મહારાષ્ટ્રમાં CM પદ માટે કોનું નામ લઈ રહ્યા છે શરદ પવાર, ઉદ્ધવ સેના- કોંગ્રેસે શું આપી પ્રતિક્રિયા
મહારાષ્ટ્રના વિપક્ષી ગઠબંધન મહાવિકાસ અઘાડીમાં મુખ્યમંત્રી પદને લઈને ખેંચતાણ શરૂ થઈ ગઈ છ
મહારાષ્ટ્રના વિપક્ષી ગઠબંધન મહાવિકાસ અઘાડીમાં મુખ્યમંત્રી પદને લઈને ખેંચતાણ શરૂ થઈ ગઈ છે. એવું કહેવામાં આવી રહ્યું છે કે શરદ પવારે તેમના નજીકના સહયોગી જયંત પાટિલ અંગે સંકેત આપ્યા બાદ શિવસેના (UBT) અને કોંગ્રેસ પ્રતિક્રિયા આપી રહ્યા છે. રાજ્યમાં 20 નવેમ્બરે ચૂંટણી યોજાવાની છે.
પવારે શું કહ્યું?
NCP (SP)ની 'શિવ સ્વરાજ્ય યાત્રા' ઝુંબેશના ભાગરૂપે બુધવારે સાંગલી જિલ્લાના ઇસ્લામપુર ખાતે એક રેલી યોજાઈ હતી. આ રેલીમાં શરદ પવારે કહ્યું કે, બધાની ઈચ્છા છે કે જયંત પાટીલ 'રાજ્યના પુનઃનિર્માણની જવાબદારી' ઉપાડી લે.પાટિલ પાર્ટીના મહારાષ્ટ્ર યુનિટના વડા છે. મળતી માહિતી મુજબ આ રેલી દરમિયાન જેવા જયંત પાટિલ બોલવા ઉભા થયા કે તરત જ લોકોએ તેમને ભાવિ મુખ્યમંત્રી કહીને સૂત્રોચ્ચાર કર્યા. જો કે પાટીલે તેમને ઠપકો આપતાં કહ્યું હતું કે, 'માત્ર ઉઠક બેઠક કરવાથી કોઈ મુખ્યમંત્રી બની શકતો નથી.'
MVAએ શું કહ્યું?
પાર્ટીના પ્રવક્તા સંજય રાઉતે કહ્યું, 'જો શરદ પવારે મુખ્યમંત્રી પદ માટે જયંત પાટિલના નામને સમર્થન આપવાનો સંકેત આપ્યો હશે તો અમે તેમની સાથે ચર્ચા કરીશું.' રાઉતે એમ પણ કહ્યું કે પવારે આવો કોઈ સંકેત આપ્યો નથી.રાઉતે કહ્યું કે ઉદ્ધવ સેના પોતે છેલ્લા બે મહિનાથી એમવીએને સીએમ ઉમેદવારના નામની જાહેરાત કરવા માટે કહી રહી છે, જેને કોંગ્રેસ અને શરદ પવારની પાર્ટીએ હજુ સુધી સ્વીકાર્યું નથી.
સંજય રાઉતે કહ્યું કે, 'થોડા સમય અગાઉ તેમણે પાર્ટીમાં મહત્ત્વના પદ માટે રોહિત પવારનું નામ સૂચવ્યું હતું. જો કે એક પક્ષમાં બે મુખ્યમંત્રી હોઈ શકે નહીં. સીએમ પદ માટે સુપ્રિયા સુલેના નામની હંમેશા ચર્ચા થાય છે. જીતેન્દ્ર આહવડનું નામ પણ ચર્ચામાં છે. 5થી 6 લોકો મુખ્યમંત્રી બની શકતા નથી.
કોંગ્રેસ નેતા નીતિન રાઉતે કહ્યું, 'શરદ પવારે કહ્યું છે કે જયંત પાટીલમાં સીએમ બનવાના ગુણ છે. દરેક પક્ષ પોતાના નેતા વિશે આ રીતે વાત કરે છે, પરંતુ આખરે નિર્ણય કોંગ્રેસ નેતૃત્વ લેશે.
શરદ પવારે સીએમ પદના મુદ્દે કહ્યું, 'અમારા માટે આ મુદ્દો સમાપ્ત થઈ ગયો છે. જ્યારે અમે પ્રેસ કોન્ફરન્સ કરી ત્યારે અમે આ અંગે સ્પષ્ટતા આપી હતી. આ કોન્ફરન્સમાં ઉદ્ધવ ઠાકરે અને હું બંને હાજર હતા. તેમણે કહ્યું, 'મુખ્યમંત્રી પદ માટે વાત કરવાનો કોઈ અર્થ નથી. ચૂંટણીના પરિણામો આવવા દો, પછી વાત કરીશું. પાટીલ અંગે તેમણે કહ્યું કે, 'જયંત પાટીલ સીટ વહેંચણી અંગે નિર્ણય લઈ રહ્યા છે. તેમને મોટી જવાબદારી સોંપવામાં આવી છે.
