HIV-AIDSથી બચવા માટેની અસરકારક રીત, દર 6 મહિને લગાવવામાં આવતું આ ઇન્જેક્શન આપશે રક્ષણ

AIDS એક ખતરનાક રોગ છે જેનું નામ સાંભળતા જ ડર લાગે છે. વિશ્વ આરોગ્ય સંગઠન (WHO) અનુસાર, 2024 માં વિશ્વભરમાં આશરે 40.8 મિલિયન લોકો HIVથી સંક્રમિત છે. 2024માં HIV સંબંધિત કારણોથી આશરે 6,30,000 લોકોના મૃત્યુના આંકડા સામે આવ્યા  છે. દર વર્ષે મોટી સંખ્યામાં લોકો HIVથી સંક્રમિત થાય છે. આજે પણ AIDS ને રોકવાનો એકમાત્ર રસ્તો સાવચેતી છે. હાલમાં HIV-AIDS ને રોકવા માટે કોઈ રસી નથી. જોકે, છેલ્લા કેટલાક વર્ષોમાં વિશ્વભરના અગ્રણી ડોકટરોએ એવી દવાઓ અને ઇન્જેક્શન વિકસાવ્યા છે જે HIV-AIDSના જોખમને નોંધપાત્ર રીતે ઘટાડી શકે છે. WHO એ આવી જ એક નવી દવા LEN લેનાકાપાવીર વિશે જાગૃતિ ફેલાવી છે, જે લોકોને HIV ના જોખમથી બચાવવા માટે વિકસાવવામાં આવી છે.

HIVને રોકવા માટે, વ્યક્તિએ દરરોજ ઘણી માત્રામાં દવા લેવી પડે છે. કેટલાક લોકો માટે દરરોજ ગોળીઓ લેવી મુશ્કેલ છે. આવા કિસ્સાઓમાં, લેનાકાપાવીર ઇન્જેક્શન અસરકારક અને મદદરૂપ સાબિત થઈ શકે છે. દરરોજ ગોળીઓ લેવાને બદલે તમારે દર છ મહિને ફક્ત એક જ વાર આ ઇન્જેક્શન લેવાની જરૂર છે. આ ઇન્જેક્શન મોંઘી દવાઓનો ખર્ચ ઘટાડે છે અને નવા ઇન્ફેક્શન સામે લડવામાં પણ મદદ કરે છે. આનાથી વધુ જીવ બચાવવામાં મદદ મળી શકે છે. WHO HIVના જોખમમાં રહેલા લોકોને બચાવવા માટે શ્રેષ્ઠ સારવાર તરીકે લેનાકાપાવીર અથવા LENની ભલામણ કરે છે.

HIV LEN લેનાકાપાવીર ઇન્જેક્શન શું છે?

વર્ષોના સંશોધન અને ક્લિનિકલ ટ્રાયલ પછી LEN લેનાકાપાવીર નામના ઇન્ટ્રામસ્ક્યુલર ઇન્જેક્શનને HIV ઇન્ફેક્શન અટકાવવા માટે સલામત માનવામાં આવ્યું છે. આ ઇન્જેક્શન લગાવ્યા બાદ ઓછામાં ઓછા 56 અઠવાડિયા સુધી શરીરમાં તેની હાજરી રહે છે, જે HIV સામે રક્ષણ પૂરું પાડે છે. આ ઇન્જેક્શન સ્ત્રીઓમાં HIV અટકાવવામાં 100% અસરકારક હોવાનું જાણવા મળ્યું છે.

HIV કેવી રીતે અટકાવવું?

નિષ્ણાતોના મતે, લેનાકાપાવીર (યેઝટુગો) એક PrEP દવા છે જે HIV વાયરસને શરીરમાં પ્રવેશતા અટકાવે છે. જો કે તે વેક્સીન નથી. આનું કારણ એ છે કે લેનાકાપાવીર ઇન્જેક્શન HIV વાયરસના સંપર્કમાં આવવાથી અટકાવે છે, પરંતુ શરીરમાં પ્રવેશ્યા પછી તે વાયરસ સામે લડી નથી શકતું. અમેરિકન બાયો ફાર્માએ લેનાકાપાવીરને પ્રોફીલેક્ટીક દવા તરીકે વિકસાવ્યું છે. લેનાકાપાવીર એક કેપ્સિડ અવરોધક છે જે HIV કેપ્સિડને નબળું પાડે છે, વાયરસને શરીરમાં ફેલાતો અટકાવે છે.

HIVને રોકવા માટે લેનાકાપાવીર, કોણ લગાવી શકે છે?

HIVના જોખમમાં રહેલા લોકો જો HIV-નેગેટિવ પરીક્ષણ કરે તો તેઓ આ ઇન્જેક્શન લઈ શકે છે. આ ઇન્જેક્શન HIVને રોકવામાં અસરકારક સાબિત થઈ શકે છે. જે વ્યક્તિને ઇન્જેક્શન લગાવવામાં આવી રહ્યું છે, તેનું વજન 35 કિલોથી વધુ હોવું જોઈએ. તે વ્યક્તિ એસિમ્પટમેટિક હોવી જોઈએ અને તેનો HIV ટેસ્ટ નેગેટિવ હોવો જોઈએ. આ ઇન્જેક્શન દર છ મહિને લગાવવામાં આવે છે અને દરેક ઇન્જેક્શન પહેલા HIV ટેસ્ટ નેગેટિવ આવવો જરૂરી છે. તે પછી જ આગામી ડોઝ આપવામાં આવે છે. આ ઇન્જેક્શનના ત્રણેય ટ્રાયલ સફળ સાબિત થયા છે અને તેને હવે FDA દ્વારા મંજૂરી આપવામાં આવી છે.