Recipe : પ્રોટીન, ફાઈબર અને કેલ્શિયમથી ભરપૂર! વરસાદની સાંજે બનાવો ગરમાગરમ 'પ્રોટીન રિચ ભજીયા'
છેલ્લું અપડેટ : 07 Aug 2026
વરસાદ પડી રહ્યો હોય અને ઘરમાં ચા-ભજીયાં બનવાની તૈયારી ન થાય, એ શક્ય જ નથી. સામાન્ય રીતે પકોડા તેના કુરકુરાપણા, ગરમાટો અને સ્પાઈસી સ્વાદ માટે પસંદ કરવામાં આવે છે. તેને તળવા માટે વધુ પડતા તેલની જરૂર પડે છે. એવામાં પકોડા સ્વાદિષ્ટ તો લાગે છે પણ રોજ ખાવા માટે હેલ્ધી વિકલ્પ માનવામાં આવતા નથી. જો તમે પણ ચોમાસામાં કંઈક કુરકુરૂં, સ્વાદિષ્ટ અને સાથે પૌષ્ટિક ખાવા માંગો છો, તો અહીં જાણો પ્રોટીનથી ભરપૂર પકોડા રેસિપી.
આ રેસિપીની ખાસ વાત એ છે કે તેમાં સ્પ્રાઉટ્સ (ફણગાવેલા કઠોળ), પનીર, બેસન અને મમરા જેવા પૌષ્ટિક તત્વોનો ઉપયોગ કરવામાં આવે છે, જેનાથી પ્રોટીન, ફાઈબર, કેલ્શિયમ જેવા પોષક તત્વો મળે છે. સાથે જ તેને ડીપ ફ્રાય કરવાને બદલે એર ફ્રાયર કે તવા પર ઓછા તેલમાં પણ તૈયાર કરી શકાય છે, જેથી પકોડા હલકા, હેલ્ધી અને પ્રોટીનથી ભરપૂર બને છે. ચાલો જાણીએ તેને બનાવવાની સરળ રીત.
પનીર રિચ ભજીયા બનાવવાની રેસિપી
સામગ્રી
1 મધ્યમ કદની ઝીણી સમારેલી ડુંગળી
1 કપ મિક્સ્ડ સ્પ્રાઉટ્સ (ફણગાવેલા કઠોળ)
½ કપ છીણેલું પનીર
½ કપ બેસન (ચણાનો લોટ)
1 કપ મમરા
1 નાની ચમચી જીરું
1-2 ઝીણા સમારેલા લીલા મરચાં
1 નાની ચમચી છીણેલું આદુ
½ નાની ચમચી અજમો
સ્વાદાનુસાર મીઠું
2 મોટી ચમચી લીલા ધાણા (ઈચ્છા અનુસાર)
1-2 નાની ચમચી તેલ
બનાવવાની રીત
એક મોટા બાઉલમાં ડુંગળી, સ્પ્રાઉટ્સ અને પનીર ઉમેરો. હવે તેમાં જીરું, લીલા મરચાં, આદુ, અજમો અને મીઠું ઉમેરીને મિક્સ કરો.
ત્યારબાદ બેસન અને મમરા ઉમેરીને બધી વસ્તુઓને હાથથી સારી રીતે મિક્સ કરી લો. મિશ્રણ તૈયાર થઈ જાય એટલે નાના-નાના પકોડાનો આકાર આપો.
જો તમે એર ફ્રાયરનો ઉપયોગ કરી રહ્યા છો, તો 180°C પર 12 થી 15 મિનિટ સુધી પકાવો અને વચ્ચે એકવાર પલટાવી દો.
તવા પર બનાવવા માટે થોડું તેલ લગાવીને ધીમા તાપે બંને બાજુ ગોલ્ડન બ્રાઉન થાય ત્યાં સુધી શેકી લો.
કેટલીક જરૂરી ટિપ્સ
જો મિશ્રણ વધુ સુકાઈ ગયેલું લાગે તો 1-2 ચમચી પાણી ઉમેરી શકો છો.
પનીરને છીણીને ઉમેરવાથી મિશ્રણનું બાઈન્ડિંગ સારું થાય છે.
સ્વાદ વધારવા માટે લીલા ધાણા ઉમેરી શકાય છે.
તૈયાર પકોડાને લીલી ચટણી સાથે ગરમાગરમ પીરસો અને ચોમાસાની ઋતુની મજા માણો.
