Video: બાવળાની જાણીતી કંપની બહાર વર્કરોનો હલ્લાબોલ! બોનસ અને પગાર મુદ્દે 100 થી વધુ કામદારો ગેટ સામે જ ધરણા પર બેઠા, આપી આ મોટી ચીમકી!

સોર્સ: gstv

બાવળા-સરખેજ હાઈવે પર મેલડી માતાજીના મંદિર પાસે આવેલી 'મિરાના' (Mirana) નામની કંપની બહાર કામદારોનો રોષ ફાટી નીકળ્યો છે. પોતાના પડતર પ્રશ્નો અને આર્થિક હકોની માંગણી સાથે કંપનીના 100 થી વધુ વર્કરો એકસાથે કંપનીના મુખ્ય ગેટ સામે જ ધરણા પર બેસી જતા વાતાવરણ ગરમાયું છે.

બોનસ, હક રજા અને ઓવરટાઈમના ચુકવણા મુદ્દે આક્રોશ આંદોલન પર ઉતરેલા કામદારોના જણાવ્યા અનુસાર, તેઓ દિવસ-રાત મહેનત કરીને કંપનીના ઉત્પાદનને વેગ આપે છે, તેમ છતાં તેમને તેમના મૂળભૂત અધિકારોથી વંચિત રાખવામાં આવી રહ્યા છે. વર્કરોએ મુખ્યત્વે ચાર મુદ્દાઓ પર પોતાનો વિરોધ નોંધાવ્યો છે. કામદારોને નિયમ મુજબ યોગ્ય બોનસ આપવામાં આવતું નથી. કર્મચારીઓને મળવાપાત્ર હક રજા (Privilege Leave) આપવામાં આવતી નથી. મહિનાનો પગાર સમયસર ચૂકવવામાં આવતો નથી. વધારાના કામ એટલે કે ઓવરટાઈમનું પણ યોગ્ય ચુકવણું થતું નથી.

જાહેરાત

સંચાલકો વાત ન સાંભળતા હોવાનો આક્ષેપ

ધરણા પર બેઠેલા વર્કરોએ આક્ષેપ કર્યો છે કે આ સમસ્યાઓ અંગે કંપની સંચાલકો સમક્ષ અગાઉ પણ વારંવાર રજૂઆતો કરવામાં આવી હતી, પરંતુ મેનેજમેન્ટ દ્વારા તેમની વાત પર કોઈ ધ્યાન આપવામાં આવતું નથી. કંપનીને ઊભી રાખનારા કામદારો આજે પોતાના જ હક માટે રસ્તા પર બેસવા મજબૂર બન્યા છે.

કમિશનર કચેરી સુધી લડત લઈ જવાની ચીમકી

કામદારોએ સ્પષ્ટ ચીમકી ઉચ્ચારી છે કે જો કંપની સંચાલકો દ્વારા તેમની વ્યાજબી માંગણીઓ સ્વીકારીને યોગ્ય ન્યાય નહીં આપવામાં આવે, તો તેઓ આ આંદોલનને અહીં અટકાવશે નહીં અને આગામી દિવસોમાં લેબર કમિશનર સુધી જઈને ઉગ્ર રજૂઆત કરશે. હવે જોવાનું એ રહેશે કે કંપની મેનેજમેન્ટ વર્કરોની માંગણીઓનો સુખદ ઉકેલ લાવે છે કે પછી આ આંદોલન વધુ ઉગ્ર સ્વરૂપ ધારણ કરે છે. 

આ સમાચાર શેર કરો

જાહેરાત