ભ્રષ્ટાચાર સામે કડક કાર્યવાહી...; કેજરીવાલે જેલમાંથી બહાર આવી જનતાને શું વચનો આપ્યા?

દિલ્હીના મુખ્યમંત્રી અરવિંદ કેજરીવાલે જેલમથી છૂટયા બાદ રવિવારે ફરી એક પ્રેસ કોન્ફરન્સમાં પીએમ મોદી પર નિશાન સાધ્યું અને મોદીની ગેરંટી સામે કેજરીવાલની ગેરંટી રાખી. તેમણે દેશને 10 ગેરંટી આપી છે જે જ્યારે ભારત ગઠબંધન સરકાર સત્તામાં આવશે ત્યારે પૂરી કરવામાં આવશે. જેમાં દેશને 24 કલાક મફત વીજળી પૂરી પાડવી, બાળકો માટે સારા અને મફત શિક્ષણની જોગવાઈ અને બધા માટે સારી સારવારની જોગવાઈ સામેલ છે. કેજરીવાલે કહ્યું, તેઓ સંપૂર્ણ રીતે તૈયાર થયા છે કારણ કે કેજરીવાલની ગેરંટી એક બ્રાન્ડ છે.  સીએમ કેજરીવાલે પ્રેસ કોન્ફરન્સ દ્વારા આ માટે 10 ગેરન્ટી રજૂ કરી હતી. જાણો શું છે આમ આદમી પાર્ટીના આ 10 દાવા... 

ગેરન્ટી નંબર 1. 24 કલાક મફત વીજળી

કેજરીવાલે કહ્યું કે, "દેશના લોકો માટે 24 કલાક વીજ પુરવઠો. દેશની પીક ડિમાન્ડ 2 લાખ મેગાવોટ છે. અમારી પાસે 3 લાખ મેગાવોટ ઉત્પાદન કરવાની ક્ષમતા છે, પરંતુ નબળા મેનેજમેન્ટને કારણે પાવર કટ થાય છે. AAP સરકાર બનતાં દેશના ગરીબોને મફત વીજળી અપાશે. એક વર્ષમાં સવા લાખ કરોડનો ખર્ચ થશે જે સરકાર આપશે. ગરીબોને 200 યુનિટ વીજળી મફત આપીશું. 

ગેરન્ટી નંબર 2. બધા બાળકો માટે મફત શિક્ષણ

બીજી ગેરન્ટી આપતાં સીએમ કેજરીવાલે કહ્યું કે દેશભરમાં દરેક બાળકને મફત શિક્ષણ આપવામાં આવશે. સરકારી શાળાઓનું સ્તર ઉંચુ આવશે. દેશની તમામ સરકારી શાળાઓને ઉત્તમ બનાવશે. આ કામ પૂર્ણ કરવા માટે 5 લાખ કરોડ રૂપિયાની જરૂર પડશે. તેના પર દર વર્ષે 50 હજાર કરોડ રૂપિયાનો ખર્ચ થશે. અડધો ખર્ચ કેન્દ્ર અને અડધો રાજ્ય સરકાર ઉઠાવશે.

ગેરન્ટી નંબર 3. મફત વર્લ્ડ ક્લાસ ટ્રીટમેન્ટ 

અરવિંદ કેજરીવાલે કહ્યું કે, "દેશભરમાં મોહલ્લા ક્લિનિક ખોલવામાં આવશે. તેમાં ગરીબ અને અમીર બંને માટે સારવાર મફત હશે. સારવારની ગુણવત્તા વિશ્વ કક્ષાની હશે. જે પણ ખર્ચ હશે તે સરકાર ઉઠાવશે."

ગેરન્ટી નંબર 4. રાષ્ટ્રીય સુરક્ષા

ચીને આપણા દેશની જમીન પર કબજો જમાવ્યો છે પરંતુ કેન્દ્ર સરકાર આ હકીકત છુપાવવા માંગે છે. આપણી સેનામાં ઘણી તાકાત છે. ભારતની તમામ જમીન જે ચીનના નિયંત્રણમાં છે તેને મુક્ત કરાવામાં આવશે. એક તરફ રાજદ્વારી સ્તરે પણ કામ થશે અને સેનાને સંપૂર્ણ સ્વતંત્રતા આપવામાં આવશે.

ગેરન્ટી નંબર 5. અગ્નવીર સ્કીમ બંધ કરાશે

અગ્નિવીર યોજના ચાર વર્ષ પછી આપણા યુવાનોને તગેડી મૂકે છે. આવી સ્થિતિમાં આપણે સેનાને નબળી બનાવી રહ્યા છીએ. તેથી આ યોજના બંધ કરાશે. અત્યાર સુધી જે બાળકો જોડાયા છે તેમને કાયમી કરાશે. 

ગેરન્ટી નંબર 6. ખેડૂતોના પાકના ભાવ સુનિશ્ચિત કરાશે

સીએમ કેજરીવાલે દાવો કર્યો છે કે જો જનતા આપ સરકાર ચૂંટીને કેન્દ્રમાં લાવશે છે, તો આમ આદમી પાર્ટી સ્વામીનાથન રિપોર્ટ લાગુ કરશે અને તે મુજબ ખેડૂતોને MSP મૂલ્ય આપવામાં આવશે. જેનો ફાયદો ખેડૂતોને થશે.

ગેરન્ટી નંબર 7. દિલ્હી માટે સંપૂર્ણ રાજ્યનો દરજ્જો

દિલ્હીના મુખ્યમંત્રી અરવિંદ કેજરીવાલે દાવો કર્યો છે કે જો કેન્દ્ર સરકાર બનશે તો તેઓ દિલ્હીને પૂર્ણ રાજ્યનો દરજ્જો આપશે.

ગેરન્ટી નંબર 8. બેરોજગારીનો અંત લવાશે 

એક વર્ષમાં બે કરોડ નોકરીઓનું સર્જન કરાશે. તમામ યુવાનોને સરકારી નોકરી માટે તૈયાર કરવામાં આવશે. ખાલી જગ્યાઓ બહાર પાડવામાં આવશે અને પરીક્ષાઓ નિષ્પક્ષ રીતે લેવામાં આવશે.

ગેરન્ટી નંબર 9. ભ્રષ્ટાચાર સામે કડક કાર્યવાહી કરાશે 

કેજરીવાલે કહ્યું કે, "ભાજપના વોશિંગ મશીનને ચાર રસ્તા પર ઉભા કરી દેવામાં આવશે અને તેને તોડી નાખવામાં આવશે. ઈમાનદાર લોકોને જેલમાં મોકલવાની અને ભ્રષ્ટાચારીઓને બચાવવાની હાલની યોજનાને નાબૂદ કરવામાં આવશે. સમગ્ર દેશને ભ્રષ્ટાચારથી મુક્ત કરવામાં આવશે."

ગેરન્ટી નંબર 10. વેપાર વિસ્તારવામાં આવશે 

કેજરીવાલે દાવો કર્યો છે કે, "ભારત સરકાર દેશના વેપારીઓને મદદ કરશે. આપણા દેશના ઘણા મોટા ઉદ્યોગપતિઓ પોતાનો ધંધો બંધ કરીને વિદેશ ચાલ્યા ગયા છે, તેનાથી દેશને નુકસાન થઈ રહ્યું છે. GSTને PMLAમાંથી બહાર કાઢવામાં આવશે અને તેનું સરળીકરણ થશે. જે કોઈ દેશમાં વેપાર કરવા માંગે છે તે કરી શકે છે, તેને વધુ જટિલ બનાવવામાં નહીં આવે.