Health Tips : પાણી ઓછું પીવાથી ઉનાળામાં વધી શકે છે પેટની ગરમી અને ગેસ: બચાવ માટે અપનાવો આ ટિપ્સ

ઉનાળાના દિવસોમાં ઊંચા તાપમાન અને શરીરમાં પાણીની અછત (ડિહાઈડ્રેશન)ને કારણે પેટને લગતી બીમારીઓ વધી જાય છે. જો પેટમાં સતત દુખાવો રહેતો હોય, તો તેને અવગણવો જોઈએ નહીં અને તાત્કાલિક ડોક્ટરનો સંપર્ક કરવો જોઈએ.

પાણીની કમીથી થતી સમસ્યાઓ

બેક્ટેરિયાનો ઉપદ્રવ: શરીરમાં પાણી ઓછું થવાથી પેટમાં ખરાબ બેક્ટેરિયા વધે છે, જે પાચન બગાડે છે.

એસિડિટી અને બળતરા: પાણીની અછતને કારણે પેટમાં એસિડનું પ્રમાણ વધે છે, જેનાથી પેટ અને છાતીમાં બળતરા થાય છે.

અન્ય તકલીફો: કબજિયાત, બ્લોટિંગ (પેટ ફૂલવું) અને ગેસની સમસ્યાઓ પણ સર્જાય છે.

ખાનપાનમાં સાવચેતી

ચરબીયુક્ત ખોરાક: વધુ ફેટવાળો ખોરાક અપચો અને બળતરા પેદા કરી શકે છે.

ઠંડા પીણાં અને ખાંડ: આઈસ્ક્રીમ કે વધુ પડતી ખાંડવાળા ઠંડા પીણાં પેટ માટે હાનિકારક હોઈ શકે છે.

ડેરી ઉત્પાદનો: જેમને લેક્ટોઝથી એલર્જી હોય, તેમને ડેરી પ્રોડક્ટ્સથી ગેસ કે ઝાડા થઈ શકે છે.

બચાવના ઉપાયો

પુષ્કળ પાણી: જો કિડનીની કોઈ સમસ્યા ન હોય, તો દિવસમાં ઓછામાં ઓછું ૨.૫ થી ૩ લિટર પાણી પીવું જોઈએ.

ઈલેક્ટ્રોલાઈટ્સ: લીંબુ શરબત, નાળિયેર પાણી કે ORS લેવું જોઈએ. નાળિયેર પાણી પેટના pH લેવલને જાળવી રાખે છે.

કુદરતી ઠંડક: દહીં, છાશ, રાયતું અને લસ્સી જેવા પદાર્થો પેટની ગરમી શાંત કરે છે.

મોસમી ફળો: તરબૂચ, ટેટી, કાકડી જેવા વધુ પાણી ધરાવતા ફળો ખાવા જોઈએ.

બહારનું ખાવાનું ટાળો: સ્ટ્રીટ ફૂડ અને બહારના જંક ફૂડને બદલે ઘરે બનાવેલો હળવો અને તાજો ખોરાક ખાવો.

પેટની ગરમી વધવાના કારણો

• વધારે તેલ-મસાલાવાળો ખોરાક અને અનિયમિત ભોજન.
• વધુ પડતી ચા, કોફી (કેફીન) અથવા કાર્બોનેટેડ ડ્રિંક્સ.
• તણાવ, ચિંતા અને અપૂરતી ઊંઘ.

આયુર્વેદિક અને ઘરેલું ઉપાયો

ધણા-જીરું-વરિયાળીનું મિશ્રણ: સૂકા ધણા, જીરું અને વરિયાળીને રાત્રે પલાળી, સવારે પીસીને એક ગ્લાસ પાણીમાં મિશ્ર કરી પીવાથી રાહત મળે છે.

છાશ: છાશમાં સિંધવ મીઠું અને શેકેલું જીરું નાખીને પીવાથી ભૂખ વધે છે અને પાચન સુધરે છે.

બિલિનો ઉપયોગ: બિલિનું શરબત, મુરબ્બો કે તેનો પાવડર પેટ માટે ખૂબ લાભદાયી છે.

ડ્રાય ફ્રૂટ્સ: રાત્રે પલાળેલા કિસમિસ, અંજીર, અખરોટ અને બદામ સવારે ખાવાથી પેટના રોગો સાથે કોલેસ્ટ્રોલ અને બ્લડ પ્રેશરમાં પણ રાહત મળે છે.

અન્ય: રાત્રે ત્રિફળા ચૂર્ણનું સેવન પાણી કે દૂધ સાથે કરી શકાય છે.

ખાસ નોંધ: જો ઘરેલું ઉપાયોથી આરામ ન મળે, વારંવાર ઉલટી-ઝાડા થાય કે વજનમાં ઘટાડો થાય, તો તરત જ ડોક્ટરની સલાહ લેવી જોઈએ.