Parenting Tips : ડિજિટલ યુગમાં ખોવાઈ ગયું બાળપણ, મોબાઈલમાં સિમિત થઈ ગઈ આ 5 લોકપ્રિય રમતો

પૂંઠાના બોર્ડ પર કુકરીઓ ચલાવવી, જીતવા માટે પાસા ફેંકવામાં થોડી છેતરપિંડી કરવી અને હારી જઈએ ત્યારે આખું બોર્ડ જ ઉંધું વાળી દેવું - આ આપણા બાળપણનો સૌથી સુંદર ભાગ હતો. જોકે, આજના હાઈ-ટેક જમાનામાં તે બોર્ડ ઘરના કોઈ જૂના ટ્રંકમાં પડ્યા છે અને તેની જગ્યા આપણા સ્માર્ટફોન્સે લઈ લીધી છે. અહીં જાણો બાળપણની એ 5 પ્રિય રમતો પર જે હવે પૂરેપૂરી 'મોબાઈલ'માં કેદ થઈ ગઈ છે.

1. લુડો (Ludo)

લુડો કદાચ દરેક ભારતીય ઘરની સૌથી લોકપ્રિય રમત રહી છે. પહેલા આ રમતનો અર્થ હતો - એક ચોરસ બોર્ડ, ચાર રંગની કુકરીઓ અને હાથમાં પાસો. પાસા હલાવવાનો એ અવાજ અને '6' આવવા પર આખા ઘરમાં ગુંજતી ખુશી! આજે એ જ લુડો 'લુડો કિંગ' જેવી એપ્સમાં સિમિત થઈ ગયો છે, જ્યાં પાસો ફેંકવા માટે માત્ર એક આંગળીનું 'ટેપ' જ પૂરતું છે.

2. સાપ-સીડી (Snake and Ladder)

ઘણીવાર લુડોના બોર્ડની પાછળ જ સાપ-સીડી છપાયેલી હતી. રમતમાં સૌથી આગળ હોવા છતાં 99 નંબર પર બેઠેલા એ લાંબા સાપના કરડવાનું જે દુઃખ થતું, તેને શબ્દોમાં વર્ણવી શકાય તેમ નથી. આજના ડિજિટલ વર્ઝનમાં ગ્રાફિક્સ તો ખૂબ સારા થઈ ગયા છે, પરંતુ સીડી ચઢવાની એ અસલી ખુશી હવે અનુભવાતી નથી.

3. કેરમ (Carrom)

કેરમ બોર્ડ પર બોરિક પાવડર છાંટવો અને પછી સ્ટ્રાઈકરથી 'રાણી'ને પોકેટમાં નાખવી એ ખરેખર એક કળા હતી. રમતા-રમતા આંગળીઓમાં દુખાવો થતો, પણ મજા ખૂબ આવતી. આજે આપણે સ્ક્રીન પર આંગળી 'સ્વાઇપ' કરીને કેરમ રમીએ છીએ, પણ એ કેરમ બોર્ડના લાકડા અને પાવડરની સુગંધ હવે એપમાં ક્યાં?

4. ઝીરો-કાટા (Tic-Tac-Toe)

આ રમત તો સ્કૂલની નોટબુકના છેલ્લા પાના પર ચોક્કસ જોવા મળતી હતી. જ્યારે પણ ક્લાસમાં કંટાળો આવતો કે નવરો સમય મળતો, મિત્રો સાથે પેન અને કાગળ પર 'ઝીરો-કાટા' શરૂ થઈ જતું. નવાઈની વાત એ છે કે હવે આ રમત માટે પણ લોકો કાગળ-પેનને બદલે મોબાઈલ એપ ડાઉનલોડ કરવાનું વધુ પસંદ કરે છે.

5. પત્તાની રમત (Cards)

રમ્મી હોય કે પત્તાની બીજી કોઈ રમત, સાંજે ચાની ચુસ્કી સાથે પરિવાર વચ્ચે પત્તા રમવા એ સામાન્ય વાત હતી. પત્તા ચીપવાનો અને વહેંચવાનો પોતાનો જ એક અલગ આનંદ હતો. હવે અસલી પત્તાની જગ્યાએ મોબાઈલમાં જાતભાતની કાર્ડ ગેમ્સ આવી ગઈ છે, જે આપણે એકલા જ રમતા રહીએ છીએ.

આ ડિજિટલ દુનિયામાં આપણે શું ખોયું?

એ સાચું છે કે ડિજિટલ ગેમ્સે બધું ખૂબ સરળ બનાવી દીધું છે. આજે આપણે દુનિયાના કોઈ પણ છેડે બેઠેલા મિત્ર સાથે લુડો રમી શકીએ છીએ, પરંતુ આ સુવિધાના ચક્કરમાં આપણે ઘણું અમૂલ્ય ખોઈ પણ દીધું છે