Women's Day 2025 / ભારતના પ્રથમ મહિલા ડોક્ટર આનંદી ગોપાલ જોશીની કહાની, દરેક સ્ત્રી માટે બની શકે છે પ્રેરણાદાયક

દર વર્ષે 8 માર્ચને આંતરરાષ્ટ્રીય મહિલા દિવસ તરીકે ઉજવવામાં આવે છે. આજના સમયમાં દેશ અને દુનિયાની મહિલાઓ પુરૂષો સાથે ખભે ખભો મિલાવીને કામ કરી રહી છે અને દરેક ક્ષેત્રમાં ઊંચાઈ હાંસલ કરી રહી છે. પરંતુ કેટલીક મહિલાઓની સફળતાની વાર્તાઓ જાણીને, દરેક મહિલા સફળતા પ્રાપ્ત કરવા માટે પ્રેરણા મેળવી શકે છે. આવા જ એક મહિલાનું નામ આનંદી ગોપાલ જોશી છે. જેમને લોકો આનંદીબાઈના નામથી પણ ઓળખે છે. તમને જણાવી દઈએ કે આનંદી ગોપાલ જોશી ભારતના પ્રથમ મહિલા ડોક્ટર બન્યા.

9 વર્ષની ઉંમરે થયા લગ્ન

આનંદી ગોપાલ જોશીનો જન્મ 31 માર્ચ 1865ના રોજ પુણેમાં થયો હતો. આનંદીબાઈના લગ્ન માત્ર 9 વર્ષની ઉંમરે થયા હતા. આનંદીબાઈના પતિ ગોપાલરાવ તેમનાથી 16 વર્ષ મોટા હતા. તમને જણાવી દઈએ કે આનંદીબાઈ 14 વર્ષની ઉંમરે માતા બન્યા હતા, પરંતુ માત્ર 10 દિવસ પછી, તેમના બાળકનું ગંભીર બીમારીને કારણે મૃત્યુ થયું હતું. આ  પછી, આનંદીબાઈએ નક્કી કર્યું કે તેઓ કોઈપણ બાળકને બીમારીથી મરવા નહીં દે.

અમેરિકાની કોલેજમાં કર્યો અભ્યાસ

આનંદીબાઈની ડોક્ટર બનવાની ઈચ્છાને તેમના પતિ ગોપાલરાવે ટેકો આપ્યો. ગોપાલરાવે તેમના પત્ની આનંદીબાઈને શિક્ષણ શરૂ કરવા માટે મિશનરી સ્કૂલમાં મોકલ્યા હતા. 1880માં, ગોપાલરાવે અમેરિકામાં તબીબી અભ્યાસ વિશે માહિતી મેળવવા માટે એક લોકપ્રિય અમેરિકન મિશનરીને પત્ર લખ્યો હતો. પરિવાર અને સમાજના મતભેદ છતાં, આનંદીબાઈએ તેમના પતિના સમર્થનને કારણે તેમનું સપનું પૂર્ણ કર્યું. તમને જણાવી દઈએ કે આનંદીબાઈએ પોતાના બધા ઘરેણાં વેચી દીધા અને પેન્સિલવેનિયાની મહિલા મેડિકલ કોલેજમાં પ્રવેશ મેળવ્યો હતો.

19 વર્ષની ઉંમરે મેળવી ડિગ્રી

તમને જાણીને નવાઈ લાગશે કે આનંદીબાઈએ માત્ર 19 વર્ષની ઉંમરે એમડીની ડિગ્રી મેળવી હતી. આનંદીબાઈ આ ડિગ્રી મેળવનાર પ્રથમ ભારતીય મહિલા હતા. ભારત પાછા ફર્યા પછી, આનંદીબાઈને કોલ્હાપુર રાજ્યની આલ્બર્ટ એડવર્ડ હોસ્પિટલના મહિલા વોર્ડમાં ડોક્ટર ઈનચાર્જ તરીકે નિયુક્ત કરવામાં આવ્યા હતા. આનંદીબાઈની વાર્તા આપણને શીખવે છે કે જો તમે તમારા સપનાઓને પૂર્ણ કરવા માટે મક્કમ છો, તો તમને સફળ થતા કોઈ નહીં રોકી શકે. તબીબી પ્રેક્ટિસ કરતી વખતે, આનંદીબાઈ ક્ષય રોગનો ભોગ બન્યા, જેના કારણે તેમનું 26 ફેબ્રુઆરી, 1887ના રોજ અવસાન થયું હતું.