોખા હોય તો ફ્રાઈડ રાઈસ એકદમ છૂટા બનશે)
- પનીર: 200 ગ્રામ (નાના ટુકડામાં સમારેલું)
- શાકભાજી: 1 કપ (ઝીણી સમારેલી ગાજર, કેપ્સિકમ, ફણસી અને કોબીજ)
- ડુંગળી: 1 મધ્યમ કદની (ઝીણી સમારેલી)
- આદુ-લસણ: 1-1 ચમચી (એકદમ ઝીણું સમારેલું)
- લીલા મરચાં: 2 (ઝીણા સમારેલા)
- સોયા સોસ: 1 મોટી ચમચી
- વિનેગર: 1 નાની ચમચી
- મરી પાવડર: અડધી ચમચી
- મીઠું: સ્વાદ મુજબ
- તેલ: 2 થી 3 મોટી ચમચી
- લીલી ડુંગળી: ગાર્નિશ કરવા માટે
બનાવવાની રીત
પનીર ફ્રાય કરો: એક પેન કે કડાઈમાં થોડું તેલ ગરમ કરો. તેમાં પનીરના ટુકડા નાખો અને તેને હળવા સોનેરી થાય ત્યાં સુધી સાંતળી લો. આમ કરવાથી પનીર ક્રિસ્પી થશે અને ભાતમાં ભેળવતી વખતે તૂટશે નહીં. પનીર તૈયાર થઈ જાય એટલે તેને એક પ્લેટમાં કાઢી લો.
વઘાર કરો: હવે તે જ કડાઈમાં 2 ચમચી તેલ ઉમેરો (ચાઈનીઝ વાનગી હંમેશા ફાસ્ટ આંચ પર બને છે, એટલે ગેસની આંચ તેજ રાખવી). તેલ ગરમ થાય એટલે તેમાં ઝીણું સમારેલું લસણ, આદુ અને લીલા મરચાં નાખો. તેને 10-15 સેકન્ડ સાંતળો જેથી તેલમાં સરસ સુગંધ બેસી જાય. ત્યારબાદ ડુંગળી ઉમેરીને હળવું ગુલાબી થાય ત્યાં સુધી પકાવો.
શાકભાજી ઉમેરો: જ્યારે ડુંગળી સંતળાઈ જાય, ત્યારે તેમાં બધા સમારેલા શાકભાજી (ગાજર, કેપ્સિકમ, ફણસી, કોબીજ) ઉમેરો. શાકભાજીને તેજ આંચ પર 2 થી 3 મિનિટ સતત હલાવતા રહીને સાંતળો. યાદ રાખો કે શાકભાજીને સાવ ગળવા દેવાના નથી, ફ્રાઈડ રાઈસમાં શાકભાજીનો ક્રંચ સારો લાગે છે.
સોસ અને મસાલા: શાકભાજી સંતળાઈ જાય એટલે આંચ ધીમી કરી દો. હવે તેમાં સોયા સોસ, વિનેગર, મરી પાવડર અને મીઠું ઉમેરો. બધી વસ્તુઓને બરાબર મિક્સ કરો. ધ્યાન રાખો કે સોયા સોસમાં પણ મીઠું હોય છે, એટલે મીઠું પ્રમાણસર નાખવું.
ભાત ઉમેરો: હવે કડાઈમાં પહેલાથી રાંધેલા ઠંડા ભાત અને ફ્રાય કરેલું પનીર ઉમેરો. હવે એકદમ હળવા હાથે બધી સામગ્રી મિક્સ કરો જેથી ભાતના દાણા તૂટે નહીં. તેને 2 મિનિટ સુધી તેજ આંચ પર ટોસ કરો (ઉલાળો) જેથી ભાતમાં સોસનો સ્વાદ બરાબર બેસી જાય.
તમારા ગરમાગરમ, છૂટા અને સ્વાદિષ્ટ પનીર ફ્રાઈડ રાઈસ તૈયાર છે! ગેસ બંધ કરી ઉપરથી ઝીણી સમારેલી લીલી ડુંગળી નાખો. તમે તેને એમનેમ પણ ખાઈ શકો છો અથવા મનપસંદ મંચુરિયન ગ્રેવી કે ચીલી પનીર સાથે સર્વ કરી શકો છો.
