પ.બંગાળમાં આવતીકાલે વિશેષ વિધાનસભા સત્ર, મમતા સરકાર લાવી શકે છે બળાત્કાર વિરોધી કાયદો

પશ્ચિમ બંગાળમાં બળાત્કારીઓને ફાંસી આપવા માટે કાયદો બની શકે છે. મમતા બેનર્જી સરકાર સોમવારથી શરૂ થઈ રહેલા વિધાનસભા સત્રમાં બિલ રજૂ કરી શકે છે. કોલકાતા બળાત્કાર-હત્યા કેસ જેવી ઘટનાઓ અંગે સીએમ મમતા બેનર્જીએ કહ્યું હતું કે તેઓ નિર્ધારિત સમયમાં આ જઘન્ય અપરાધના દોષિતોને ફાંસી આપવા માટે વિધાનસભામાં બિલ પસાર કરાવશે. આ બિલ મંગળવારે ગૃહમાં પસાર થવાની શક્યતા છે.

તાલીમાર્થી ડોક્ટર સાથે બળાત્કાર કેસમાં મમતા સરકાર બેકફૂટ પર

કોલકાતાની આરજી કાર મેડિકલ કોલેજ અને હોસ્પિટલમાં મહિલા ડૉક્ટર સાથે બળાત્કાર અને હત્યાના કેસમાં મમતા સરકાર બેકફૂટ પર છે. આ કેસની પ્રાથમિક તપાસ દરમિયાન પોલીસ પર બેદરકારીનો આરોપ લગાવવામાં આવ્યો છે. ભાજપના નેતૃત્વમાં લોકોએ મમતા સરકારનો ઉગ્ર વિરોધ કર્યો છે. મુખ્યમંત્રી મમતા બેનર્જીના રાજીનામાની પણ માંગ કરવામાં આવી છે.

સીએમ મમતાએ કહ્યું- જો રાજ્યપાલ બિલને લટકાવશે તો તેઓ વિરોધ કરશે

મુખ્યમંત્રી મમતા બેનર્જીએ કહ્યું કે વિધાનસભામાં બિલ પાસ કરીને તેઓ એ સુનિશ્ચિત કરશે કે બળાત્કારના ગુનેગારોને ફાંસીની સજા મળે. જો રાજ્યપાલ સીવી આનંદ બોઝ બિલને મંજૂર કરવામાં વિલંબ કરશે તો વિરોધ કરવામાં આવશે. તેમણે કહ્યું હતું કે અમે આવતા અઠવાડિયે વિધાનસભાના વિશેષ સત્રમાં સંશોધન બિલ પસાર કરીશું. ત્યારબાદ અમે તેને રાજ્યપાલને મંજૂરી માટે મોકલીશું. જો તેઓ બિલ સ્થગિત કરશે તો અમે રાજભવનની બહાર વિરોધ પ્રદર્શન કરીશું.

CM મમતાએ રાજીનામા પર શું કહ્યું?

કોલકાતા કેસ બાદ ભાજપ મમતા બેનર્જીના રાજીનામાની માંગ કરી રહી છે. તેના પર તેણીએ કહ્યું કે હું ભાજપને પૂછું છું કે જ્યારે વડાપ્રધાન નરેન્દ્ર મોદીએ ઉત્તર પ્રદેશ, મધ્યપ્રદેશ, મણિપર અને આસામમાં મહિલાઓ પર અત્યાચાર રોકવામાં નિષ્ફળ રહ્યા ત્યારે રાજીનામું કેમ ન આપ્યું. તેમણે કહ્યું કે રાજીનામાની માંગ એટલા માટે કરવામાં આવી રહી છે કારણ કે તેમને ચૂંટણીમાં હારનો સામનો કરવો પડ્યો છે. તે સારી રીતે જાણે છે કે તે ભવિષ્યમાં પણ ચૂંટણી જીતવાની નથી.